Esala 7 - Chiyawo Bible

Esala akwika ku Yelusalemu

¹ Piyamasile yaka yejinji, pa ndaŵi jiŵaliji Alitakisesi mwenye jwa ku cilambo ca Pelesiya, jwapali mundu lina lyakwe Esala. Jwalakweju ŵaliji mwanace jwa Selaya, soni ŵaliji cisukulu ca Asaliya. Acinangolo ŵakwe ŵane ŵaliji Hilikiya,

² Shalumu, Sadoki, Ahitubi,

³ Amaliya, Asaliya, Melayoti,

⁴ Selahiya, Usi, Buki,

⁵ Abishuwa, Finihasi, Eliyesa mwanace jwa Aloni ŵakutaga mbopesi.

^6-7 Esala ŵaliji ŵalijiganye mnope ya malamusi giŵapelece AMBUJE,* Mlungu juŵamlambilaga Aisalaeli kwa Mose.* Pakuŵapo kuti AMBUJE ŵampele upile Esala, Mwenye Alitakisesi ŵampaga jwalakwejo yesope yiŵaŵendaga. Mcaka ca msano ca kulamulila kwa Alitakisesi, Esala ŵawutandite ulendo kutyoka ku Babiloniya kwawula ku Yelusalemu pamo ni Ayuda ŵane kupwatikapo ŵakutaga mbopesi, Alefi, ŵakwimba nyimbo, acilonda ŵa ku Nyumba ja AMBUJE ni ŵakutumicila.

^8-9 Nipo ŵajile kwika ku Yelusalemuko ni cikamucisyo ca Mlungu pa mwesi wa msano wa caka ca msano ni jiŵili pa ndaŵi jiŵalamulilaga Mwenye Alitakisesi. Ŵatyosile ku Babiloniya pa lisiku lyandanda lya mwesi wa msano, ŵajile kwika ku Yelusalemu mwakulongoleledwa ni Mlungu.

¹⁰ Esala ŵasimicisye mnope mu mtima mwakwe yakulijiganya Malamusi ga AMBUJE, ni kugakuya, soni kwajiganya Aisalaeli wosope.

Cikalata ciŵapelece Mwenye Alitakisesi kwa Esala

¹¹ Aci ni cikalata ciŵapelece Mwenye Alitakisesi kwa jwakutaga mbopesi Esala, juŵaliji soni mlembela jwamlijiganye cenene ya malamusi ni misyungu jiŵapelece AMBUJE kwa Aisalaeli:

¹² “Cikalataci cikutyocela kwa une Mwenye Alitakisesi, ngulembela kwa m'mwejo jwakutaga mbopesi Esala, soni jwamlijiganye cenene Malamusi ga AMBUJE ŵakwinani.

¹³ “Sambano ngulamula kuti, mundu jwalijose jwa ku Isalaeli, ŵakutaga mbopesi ni Alefi ŵakutama mcilambo mwangu nambo mwalisosa lyakwe akusaka kuti ajawule ku Yelusalemu, akukomboleka kulongana namwe.

¹⁴ Une, pamo ni nduna syangu msano ni siŵili tukamulene kuti tumtume m'mwejo, mjawule ku Yuda ni ku Yelusalemu, kuti mkalole naga ŵandu ŵa kweleko akugapikanila Malamusi ga AMBUJE, Mlungu jwenu giŵagapelece kupitila mwa m'mwejo.

¹⁵ Patimjawuleje, mjigale silifa* ni golidi* yitukusaka une pamo ni nduna syangu kuja kupeleka kwa Mlungu jwakusamlambila Aisalaeli, jwele Nyumba jakwe jili ku Yelusalemu.

¹⁶ Mjigale soni golidi ni silifa josope jutimumsimane mcilambo cosope ca Babiloni, ni yosope yitacipeleka ŵandu pamo ni ŵakutaga mbopesi mwa lisosa lyawo, ku Nyumba ja AMBUJE ku Yelusalemu.

