Esala 8 - Chiyawo Bible

Ŵandu ŵiŵawusile kutyocela ku ukapolo

¹ Aga ni mena ga acimlongola ŵa maŵasa ŵiŵawusile pamo ni une kutyocela ku ukapolo ku Babiloniya kwawula ku Yelusalemu, pa ndaŵi jele Alitakisesi ŵaliji bwanamkubwa:

^2-14 Geleshomu ŵa mwiŵasa lya Finihasi Daniele ŵa mwiŵasa lya Itamala Hatushi mwanace jwa Shekaniya, ŵa mwiŵasa lya Daudi* Sakaliya, ŵa mwiŵasa lya Paloshi, pamo ni ŵandu 150 ŵa mwiŵasa mwakwe (Gapali mena ga mndandanda wa liŵasa lyawo) Eliyehoyenayi mwanace jwa Selahiya, pamo ni ŵandu ŵakwana 200 ŵa mwiŵasa lya Pahati Mowabu Sekaniya mwanace jwa Yahasiyele, pamo ni ŵandu ŵakwana 300 ŵa mwiŵasa lya Satu Ebedi mwanace jwa Yonatani, pamo ni ŵandu ŵakwana 50 ŵa mwiŵasa lya Adini Yeshaya mwanace jwa Ataliya, pamo ni ŵandu ŵakwana 70 ŵa mwiŵasa lya Elamu Sebadiya mwanace jwa Mikaele, pamo ni ŵandu ŵakwana 80 ŵa mwiŵasa lya Shefatiya Obadiya mwanace jwa Yehiyele pamo ni ŵandu ŵakwana 218 ŵa mwiŵasa lya Yowabu Shelomiti mwanace jwa Yosifiya pamo ni ŵandu ŵakwana 160 ŵa mwiŵasa lya Bani Sakaliya mwanace jwa Bebayi pamo ni ŵandu ŵakwana 28 ŵa mwiŵasa lya Bebayi Yohanani mwanace jwa Hakatani pamo ni ŵandu ŵakwana 110 ŵa mwiŵasa lya Asigadi Acimlongola ŵa liŵasa lya Adonikamu ŵaliji Elifeleti, Yeuweli, Shemaya, pamo ni ŵandu ŵakwana 60 ŵa mwiŵasa lya Adonikamu (ŵawusile panyuma pakwe) Acimlongola ŵa liŵasa lya Bigifayi ŵaliji Utayi ni Sakuli, nipo pampepe ni jemanjajo ŵaliji ŵandu ŵakwana 70

Esala akwasagula Alefi ŵakutumicila ku Nyumba ja AMBUJE

¹⁵ Nasongenye ŵandu wosope malo gamo ku Lusulo lwa Ahafa, kutwagonile m'masakasa kwa masiku gatatu. Pandaŵi jinalolaga ŵanduwo, nasimene kuti mwikugamo mwaliji mwana ŵakutaga mbopesipe, nambo Alefi mwaliji mwangali.

¹⁶ Kaneko naŵilasile acimlongola aŵa: Eliyesa, Aliyele, Shemaya, Elinatani, Yalibu, Elinatani, Natani, Sakaliya, Meshulamu, pamo ni aciŵalimu ŵaŵili aŵa: Yoiyalibu ni Elinatani.

¹⁷ Natumile jemanjaji kwa Ido, juŵaliji mlongola jwa malo gakolanjidwa Kasifiya kuti akamwusye jwalakwejo pamo ni acalongo acimjakwe ŵakutumicila ku Nyumba ja AMBUJE kuti atutumicisye uwe ŵandu ŵakuti atumicileje ku Nyumba ja AMBUJE.

¹⁸ Myoyo kupitila mu umbone mtima wa Mlungu jwetu, Ido ŵatutumicisye mundu jwalunda lina lyakwe Shelebiya, juŵaliji jwa ci Lefi jwa mwiŵasa lya Mali. Jwalakweju ŵayice pamo ni ŵanace ŵakwe ni acalongo acimjakwe, wosope ŵapali likumi kwisa msano ni ŵatatu.

¹⁹ Ido pamo ni acalongo acimjakwe ŵakutumicila ku Nyumba ja AMBUJE, ŵatutumicisye soni Hashabiya ni Yeshaya ŵa mwiŵasa lya Melali pamo ni acalongo acimjawo ŵakwana makumi gaŵili.

²⁰ Kupwatika pelepa, ŵapali soni acalume ŵakutumicila ku Nyumba ja AMBUJE ŵakwana 220 ŵele acinangolo ŵawo ŵasagulidwe ni Mwenye Daudi pamo ni nduna syawo kuti ŵakamusyeje Alefi. Ŵandu wosopeŵa ŵalembedwe pakukuya mena gawo.

Esala akwalongolela ŵandu kupopela ni kulijima kulya

²¹ Ku Lusulo lwa Ahafa kula, nalamwile kuti uwe wosope tulijime kulya, ni kulinondiya twacimsyewe pameso pa Mlungu jwetu ni kumŵenda jwalakwejo kuti atulongolele pa ulendo wetu ni kutucinjilicisya uwe, ŵanace ŵetu ni katundu jwetu josope.

