Esek 16 - Chiyawo Bible

Ungakulupicika wa Yelusalemu

¹ AMBUJE* ŵaŵecete ni une soni kuti,

² “M'mwe mwanace jwa mundu, mumlosye Yelusalemu ndamo syakwe syangalumbana.

³ Mumsalile Yelusalemu yakuti AMBUJE Mlungu kwa jwalakwe: “Mwapagwile mcilambo ca Kenani. Baba ŵenu ŵaliji Aamoli, soni mama ŵenu ŵaliji Muhiti.

⁴ Katema kimwapali, pangali juŵakatile cisowu cenu kapena kumjojesya m'mwejo kuti mswejele. Nganamtaga njete kapena kumŵiliga ni nguwo.

⁵ Paliji pangali atamose jumo jose juŵamsamele m'mwejo kapena kumtendela canasa pakumtendela yindu yeleyi. Ŵamjasile pasa pakulanguka, ligongo paliji pangali juŵamnonyele m'mwejo pa lisiku limwapagwile.

⁶ “Katema kinapitaga pimwaliji m'mwejo, nam'weni mli mkugalagata m'miasi jenu. Naŵecete namwe mli m'miasimo kuti, ‘Mŵe ni umi,

⁷ soni mkule mpela mbeju ja mu mgunda.’ Mwakusile ni mwalewipe ni kuŵa mwali jwakusalala. Maŵele gatandite kumela, umbo syenu syatandite kulewupa, nambope mwaliji matakope.

⁸ “Katema kinapitaga pimwaliji m'mwejo soni, nayiweni kuti ndaŵi jenu jakuŵa peŵasa jikwanile. Namwunicile mkanjo wangu kusisa umakonope wenu. Natesile namwe cilanga* ca ulombela, ni mwaliji ŵa une. Ayi ni yiŵatite AMBUJE Mlungu.

⁹ “Kaneko namjojesye nikumtyosya miasi jenu ni mesi. Nampakesye mawuta.

¹⁰ Namŵecice yakuwala yepetepete ni sapato sya lipende. Nampele nguwo syabafuta ni kum'weca yakuwala yasiliki.

¹¹ Namsalalisye ni nguwo syakusalala, ni kum'weca yibangili m'myala mwenu ni yuma mlukosi lwenu.

¹² Nam'wecice cipini pa lupula lwenu, ndolo m'mapikanilo genu ni cisoti ca ucimwene cakusalala pa mtwe wenu.

¹³ Myoyo mwawete yakusalalisya ya golidi* ni silifa,* yakuwala yenu yaliji ya bafuta jwakusalala, ya siliki ni yanguwo syepetepete. Mwalyaga utandi wambone, uci ni mawuta ga olifi.* Mwakusile mwakunonyelesya mnope ni mŵele mwenye jwamkongwe.

¹⁴ Mbili jakusalala kwenu jabucile pa cilambo cosope capasi, ligongo lumbili lwele lunam'wecice nalo lwamsalalisye mnope. Ni yiŵatite AMBUJE Mlungu.

¹⁵ “Nambo mwalilapilile nako kusalala ni kupikanika kwenu, ni mwatandite kutenda yalilama. Mwagonaga ni kulipeleka kwa jwamlume juŵayikaga kwenumwe.

¹⁶ Mwajigele yakuwala yenu yine ni kuja kusalalicisya nyumba syenu syakupopelela, ni kweleko mwatendelaga cikululu, yeleyi nganiyitendecekweje nipo ngasiyitendecekwa soni.

¹⁷ Mwajigele soni yakusalalicisya, yakupanganyidwa ni golidi jwangu ni silifa jwangu yele yinampele ni mwalipanganyicisye yilandanyo yacilume yele mwatendaga nayo cikululu.

¹⁸ Mwajigele yakuwala yenu yepetepete ni kujiweca milungu jinejo, soni mwapelece mawuta gangu ni ubani* wangu kwa jemanjajo.

¹⁹ Mwajigele yakulya yinampele, utandi, mawuta ni uci yinamlisyaga, ni mwayipelece kwa jemanjajo mpela mbopesi ja liwungo lyambone.” Ni yinguti Une AMBUJE Mlungu.

²⁰ “Mwajigele ŵanace ŵenu ŵacalume ni ŵacakongwe umwambelecele Une ni mwapite kukwapeleka mpela mbopesi kwa milungu jinejo. Ana ya lilama yenuyo nganiyimkwanape,

²¹ mpaka kwawulaga ŵanace ŵangu ni kuja kwapeleka mpela mbopesi kwa milungu jenu jinejo?

²² Ndaŵi jimwatendaga yangalumbana ni ya cikululu, nganimkumbucilaga masiku genu ga ucanda wenu, katema kimwaliji matakope ni galagataga m'miasi jenu.”

Umi wa Yelusalemu uli ŵa lilama

²³ AMBUJE Mlungu akuti, “Mkwete likungu, kusyene mkwete likungu,

²⁴ mwalitaŵile malo gakujilambilila milungu jine pa luŵala lulilose.

