Esala 6 - Chiyawo Bible

Lilamusi lya Mwenye Sailasi likusimanikwa soni

¹ Kaneko Mwenye Daliyasi ŵatesile lilamusi nipo kuwungunya kwatendekwe ku Babiloniya m'nyumba syakusunjila yipanje ni m'mabuku gakwayana ni mbili ja kalakala.

² Pambesi pakwe cipukutu ca yakulembedwa casimanikwe mu msinda wa Ekibatana ku likulungwa lya mbali ja Mediya, nipo ŵalembilemo maloŵe gakuyicisyaga:

³ “Mcaka candanda ca ucimwene wa Mwenye Sailasi, jwalakwe ŵalamwile kuti Nyumba ja AMBUJE ku Yelusalemu jitaŵidwe kuti apelecelejemo mbopesi ni kutinicisyako yakupeleka. Msingu wa Nyumbajo uŵe mamita 27 nipo mcijipi mwakwe muŵe soni mamita 27.

⁴ Tataŵe misela jitatu ja maganga gekulungwa ni msela umo wa matabwa, nipo mbiya syakulipila pa masengo gosopega sijigalidweje kutyocela mu msaku wa ucimwene.

⁵ Yida ya ku kicini ya golidi* ni silifa* ya m'Nyumba ja AMBUJE yiŵajigele Nebukadinesa kutyoka nayo ku Nyumba ja AMBUJE ni kuja nayo ku Babiloni, ayiwusye yosopeyo yijawule ku Nyumba ja AMBUJE ku Yelusalemu, akaciwucisye cilicose pa malo gakwe m'Nyumbamo.”

Mwenye Daliyasi akulamula kuti masengo gapelenganye

⁶ Kaneko Mwenye Daliyasi ŵajanjile mwamti myi: “Bwanamkubwa Tatenayi jwa kungapilo lyuŵa pesi pa Lusulo lwa Yufuleti, Setali Bosenayi, pamo ni acimjawo kweleko, akwenela kutyokako.

⁷ Alece kusokonesya masengo gakutaŵa Nyumbaji; amlece soni bwanamkubwa jwa ku Yuda ni acimlongola ŵa kweleko kuti ataŵe soni Nyumba ja AMBUJE pa malo gakwe gakala.

⁸ Sambano Une ngumlamula kuti jemanja mwakamucisye acimlongola ŵa Ayudaŵa pakutaŵa Nyumba ja AMBUJEJI. Jemanjajo alipidweje mwacitema kutyocela mu msaku wa ucimwene wa mbiya sya msongo wa ku mbali ja pesi pa Lusulo lwa Yufuleti.

⁹ Cilicose cakusosekwa mpela ŵanace ŵa ng'ombe, ngondolo sya mikambako, kapena ngondolo syakusipeleka mpela mbopesi jakutinisya ja kwa Mlungu jwa kwinani, tiligu, njete, finyo, kapena mawuta ga olifi,* mpela mutayisacile ŵakutaga mbopesi ŵa ku Yelusalemu, mkalepelaga kwapa yeleyo lisiku ni lisiku.

¹⁰ Yeleyi yitendekweje kuti jemanja mpeleceje mbopesi jakumnonyelesya Mlungu jwakwinani ni kumbopelela soni une ni ŵanace ŵangu.

¹¹ Ngutenda lilamusi lyakuti, naga mundu jwalijose akucenga yindamwileyi, mgomba tiwucijigalidwa pa nyumba jakwe ni kuwusongola mbali jimo ni kumkomela pa mgombapo, nipo nyumba jakwejo tijiciŵa citutu.

¹² Ngumŵenda Mlungu juŵasagwile msinda wa Yelusalemu kuti gaŵe malo gakumlambila jwalakwejo, amtyosye mwenye kapena mundu jwalijose jutaciwanicisya kucenga yeleyi kapena konanga Nyumba ja AMBUJE ja jili ku Yelusalemu. Une Daliyasi, ngupeleka malamusiga, nipo ngukulupilila kuti jwalijose tagakuye mwakugasamalila cenene.”

Nyumba ja AMBUJE jikupelecedwa

¹³ Kaneko bwanamkubwa Tatenayi jwa mbali ja kungapilo lyuŵa kwa Lusulo lwa Yufuleti, Setali Bosenayi, ni acimjawo ŵagakuyisye malamusigo mwakusamalila mpela muŵalamulile Mwenye Daliyasi.

¹⁴ Acimlongola ŵa Ayuda ŵagajawisye msogolo masengo gakutaŵa Nyumba ja AMBUJE jila, mwakulimbisidwa mitima ni ŵakulocesya Hagai ni Sakaliya mwanace jwa Ido. Myoyo jemanjajo ŵamalisisye masengo gawo gakutaŵa Nyumba ja AMBUJE, mpela muŵalamulile Mlungu jwakusamlambilaga Aisalaeli, ni pakukuya soni malamusi ga Mwenye Sailasi, Daliyasi ni Mwenye Alitakisesi ŵa ku Pelesiya.

¹⁵ Nyumbaji ŵajimalisisye kutaŵa pa lisiku lyatatu lya mwesi wa Adala* mcaka ca msano ni cimo ca ucimwene ŵa Mwenye Daliyasi.

¹⁶ Ŵandu ŵa ku Isalaeli, ŵakutaga mbopesi, Alefi ni ŵandu ŵane wosope ŵiŵaliji ali awusileko ku ukapolo ŵaliji wakusengwa nipo ŵasangalele piŵapelekaga Nyumba ja AMBUJE.

¹⁷ Piŵatendaga msyunguwu, ŵandu ŵapelece ng'ombe sya mikambako 100, ngondolo sya mikambako 200, ŵanace ŵangondolo 400, ni acitonde likumi ni ŵaŵili ŵambopesi ja kuŵenda cikululucilo ca ulemwa pa ŵandu wosope pakukuya ciŵalanjilo ca ngosyo sya ku Isalaeli.

¹⁸ Nipo kaneko ŵaŵisile ŵakutaga mbopesi ni Alefi pa masengo gawo gakutumicila m'Nyumba ja AMBUJE ku Yelusalemu, mpela muŵayilembele mu buku ja Mose.

Pasaka

¹⁹ Ŵandu ŵiŵawusile kutyocela ku ukapolo ŵatesile Pasaka* pa lisiku lya 14 lya mwesi wandanda.

²⁰ Ŵakutaga mbopesi ni Alefi wosope ŵaliswejesye, nipo ŵaliji ŵaswela. Myoyo Alefi ŵawulajile mwanace jwangondolo jwa Pasaka ŵandu wosope ŵiŵawusile ku ukapolo, ŵakutaga mbopesi acimjawo ni jemanjajo acimsyene.

²¹ Mbopesi ja ngondolo ja Pasakajo jalilidwe ni Aisalaeli wosope ŵele ŵaŵawusile kutyocela ku ukapolo, ni wosope ŵiŵalesile misyungu jakusakala ja ŵandu ŵaŵatamaga mcilambomo ni cakulinga cakuti ŵalambileje AMBUJE, Mlungu juŵamlambilaga Aisalaeli.

²² Kwa masiku msano ni gaŵili ŵandu ŵasangalalile cindimba ca mkate wangali cakusasaŵilisya,* pakuti AMBUJE ŵasengwesye jemanjajo ni kuwupitikusya mtima wa mwenye jwa ku Asiliya, mwakuti jwalakwejo ŵakamucisye jemanjajo pa masengo gawo gakutaŵa soni Nyumba ja AMBUJE, Mlungu juŵamlambilaga Aisalaeli.