Esek 1 - Chiyawo Bible

Esekiele akutanda kuyiwona yindu m'mesomkulola 1:1—7:27 Ya citengu ca Mlungu

¹ Lisiku lyamsano lya mwesi wamcece, caka ca makumi gatatu, une Esekiele jwakutaga mbopesi,* mwanace jwa Busi, natemi pampepe ni acikapolo ŵa ku Yuda pakuŵandikana ni Lusulo lwa Kebala ku Babiloniya. Kwinani kwawugwice, ni nam'weni Mlungu m'mesomkulola.

² Lyaliji lisiku lya msano lya mwesi, caka ca msano cele Mwenye Yehoiyakini ŵajigelwe kwawula ku ukapolo.

³ Ku Babiloniko mungulugulu Lusulo lwa Kebala, napikene AMBUJE* ali mkuŵeceta ni une nipo nagaweni macili gakwe galimkuyicila.

⁴ Nalolite kwinani, ni najipikene mbungo jamacili mnope jakutyocela kumpoto. Njasi syamesyaga kutyocela mliwunde lyalikulungwa mnope, nipo liwunde lilyaliji mumbali mwakwe lyaliji mkuŵala. Kujamesyaga njasiko, kwawonekaga mpela bulonsi.

⁵ Pasikati pa mbungo jamacili mnope, nayiweni yindu mcece yiyawonekaga ya umi mpela mundu,

⁶ nambo cilicose cakwete ngope mcece ni mapapiko mcece.

⁷ Ngongolo syakwe syaliji syakongoka, nambo sajo syakwe syakwete yikotwa mpela mwanace jwa ngo'mbe. Yikotwayo yanyesimilaga mpela bulonsi.

⁸ Pakonjecesya ngope syakwe mcece ni mapapiko gakwe mcece, cilicose cakwete makono mcece ga mundu, lipapiko lililyose lyakwete mkono umo pasi pakwe.

⁹ Mapapiko gakwe gaŵili gacilicose gatambasukwice ni gundana kusonga kwakwe. Piyajendaga, yajendaga mpela likuga ni ngagalawukaga.

¹⁰ Cilicose cakwete ngope mcece syakulekangana: ngope ja mundu pasogolo pakwe, ngope ja lisimba ku mkono wamlyo, ngope ja ng'ombe ku mkono wakumciji, ni ngope ja nyanga kunyuma kwakwe.

¹¹ Mapapiko gakwe gaŵili gacilicose galiji gamatambasukuce ni gundana ni mapapiko gajakwe. Ni mapapiko gane gaŵili gacilicose gawunicilaga cilu cakwe.

¹² Cilicose calolaga mbali syosope mcece, myoyo likugalyo lyajawulaga kulikose kulyasosaga kwawula, pangagalawucila soni munyuma.

¹³ Pasikati pa yiwumbeyo paliji cindu cakuwoneka mpela cenjelele cakolela moto pakwendajenda pasikati pakwe. Motowo waliji wakuŵala nditu, mkati mwakwe mwakopokaga njasi.

¹⁴ Yiwumbeyo yawutukagawutukaga aku naku mpela kumesya kwa njasi.

¹⁵ Pinayilolaga yiwumbe mceceyo, nayiweni yitungulu mcece yili yigundile pasi, ni citungulu cimo pambali pa ciwumbe cilicose.

¹⁶ Yitungulu yosope mcece yaliji yakulandana; soni citungulu cilicose canyesimilaga mpela maganga ga mtengo wapenani, nipo citungulu cilicose cawonekaga mpela cijinjilene ni cijakwe,

¹⁷ myoyo yitungulu yajawulaga mbali jilijose ja mbali mcecesyo pangagalawuka.

¹⁸ Malimu ga yitunguluyo gasyungulilwe ni meso.

¹⁹ Katema kayikwenda yiwumbeyo, nombe yitungulu yajendaga, soni naga yiwumbeyo yikwela mwinani, yitungulu nombe nayo yikusakwela mwinanimo.

²⁰ Yiwumbeyo yajawulaga kulikose kuyasosaga, nombe nayo yitunguluyo yatendaga iyoyo yiyatendaga yiwumbeyo, ligongo yiwumbeyo ni yiyalamulilaga yigudumuyo.

²¹ Ndaŵi jilijose yiwumbeyo piŵajendaga kapena kwima kapena guluka, yitunguluyo yatendaga iyoyopeyo.

²² Kupunda pacanya pa mitwe ja yiwumbeyo capali cindu cakuwoneka mpela msakasa wakunyesimila mnope.

²³ Pasi pa msakasa wakunyesimilawo pajimi yiwumbeyo, cilicose catambasukwile mapapiko gakwe kucijakwe cakuŵandikana naco ni kuwunicila cilu cakwe ni mapapiko gaŵili.

²⁴ Katema kiyagulukaga, napikene lisegwe lya mapapiko gakwe mpela mkokomo wa mesi gejinji gakuwutuka mnope, mpela lisegwe lya likuga lya asilikali ŵangondo, mpela liloŵe lya AMBUJE Mlungu. Ndaŵi jiyalekaga guluka, yagwisyaga mapapiko gakwe,

²⁵ nambope penani pa msakasa wa pa mitwe jawo papikanice lisegwe, yiwumbeyo yili cimile myoyo, mapapiko gawo soni gali cigwicisye.

²⁶ Pacanya pa msakasa wakunyesimila ula capali cindu cine cakuwoneka mpela citengu ca ucimwene cakupanganyikwa ni liganga lya safilo, nipo cicatemi pa citenguco cawonekaga mpela mundu.

²⁷ Mwinani mwa ciwunu mwakwe mwaliji mpela cisyano cakuwala kosekose mpela moto. Pasi pakwe paciwunu cakwe mwapali soni mpela motope basi. Kuŵala kwamacili kwamsyungulile mundujo.

²⁸ Kuŵalako kwawonekaga mpela ukunje wa ula m'mawunde lisiku lijikugwa ula. Amu ni mwele ucimbicimbi wa AMBUJE muwukusawonecela. Pinayiweni yeleyi, naligwisisye, ngope jangu jakwayiye pasi. Kaneko napikene maloŵe ga mundu jwine ali mkuŵeceta.