¹⁷ “Timsikamulisye cenene masengo mbiyasi, pakusuma ng'ombe sya mikambako, ngondolo sya mikambako ni ŵanace ŵangondolo, mbopesi sya mbeju syana songolo ni mbopesi sya finyo, kaneko timyipelece yeleyi kuti tiyiŵe mbopesi pa malo gakupelecela mbopesi ga ku Nyumba ja AMBUJE ku Yelusalemu.

¹⁸ Naga silifa ni golidi akusigala, m'mwejo pamo ni acalongo acimjenu mkukomboleka kumkamulisya masengo mumkusacila, mwakulingana ni lisosa lya Mlungu jwenu.

¹⁹ Yida yampele jemanjayi mkayikamulisyeje masengo pakutumicila m'Nyumba ja AMBUJE, ni mkayipelece kwa Mlungu ku Yelusalemu.

²⁰ Naga mkusaka kusuma cindu cilicose ca m'Nyumba ja AMBUJE, mkukomboleka kujigala mbiya simkusisaka kutyocela ku msaku wa yipanje ya mwenye.

²¹ “Une Mwenye Alitakisesi, ngwalamula ŵandu wosope ŵakusunga yipanje mbali sya pesi pa Lusulo lwa Yufuleti kuti ampeje mwacitema jwakutaga mbopesi Esala, mundu jwamlijiganye cenene ya Malamusi ga AMBUJE ŵakwinani, cindu cilicose citamŵendeje jemanja.

²² Atamose pasacikweje makilogalamu ga silifa 3,400, makilogalamu 10,000 ga tiligu, malita 2,000 ga finyo, malita 2,000 ga mawuta ga olifi* ni njete jejinji, yosopeyo myipeleceje mutiyisosekwele.

²³ Mpeleceje mwacitema yosope yalamwile Mlungu jwakwinani, soni yitendekweje mwacitema ku Nyumba ja AMBUJE, kogopela kuti lutumbilo lwawo lukaŵa pa une ni ŵanace ŵangu ŵitacilamulilaga pasogolo pangu.

²⁴ Tukusaka soni kum'manyisya kuti nganikuŵa kwakundidwa kuti mwakomesyeje msongo uliwose ŵakutaga mbopesi, Alefi, ŵakwimba nyimbo, acilonda, kapena jwalijose jwakamula masengo ku Nyumba ja AMBUJE.

²⁵ “M'mwe Esala, mkamulisye masengo lunda luŵampele Mlungu jwenu, nipo msagule ŵandu ŵakuti ajendesyeje yindu ni ŵakulamula kuti ŵalamulileje ŵandu wosope ŵakutama pesi cakungapilo lyuŵa kwa Lusulo lwa Yufuleti, ŵandu ŵakwe ŵakugapikanila malamusi ga mlungu jwenu. Ŵandu ŵakakugamanyilila malamusiwo mwajiganye.

²⁶ Jwalijose jwakakugapikanila malamusi ga Mlungu jwenu kapena malamusi ga mwenye, jwalakwejo akwenela kupegwa cilango cakuwulajidwa, kapena kwatyosya mcilambomo, kapena kusumulidwa katundu jwakwe, kapena kumjawusya ku ukayidi.”

Esala akumlumba Mlungu

²⁷ Esala ŵatite, “Ngwalumba AMBUJE, Mlungu jwa acinangolo ŵetu! Aŵisile lunda lwamti myiyi mu mtima wa mwenye kuti apelece ucimbicimbi ku Nyumba ja AMBUJE ku Yelusalemu.

²⁸ Jwalakwe soni ni juŵalosisye cinonyelo cakwe cangamala kwa une kuti mwenye pamo ni nduna syakwe ni acimlongola ŵakwe wosope asalalile une mtima. AMBUJE Mlungu jwangu ŵangamucisye une, nipo naŵele jwakupakombola kwasonganya acimlongola ŵajinji ŵa Aisalaeli kuti awujile ni une ku Yelusalemu.”