Esek 13 - Chiyawo Bible

Ya cilango ca ŵakulocesya ŵacalume ŵa unami

¹ AMBUJE* ŵaŵecete ni une,

² “M'mwe mwanace jwa mundu, mwajimbe magambo ŵakulocesya ŵa Isalaeli ŵele ŵakulocesya yindu yagamba ganisya acimsyene. Mwasalile kuti apikanile maloŵe ga AMBUJE.”

³ Ayi ni yiŵaŵecete AMBUJE Mlungu: “Akwete likungu ŵakulocesya ŵakuloŵelaŵa ŵele ŵakukuya misimu jawo, nipo pangali cilicose ciŵaciweni atamose cimo.

⁴ Jemanja Aisalaeli, ŵakulocesya ŵenu ali mpela makule m'masame ga mu msinda.

⁵ Nganimkwela lipupa kuti mkalinganye mulyajonasicemo kuti liŵasa lya Aisalaeli mliteteye ku ngondo pa lisiku lya AMBUJE.

⁶ Ŵakulocesyawo ŵaŵecetaga ya unami, nipo ŵalocesyaga ya unami. Ŵaŵecetaga kuti, ‘Ayi ni yakuti AMBUJE,’ nambo pelepo mkiniŵatuma AMBUJE kose. Nambo akusajembecela kuti yaŵeceteyo tiyicitendecekwa.

⁷ Nambo Une nguti, yele jemanja ŵakulocesya yimkuti mwayiweni m'mesomkulola yili ya unami. Kulocesya* kwenuko kwa unami. Mkusatiga kuti, ‘Ni yakutitu AMBUJE,’ atamose kuti Une nganimbeceta kose.”

⁸ Sambano AMBUJE Mlungu akuti kwa jemanjajo, “Maloŵe genu ga unami, soni yimwayiwonaga m'mesomkulola yaliji ya unami. Ni myoyo nguŵengana namwe.

⁹ Sigele panandi kuti nampe cilango jemanja ŵakulocesya ŵimwatiga mwayiwonaga yindu m'mesomkulola ni kulocesyaga ya unami. Ngimŵa nawo yalumo ŵandu ŵangu ndaŵi jitaciŵa pamo ni kuŵecetanaga; mena genu ngasigaŵa nawo mlikuga lya alukosyo lwa Aisalaeli; soni ngasimwujila kumangwenu. Pelepo timcimanyilila kuti Une ni AMBUJE Mlungu.

¹⁰ “Ŵakulocesyawo ŵasokonasisye ŵandu ŵangu pakuŵeceta kuti yindu yosope yili cenene. Citamileco yindu yosopeyo yili nganiyiŵa cenene kose. Ŵandu ŵangu ŵataŵile lipupa lya maganga, nipo ŵakulocesyawo ŵayice ni kupaka lipupalyo ni njelesa.

¹¹ Sambano mwasalile ŵakulocesyawo kuti lipupa lyawolyo tilicigwa. Tijicigwa ula jamacili mnope. Matalila gekulungwa tigacigwila lipupalyo soni mbungo jamacili tijicipujila lipupalyo.

¹² Lipupalyo tilicigwa, mwakuti ŵandu tacimwusyaga jemanja kuti ana njelesa sila syakamwile masengoci?”

¹³ Sambano ayi ni yakuŵeceta AMBUJE Mlungu: “Tinjimtumicisya mbungo jamacili ndili ndumbile, soni ula jamacili, ni matalila gamakulungwa kuti gajonanje lipupalyo.

¹⁴ Tinjiligwisya lipupa lyele limwalipacile njelesalyo, ni tinjilisimasya mpakana maganga ga yilimbilimbi yakwe galigawonecele pakulanguka. Katema katilicigwaga lipupalyo, jemanja nomwe ŵakwe timciwila m'momo. Pelepo timcimanyilila kuti Une ni AMBUJE.

¹⁵ “Mwelemu ni mucinjikamulicisya lutumbilo lwangu pa lipupa ni pa ŵele ŵiŵalipakaga njelesa ŵala. Pelepo tinjimsalila kuti lipupa ligwile pampepe ni ŵele ŵiŵalipakaga njelesa ŵala.

¹⁶ Ŵakulocesya ŵele ŵiŵalocesyaga ku Yelusalemu ni kuwuwona mtendele wa Yelusalemu m'mesomkulola, nambo mtendelewo kwaliji kwangali.” Ni yaŵecete AMBUJE Mlungu.

Ya cilango ca ŵakulocesya ŵacakongwe ŵa unami

¹⁷ AMBUJE ŵatite, “Sambano m'mwe mwanace jwa mundu, mwalole acakongwe ŵali pasikati pa ŵandu ŵenu ŵele ŵakulocesya yindu yagamba ganisya acimsyenepewo m'mitima jawo, ni sambano mwasisye jemanjajo

¹⁸ mwasalile jemanjajo yakuŵeceta AMBUJE Mlungu kuti nayi: “Mkwete likungu jemanja acakongwe ŵamkutota yilisi ya pa mkono soni ŵamkutota nguwo sya kumtwe kuti jwalijose awaleje mu mtwe wakwe kuti ŵasupusyeje mitima ŵandu ŵane. Jemanja mkusaka kuŵa ni macili ga umi ni ciwa pa ŵandu ŵangu ni kuti mkamulicisyeje masengo mwakumnonyela mwacimsyenepe basi.

¹⁹ Nganimunjimbicisya pameso pa ŵandu ŵangu kuti mpate ligasa lya mbeju jakolanjidwa balele* ni ndikatika sya mkate. Mkwawulaga ŵandu ŵangakwenela kuwa, ni mkwasunga ŵandu ŵangakwenela kuŵa ni umi. Ni mgamba kwasalila ŵandu ŵangu ya unami, nipo jemanjajo akuyipikanila ya unami yenuyo.”

²⁰ Sambano ayi ni yakuŵeceta AMBUJE Mlungu: “Nguŵengana nayo yilisi yakuwala pa mkono yimkukamulisya masengo pakulamulila umi ni ciwa. Tinjiyityosya m'makono genu ni kwaleka ŵandu ŵele ŵimwalamwileje pa mtendele.

²¹ Tinjisityosya nguwo syakuwala mu mtwe ni kwakunda ŵandu ŵangu kuti atile ku ulamusi wenu mpaka kalakala. Pelepo timcimanyila kuti Une ni AMBUJE.

²² “Ni unami wenu mwagwisisye mbwayi ŵandu ŵangu ŵambone ŵele Une nganisakaga kuti agwe mbwaji. Mwalimbisye mtima ŵandu ŵangalumbana kuti akaleka ulemwa* wawo, nambo kuti apitilisye kusamala umi wawo.

²³ Sambano ya ŵakulocesya yenu ya unami yimwatiga myiweni m'mesomkulola yila yimasile. Ngwakulupusya ŵandu ŵangu kutyoka mu ulamusi wenu, myoyo timcimanyilila kuti Une ni AMBUJE.”