Esala 9 - Chiyawo Bible

Esala ŵapikene ya malombela sikati ja Ayuda ni ŵandu ŵa mitundu jine

¹ Piyatendekwe yeleyi, acimlongola ŵane ŵa Ciyuda ŵayice kukusalila une kuti, Aisalaeli, ŵakutaga mbopesi, ni Alefi nganalilekanganya acimsyene ni ŵandu ŵa mitundu jine* jiŵandikene ni uweji mpela Akenani, Ahiti, Apelesi, Ayebusi, Aamoni, Amowabu, Aiguputo ni Aamoli, soni akutenda nawo yindu yangalumbana.

² Acalume ŵane ŵa ku Isalaeli alombele acakongwe ŵa yilambo yine, soni ŵakundile ŵanace ŵawo ŵacalume kuti atendeje myoyo, kuti mtundu wa ŵandu ŵakusagulidwa ni Mlungu uwanganicilane ni ŵandu ŵa m'yilamboyo. Acimlongola ni nduna ni ŵapundile kutenda yangalumbanayo.

³ Pinapikene nganiji, napapwile yakuwala ni mkanjo wangu ligongo lya canasa, soni nacuŵile umbo ni ndewu syangu, kaneko natemi pasi ndili jwamgumbalilwe ni canasa mu mtima mwangu.

⁴ Natemi pasi myoyo mpaka ndaŵi jakupeleka mbopesi ja ligulo, nipo ŵandu ŵiŵagajogopaga maloŵe ga Mlungu piŵaweni ungakulupicika wa ŵandu ŵiŵawusile ku ukapolo ŵala, ŵatandite kwika kusongana kwa une.

⁵ Pijakwanile ndaŵi ja mbopesi ja ligulo, najimwice kutyocela mu kudandawula kwangu ndili mbwete yakuwala yangu yepapuceyo, natindiŵele ni kutanda kupopela ndili nyakulile makono gangu kwinani kwa AMBUJE.*

⁶ Natite kuti, “Wawo AMBUJE, Ngutenda soni kuti nyakulile ngope jangu kwa wawo, pakuti yakusakala yetu yitupile mnope soni winji wa ulemwa wetu uyice kwinani.

⁷ Kutyocela mu ndaŵi ja acinangolo ŵetu mpaka sambano jino tuŵele tuli mkulemwa kwejinji. Ali ni ligongo lyakwe uwe, ayimwene ni ŵakutaga mbopesi ŵetu tuŵele tuli mkuwulajidwa, kujigalidwa kwawula ku ukapolo, kusumulidwa katundu ni kutendekasidwa soni, kupelecedwa myala mwa ayimwene ŵa yilambo yine mpela muyikuŵela masiku agano.

⁸ Nambo pakandaŵi keleka, Wawo AMBUJE ŵetu alosisye umbone mtima wawo pakutuleka ŵane ŵa uweji kuti tukajawula ku ukapolo nambo kuti tujinjile ku malo gawo gamaswelaga ni kutupa uwe umi wasambano.

⁹ Pakuti twaliji acikapolo, nambo wawo nganatuleka uwe jikape mu ukapolomo, ŵatulosisye uweji cinonyelo cawo cangamala pameso pa ayimwene ŵa ku Pelesiya, ni kutukunda uwe kuti tukataŵe soni Nyumba ja wawo, ja jili masame, ni kuti uweji tukatame mwakucinjilicisidwa ku Yuda ni ku Yelusalemu.

¹⁰ “Nambo sambano, Wawo AMBUJE, ana uwe cituŵecete cici pitumasile kutenda yangalumbana yosopeyi? Pakuti tukasile soni malamusi gawo,

¹¹ giŵatupele uwe kupitila mwa ŵakulocesya ŵiŵatumicilaga. Jemanjajo ŵatusalile uwe kuti cilambo cimwatupaga uwe caliji cegumbale ni ulemwa ni ŵandu ŵa yitendo yakusakala.

¹² Ŵatukalamwisye soni kuti tukakunda ŵanace ŵetu ŵacalume ni ŵacakongwe kuti alombane ni ŵanace ŵawo, soni tukaŵa nawo pamkamulano uliwose wa malonda, kuti tuŵe ŵamacili ni kulya yakulya yambone ya mcilambomo, ni kwalecela ŵanace ŵetu cilamboci kuti ticiŵe cakupata cawo mpaka kalakala.

¹³ Yosopeyi yitendekwe kwa uweji ligongo lya yitendo yetu yakusakala ni ulemwa wetu, elo tukumanyilila kuti wawo AMBUJE ŵetu atupele uweji cilango camwana kuwanicisya ni winji wa ulemwa wetu soni atukundile ŵane ŵa uweji kuti tukulupuce.

¹⁴ Ana uwe tucikasa soni malamusi ga wawo ni kulombana soni ni ŵandu ŵa mitundu jine ŵakusatenda yakunyalayayi? Naga tukutenda myoyo, wawo tacitutumbilila mwakuti tacitujonanga uwe wosope soni ngasapagwa ni jumo jose jutacisigala ni umi.

¹⁵ AMBUJE, Mlungu jwakusamlambila Aisalaeli, wawo ali ŵagoloka, pakuti uwe tuli ŵakusigala ŵatukulupwice mpela mutuŵelele lelo jino. Tujimi pameso pa wawo, kwiticisya ulemwa wetu pakuti uweji nganituŵa ŵakuŵajilwa kwima pameso pa wawo.”