²⁵ Mwataŵile sanja pa msewu uliwose, ni mwatesile lilama ligongo lya kusalala kwenu, pakulipeleka kwa jwalijose jwakupita. Mŵele mlimkutenda cikululu mwangalecesya.

²⁶ Mwatesile cikululu ni Aiguputo ŵalilama umwaŵandikene nawo, mwandumbilikasisye ligongo mwaculwiye yacikulu.

²⁷ “Myoyo natambasukwile ligasa lyangu ni kumsumula mbuwa jenu ja upile wangu. Ni kumpeleka kwa amagongo ŵenu, Afilisiti ŵiŵasakalisidwaga ni ndamo syenu syakusakala.”

²⁸ “Ligongo lyangajikutila ni ŵandu ŵane, mwatesile soni cikululu ni Asiliya, nambope soni nganimjikutila.

²⁹ Mwapitilisye kutenda lilama ni Ababiloni, mtundu wakutenda malonda, nambope soni nganimjikutila amta panandi.”

³⁰ AMBUJE Mlungu akuŵeceta kuti, “Mwatesile yosopeyi mpela jwamkongwe jwakutenda lilama jwangali soni.

³¹ Pa msewu uliwose mwataŵile malo gakujilambila milungu jine ni kutendaga yalilama. Nambo m'mwejo nganimtendaga mpela muŵatendelaga ŵalilama ŵane uŵasosaga mbiya.

³² M'mwe ŵakongwe ŵalilama, mkusanonyela acalume ŵa cilendo kupunda ŵamkwenu.

³³ Acalume ŵapelekaga mbiya kwa acakongwe ŵalilama, nambo mwapelekaga mituka kwa maganja genu, mwaganyenjelelaga kuti gayiceje kutyocela mbali syosope kukugona ni m'mwejo.

³⁴ Myoyo mwaliji ŵakulekangana ni acakongwe ŵane uŵatendaga yalilama, ligongo nganipapagwa juŵamnyenjelelaga kuti mtende najo cikululu. M'mwejo ni umwapelekaga mbiya, ngaŵa jemanjajo kumpa mbiya m'mwejo iyayi. Kusyene mwaliji ŵakulekangana ni acakongwe ŵane.”

Mlungu tacipeleka cilango ku Yelusalemu

³⁵ Sambano m'mwe ŵakongwe ŵalilama, mpikane maloŵe ga AMBUJE.

³⁶ Yakuŵeceta AMBUJE Mlungu nayi: “Mwawusile yakuwala yenu mwangali soni, ni kulosya makonope genu pakutenda yalilama ni maganja genu ni milungu jenu jine, soni mwawuleje ŵanace ŵenu kuti mpela mbopesi sya kwa milungu jenu.

³⁷ Ligongo lya yeleyi tinjigasonganya pampepe maganja genu gosope gimwasangalalaga nago, maganja gimwaganonyelaga pampepe ni gimwaŵenganaga nago. Tinjasonganya kutyocela mbali syosope, ni kumwula pameso pawo kuti jemanjajo awuwone umakonope wenu.

³⁸ Tinjimpa cilango mpela acakongwe ŵacikululu soni ŵakuwulaga ŵandu muŵapocelelaga cilango. Ligongo lya ukali ni wiwu wangu tinjisulusya miasi jenu.

³⁹ Tinjimpeleka m'myala mwa maganja genu, ni tacigwisya malo genu gakupelecela mbopesi ni kulambila. Tacimwula yakuwala yenu ni kumtyosya yakulisalalicisya yenu yamtengo wapenani ni kumleka mli matakope.

⁴⁰ “Tacilituma likuga lya ŵandu kuti limsome maganga ni tacimkatanyakatanya ndulinduli ni mawupanga gawo.

⁴¹ Tacijoca nyumba syenu ni kumpa cilango acakongwe ŵajinji ali mkulola. Tinjimasya lilama lyenu soni ngasimgapa mbiya maganja genu.

⁴² Pelepo ukali wangu tiwucimala, soni tinjitulala. Ngasindumbila kapena kutenda wiwu soni.

⁴³ M'mwejo mliŵalile masiku genu ga wanace wenu, soni mwambulikasisye ni yindu yosope yimwatesile. Ni ligongo lyakwe Une tinjimwucisya pa mtwe penu cilango ca yele yimwatesile. Ligongo cici mwajonjecesye kutenda lilama pa yindu yine yakusakala yimwayitendaga?” AMBUJE Mlungu ni yaŵecete.

Mwanace ajigalile mamagwe

⁴⁴ “Ŵandu tacikamucisya masengo msyungu awu yakwamba m'mwejo Yelusalemu kuti, ‘Mwanace ajigalile mamagwe.’

