Esek 11 - Chiyawo Bible

Yelusalemu tacipocela cilango

¹ Msimu wa Mlungu wanyakwile ni kunjigalila une ku cipata cakungopoko lyuŵa ca Nyumba ja AMBUJE.* Pakuŵandikana ni cipataco paliji pana ŵandu makumi gaŵili ni msano, nambo sikati ja ŵanduwo ŵapali ŵakulamula aŵa ŵa ŵanduwo: Yasaniya mwanace jwa Asuli ni Pelatiya mwanace jwa Benaya.

² Mlungu ŵatite kwa une kuti, “M'mwe mwanace jwa mundu, ŵandu aŵa apangeneje yakusakala ni kwapangaga ŵandu yindu yakusakala ŵa mu msinda uno.

³ Jemanjajo ŵatite, ‘Mwangakaŵa tuciŵa tulimkutaŵa majumba soni. Msindawu uli mpela mpika uli pa moto, nipo uwe tuli mpela nyama jele jili mu mpikamo, nambope mpikawo ukutucinjilicisya kuti tukapya ni motowo.’

⁴ Sambano m'mwe mwanace jwa mundu, mwajimbe magambo jemanjajo!”

⁵ Pelepo Msimu wa AMBUJE ŵalamulilaga une, nipo AMBUJE ŵandesile kuti nasalile ŵandu utenga awu: “Ŵandu ŵa ku Isalaeli, nguyimanyilila yele yimkuŵeceta ni yele yimkuganisya kuti myitende.

⁶ Mwawuleje ŵandu ŵajinji mu msinda muno, mwamti misewu josope jigumbele ni mitembo.

⁷ “Sambano ayi ni yakuŵeceta AMBUJE Mlungu: Mitembo jele jimjasile kweleko jili nyama nipo msinda awuno uli mpika wakutelecela, nambo tinjimtopola jemanja mu msinda muno.

⁸ Ana jemanja mkogopa upanga? Tinjiyika nawo ŵandu ŵitacimtaga ngondo ni upanga jemanja.

⁹ Tinjimkoposya jemanja mu msindamo nipo tinjimpelaka m'myala mwa ŵandu ŵakwika. Namlamwile jemanja kuti tim'we,

¹⁰ nipo timciwulajidwa pa ngondo mcilambo cenu. Pelepo jwalijose tacimanyilila kuti Une ni AMBUJE.

¹¹ Msindawu ngasiwumcinga jemanja mpela mwele mpika ukusacinjilicisya nyama jakuŵa mwelemo. Tinjimpa cilango jemanja kulikose kutimciŵa mcilambo ca Isalaelici.

¹² Timcimanyilila kuti Une ni AMBUJE. Nganimkuya yinamsalilaga, nganimpikanilaga malamusi gangu. Nambo mŵele mli mkugakuya malamusi ga ŵandu ŵa mitundu jine* ŵimwaŵandikene nawo.”

¹³ Ndaŵi jinalocesyaga, Pelatiya mwanace jwa Benaya jwawile. Naligwisisye namsyene camakuku ni gumila kuti, “Iyayi, AMBUJE Mlungu! Ana akusaka kuwulaga jwalijose jwasigele mu Isalaeli muno?”

Mlungu atesile cilanga ni ŵandu ŵapite ku ukapolo

¹⁴ AMBUJE ŵaŵecete ni une kuti:

¹⁵ “M'mwe mwanace jwa mundu, ŵandu ŵakutama ku Yelusalemu akuŵeceta yenumwe ni acalongo acimjenu Aisalaeli ŵele ŵali ku ukapolo. Akuŵeceta kuti, ‘Ŵandu ŵiŵajigalidwe ukapolo ŵala ali kwakutalika kuti ŵalumbe AMBUJE. Pakuti atupele cilamboci kuti cetu.’ ”

¹⁶ “Sambano mkasalile acimjenu ŵimli nawo ku ukapolo yele yinguŵeceta Une: Une ni junatumisye jemanjajo kuti mkatame kwakutalika ni ŵandu ŵa mitundu jine nambo soni ni kwapwilinganyicisya ku yilambo yine. Nambo sambano tinjiŵa nawo jemanjajo kulikose kuŵapite.”

¹⁷ “Myoyo mwasalile jemanjajo yinguŵeceta Une AMBUJE Mlungu: Tinjasonganya malo gampepe kutyocela ku yilambo kunapwilinganyicisye jemanjajo, ni kwapa soni cilambo ca Isalaeli.

¹⁸ Ndaŵi jitaciwujajo, tayilece yindu yosope yakusakala, soni kwasa milungu jine jitacijisimana jemanjajo kweleko.

¹⁹ Tinjapa jemanjajo mtima wasambano ni nganisyo syasambano. Tinjityosya kumula mtima kwamti mpela liganga mwa jemanjajo ni kwapa mtima wakupikanila.

²⁰ Myoyo tacigasunga malamusi gangu soni kupikanila yakuŵeceta yangu mwakulupicika. Taciŵa ŵandu ŵangu, nipo Une tinjiŵa Mlungu jwawo.

²¹ Nambo tinjapa cilango ŵandu ŵele ŵakunonyela kuyilambila yindu yakusakala, ni milungu jine. Tinjapa cilango ligongo lya yindu yatesile.” AMBUJE Mlungu ni yakuŵeceta.

Ucimbicimbi wa Mlungu watyosile mu Yelusalemu

²² Akelubi ŵala ŵatandite guluka, nipo yitungulu nombe nayo yapite yalumo ni yeleyo. Lilanguka lya lumbili lwa Mlungu jwa Aisalaeli lwaliji pacanya pa yiwumbeyo.

²³ Lilanguka lya lumbili lwa Mlungu lyatyosile mu msindamo ni kuja kutama mwitumbi lya kungopoko lyuŵa kwa msindawo.

²⁴ M'mesomkulola msimu wa Mlungu wanyakwile une ni kumbucisya ku Babiloniya kunaliji mu ukapolo. Kaneko yinayiweni m'mesomkulola yila nganiyiwoneka soni,

²⁵ nipo nasalile yosope ŵandu ŵiŵaliji ku ukapolo yele AMBUJE yiŵandosisye une.