²² Pakuti syandesile soni kuti naŵende mwenye kuti atupe likuga lya asilikali ŵakwenda pasi, ni ŵane ŵakwela pa mahaci kuti atucinjilicisye uwe kwa amagongo ŵetu pa ulendowu. Twaliji tuli tumsalile kala mwenyejo kuti Mlungu jwetu akusapeleka upile kwa jwalijose jwakukulupilila mwa jwalakwejo, nambo soni akusiŵatumbilila ŵandu ŵakusakana kumpikanila jwalakwejo.

²³ Myoyo twalijimile kulya ni twapopesile kuti Mlungu atucinjilicisye uwe, nipo jwalakwejo ŵapikene mapopelo getu.

Mituka jakupeleka ku Nyumba ja AMBUJE

²⁴ Kaneko nasagwile acimlongola ŵa ŵakutaga mbopesi mena gawo galiji Shelebiya, Hashabiya, ni acalongo acimjawo ŵane ŵakwana likumi.

²⁵ Napimile silifa,* golidi,* ni yida ya ku kicini yele bwanamkubwa, apungu ni nduna syakwe, ŵandu ŵa ku Isalaeli ŵayipelece kuti yikamulisidwe masengo ku Nyumba ja AMBUJE, nipo Une nayipelece kwa ŵakutaga mbopesi.

^26-27 Ayi ni yinapele jemanjajo: silifa jwa matani makumi gaŵili ni gaŵili yida ya kukicini ya silifa ya makilogalamu 70 golidi jwakwana makilogalamu 3,400 mbale sya golidi syakwana makumi gaŵili syakusitopa ciŵandika makilogalamu msano ni gatatu ni hafu nambo soni yida yiŵili ya kukicini ya cisyano cakunyesimila ya mtengo wapenani mpela golidi

²⁸ Kaneko nasalile ŵakutaga mbopesiwo kuti, “Jemanja mli ŵakusagulidwa pameso pa AMBUJE, Mlungu juŵamlambilaga acinangolo ŵenu, myoyo soni yida ya golidi ni silifayi yili yakusagulika ya AMBUJE yiyapelecedwe kwa jwalakwejo mpela mtuka wakupeleka mwa lisosa lya mundu jwalijose.

²⁹ Mjisamale ni kujisunga cenene mitukaji mpaka mkayice ku Yelusalemu. Kaneko mkajipime mitukaji mkati mwa yipinda ya Nyumba ja AMBUJE pameso pa ŵakutaga mbopesi, Alefi, ni acimlongola ŵa maŵasa ga Aisalaeli.”

³⁰ Myoyo ŵakutaga mbopesi ni Alefi ŵala ŵapocele silifa, golidi ni yida ya kukicini yila kuti ajawule nayo ku Yelusalemu ku Nyumba ja AMBUJE jwetu.

Kuwujila ku Yelusalemu

³¹ Pa lisiku lya 12 lya mwesi wandanda, twatyosile ku Lusulo lwa Ahafa nipo twawutandite ulendo wakwawula ku Yelusalemu. AMBUJE ŵaliji ni uwe nipo ŵatucinjilicisye kwa amagongo ŵetu ni kwa ŵandu ŵakutujuŵilila mwitala.

³² Pitwayice ku Yelusalemu, twapumwileko masiku gatatu.

³³ Pa lisiku lya mcece twajinjile m'Nyumba ja AMBUJE, mutwapimile silifa, golidi, ni yida ya ku kicini yila nipo twayipelece kwa jwakutaga mbopesi Melemoti mwanace jwa Uliya. Jwalakwejo ŵaliji pamo ni Eliyesa mwanace jwa Finihasi, ni Alefi ŵaŵili ŵakuyicisyaŵa: Yosabadi mwanace jwa Yeswa ni Nowadiya mwanace jwa Binuyi.

³⁴ Yosope yene ŵayiŵalasile, ŵayipimile ni kuyilemba m'buku.

³⁵ Pandaŵi jelejo ŵandu ŵiŵawusile kutyocela ku ukapolo, ŵapelece mbopesi syakutinisya kwa Mlungu jwakusamlambilaga Aisalaeli. Jemanjajo ŵapelece m'malo mwa Aisalaeli wosope ng'ombe sya mikambako 12, ngondolo sya mikambako 96 ni ŵanace ŵangondolo 77; ŵapelece soni acitonde likumi ni ŵaŵili ŵambopesi jakuŵenda cikululucilo ca ulemwa wawo. Yinyama yosopeyi yaliji mbopesi jakutinisya jakupeleka kwa AMBUJE.

³⁶ Jemanjajo ŵajigele soni cikalata cakutyocela kwa mwenye nipo ŵajile kukucipeleka kwa acibwanamkubwa, ni kwa ŵakulolela dela ja kungapilo lyuŵa pesi pa Lusulo lwa Yufuleti, ŵele panyuma pakwe ŵakamwisye Ayuda ni masengo ga pa Nyumba ja AMBUJE.