⁴⁵ Kusyene m'mweji mli mwanace jwa mama ŵenu ŵele uŵaŵenganaga ni ŵamkwawo soni ni ŵanace ŵawo. M'mwe mli mpela acalongo acimjenu ŵele uŵaŵenganaga ni aciŵamkwawo soni ni ŵanace ŵawo. Mama ŵenu ŵaliji ŵa Cihiti, baba ŵenu ŵaliji ŵa Ciamoli.

⁴⁶ “Mkulugwenu Samaliya jwatamaga kumpoto kwenu pampepe ni misi jakwe. Mpwenu jwele jwatemiji ni misi jakwe kum'mwela kwenu ni Sodomu.

⁴⁷ M'mwe nganimjikutila kuya matala gawo gakusakala ni kutendaga yakusakala. Nambo jili jipite ndaŵi panandi, mwatandite kutenda yindu yakusalala mnope kupunda yiŵatendaga jemanjajo.

⁴⁸ “Kusyene mpela Une Mlungu jwacijumi, ni yakuti AMBUJE Mlungu, mlongo mjenu Sodomu ni misi jakwe ngatenda mpela mumtendele m'mwejo pampepe ni misi jenu.

⁴⁹ Ulemwa* wa mlongo mjenu Sodomu waliji wakuti jwalakwe pampepe ni misi jakwe ŵapokaga ni yipanje yawo yejinji, nambo nganasamalaga yakwakamucisya ŵakulaga ni ŵawusawuci.

⁵⁰ Ŵalikwesyaga mnope ni kutendaga yindu yakusakala pameso pangu, ni ligongo lyakwe natyosisye mpela mumkuyiwonelamu.

⁵¹ “Samaliya nganatenda hafu ja ulemwa umwatesile m'mwejo. M'mwejo mwatesile yindu yakusakala mnope kupunda acalongo acimjenu ŵaŵiliŵa, kwamti jemanjajo ŵawonekaga mpela ŵangali ulemwa pakumlandanya ni m'mwejo.

⁵² Sambano mwasyene mkwenela kutenda soni ni kunyosyedwa, m'mwe mwasyene mwatendesye acalongo acimjenu kuŵa mpela ŵangali ulemwa. Ulemwa wenu uli wakusakala mnope kupunda acalongo acimjenu, myoyo jemanjajo ŵawonece mpela ŵangali ulemwa. M'mwe mwasyene sambano, umwatesile acalongo acimjenu kuŵa mpela ŵangali ulemwa, mtende soni ni kunyosyedwa.

Sodomu ni Samaliya tacimpa soni upile

⁵³ “Tinjimpa upile Sodomu pampepe ni misi jakwe, Samaliya ni misi jakwe soni. Pa ndaŵi jelejo, nomwe ŵakwe Yelusalemu tinjimpa upile.

⁵⁴ Myoyo timcitenda soni ni kunyosyedwa ligongo mwatendesye acalongo acimjenuŵa kuŵa mpela ŵangali ulemwa.

⁵⁵ Nambo acalongo acimjenu, Sodomu pampepe ni misi jakwe taciŵa mpela muŵaŵelele kala, soni Samaliya pampepe ni misi jakwe taciŵa mpela muŵaŵelele kala nomwe ŵakwe ni misi jenu timciŵa mpela mumwaŵelele kala.

⁵⁶ Ana ndaŵi jimwatwangaga jila, ana nginimumsogodaga mlongo mjenu Sodomu,

⁵⁷ mkanikuwonecele kusakala kwenu? Sambano mli mpela jwalakwejo, jwakunyosyeka ni ŵandu ŵa ku Edomu ni kwa ŵandu wosope ŵakuŵandikana nawo kwika soni Afilisiti. Kusyene nditu ŵamsyungulile wosope akumnyosya mnope.

⁵⁸ Myoyo mkwenela kupocela cilango ligongo lya lilama lyenu ni ndamo syenu syakusakala.” Ni yinguti Une AMBUJE.

Cilanga cangamala

⁵⁹ Yakuŵeceta AMBUJE Mlungu nayi, “Tinjimtenda mpela mumwatendele, mwayinyosisye yele yimwalumbilile pakukasa cilanga.

⁶⁰ Nambope tinjikumbucila cilanga cinatesile ni m'mwejo ndaŵi jimwaliji ŵacinandipile, tinjitenda namwe cilanga cine cangamala mpaka kalakala.

⁶¹ Sambano timcikumbucila ndamo syenu syakala, timcitenda soni ndaŵi jitaciwuja acalongo acimjenu ŵala, ŵakulungwa ni ŵanandi ŵakwe. Tinjapeleka kwenumwe kuti aŵe mpela ŵanace ŵenu ŵacakongwe, atamose kuti jemanjajo nganaŵa nawo mcilanga cangu ni m'mwejo.

⁶² Tinjitenda cilanga cangu ni m'mwejo, ni timcimanyilila kuti Une ndili AMBUJE.

⁶³ Patinjimkululucila yakusakala yosope yimwayitesile, timciyikumbucila ni timcitenda soni mnope mpaka timcilepela kuŵeceta kose.” Ni yakuti AMBUJE.