Esek 12 - Chiyawo Bible

Ciwanicisyo ca jwakulocesya mpela jwakutila ngondo

¹ AMBUJE* ŵaŵecete ni une kuti,

² “M'mwe mwanace jwa mundu, mkutama pasikati pa ŵandu ŵa upandu. Jemanjajo akwete meso nambo ngakulola, akwete mapikanilo nambo ngakupikana, ligongo lyakuti jemanjajo ali ŵandu ŵakwimucila.

³ “Sambano m'mwe mwanace jwa mundu, mlonganye yindu yenu yakujigala mpela mundu jwakwawula ku ukapolo, soni mtyoce musi jemanjajo ali mkulola. Mkatyoce mpela mundu jwakwawula ku ukapolo kutyoka kumangwenu ni kwawula ku malo gane ga cilendo jemanjajo ali mkulola. Mwine mwakwe jemanjajo tacipikanicisya atamose kuti ali ŵandu ŵakwimucila.

⁴ Mumkoposye katundu jwenu jwakwawula najo ku ukapolo musi, jemanjajo ali mkulola. Ligulo, jemanjajo ali mkulola, mtyoce kumusi kwenu mpela mkwawula ku ukapolo.

⁵ Mpowole lipupa jemanjajo ali mkulola, ni mkopecele pelepo.

⁶ Mtwicile katundu jwenu pekoyo, jemanjajo ali mkulola, ni mjawule kusa kucipi meso genu mli mwunicile, kuti mkalola pasi, ligongo namtesile kuŵa cimanyisyo ca ŵandu ŵa liŵasa lya Aisalaeli.”

⁷ Natesile muŵasalilile. Nakopwesye katundu jwangu musi, mpela jwakwawula ku ukapolo, ligulo napowele lipupa ni makono gangu. Natwicile katundu jwangu pekoyo ni cipi jemanjajo ali mkulola ni kopoka najo.

⁸ Kundaŵi kwakwe AMBUJE ŵambelele utenga awu wakuti,

⁹ “M'mwe mwanace jwa mundu,” ana Aisalaeli, ŵandu ŵakwimucila ŵala, ngaŵa uŵamwusyaga kuti, ana mkutenda cici.

¹⁰ Mwasalile kuti yinguŵeceta Une AMBUJE Mlungu nayi: Utengawu ukwamba ŵakulamulila ŵa ku Yelusalemu ni ŵandu ŵakutama kweleko.

¹¹ Mwasalile kuti, Une ndili cimanyisyo cakumtetela jemanja. Yimbonecele uneyi, tiyicimwonecela soni jemanja. Tacijigalidwa kwawula ku ukapolo.

¹² Jwakulamulila jwawo tacitwicila katundu jwakwe pekoyo mcipi ni kutyoka. Tacikopocela pebowo liŵapowele ŵandu pepupa, ali awunicile kumeso kwawo kuti akalolaga kwakwawula.

¹³ Nambo tinjitega lwawu lwangu ni tacitanjilamo. Tinjajigalila ku msinda wa Babiloni* kwele kutakawile nambo ngaciwona cilamboco.

¹⁴ Tinjapwilinganya ku mbali syosope mcece sya cilambo, wosope ŵakutama nawo pakuŵandika, ŵakumkamucisya ŵakwe soni ŵa ngondo ŵakwe. Tinjakuya ni upanga wangu kuti nawulaje.

¹⁵ “Pelepo tacimanyilila kuti Une ni AMBUJE, katema kutinjabalalikanganyicisya pasikati pa mitundu ja cilendo ni ku yilambo yine.

¹⁶ Nambo tinjaleka ŵane kulupuka ku ngondo, sala ni ku yilwele, kuti akapesye yosope yakusakala pasikati pa mitundu ja ŵandu kwele kwakwawula. Pelepo tacimanyilila kuti Une ndili AMBUJE.”

Cimanyisyo ca jwakulocesya jwakutetemela

¹⁷ AMBUJE ŵaŵecete ni une kuti,

¹⁸ “M'mwe mwanace jwa mundu, mtetemeleje patimlyeje, m'mweje mesi mli mkutetemela ni woga.

¹⁹ Mwasalile ŵandu wosope yinguŵeceta Une AMBUJE Mlungu yakwamba ŵandu ŵakutama ku Yelusalemu soni mcilambo ca Isalaeli nayi: Tacilya mkate wawo ni woga ni kumwa mesi mwakudandawula. Cilamboco tacicityocesya yindu yosope yicakwete ligongo lya yiwawa yiŵatesile ŵandu ŵakutama mwelemo.

²⁰ Misinda jikwete ŵandu tijicijonanjidwa, soni cilambo ticiciŵa cipululu. Myoyo timcimanyilila kuti Une ndili AMBUJE.”

Citagu cakumanyika cenene ni utenga wangamanyika

²¹ AMBUJE ŵaŵecete ni une kuti.

²² “M'mwe mwanace jwa mundu, ana msyungu ukupikanikawu mcilambo ca Isalaeli ukugopolela cici? Msyunguwu ukuti, ‘Masiku gakutupa, nambope yakulocesya ngayikutendecekwa’?

²³ Sambano mwasalile jemanjajo kuti, Une AMBUJE Mlungu nguti, Tinawumasye msyungu welewu, soni ngasawukamulisya masengo mpela msyungu mu Isalaeli. Nambo mwasalile jemanjajo kuti ndaŵi jiŵandicile jakuti yosope yinamsalile m'mesomkulola yitendecekwe!

²⁴ “Myoyo ngasigawoneka soni mesomkulola ga unami kapena kutenda cisango ca unami pasikati pa Aisalaeli.

²⁵ Une AMBUJE tinjiŵeceta ni jemanjajo, soni yiticinjiŵeceta yiticitendecekwa. Ngasiyikokoŵa soni iyayi, nambo masiku genu pega, Une tinjiŵeceta ni jemanja ŵandu ŵakwimucila, soni tinjiyitenda kusyene.” Ni yinguti Une AMBUJE Mlungu.

²⁶ AMBUJE ŵaŵecete ni une kuti,

²⁷ “M'mwe mwanace jwa mundu, Aisalaeli akuŵeceta kuti mesomkulola genu ni yakulocesya yenu yili ya ndaŵi ja kusogolo mnope.

²⁸ Sambano mwasalile jemanjajo kuti, Yinguŵeceta Une AMBUJE Mlungu nayi: pangali mwa maloŵe gangu pitigacikokoŵa soni iyayi, nambo maloŵe gimbecete tinjigatenda. Ni yinguti Une AMBUJE Mlungu!”