Esala 4 - Chiyawo Bible

Amagongo ŵakusaka kulekasya kutaŵa Nyumba ja AMBUJE

¹ Amagongo ŵa ngosyo sya Yuda ni Benjamini piŵapikene kuti ŵandu ŵawusile ku ukapolo ŵala akutaŵa Nyumba ja AMBUJE, jwakusamlambila Aisalaeli,

² jemanjajo ŵajile kwa Selubabele ni kwa acimlongola ŵa maŵasa, ni ŵasalile jemanjajo kuti, “Atukunde uwe kuti twakamusye jemanja kutaŵa nawo Nyumba ja AMBUJE, pakuti uwe tukusamlambila Mlungu jujojo mpela mwakusatendela jemanja, nipo tuŵele tuli mkupeleka mbopesi kwa jwalakwejo kutandilila ndaŵi ja Mwenye Esalahadoni jwa ku Asiliya, juŵatutumisye uwe kukutama akuno.”

³ Nambo Selubabele, Yeswa, ni acimlongola ŵa maŵasa ŵajanjile kuti, “Uwe ngatukusaka cikamucisyo ca jemanja pa masengo gakwataŵila nyumba AMBUJE Mlungu jwetu, nambo uwe acimsyewe citwataŵile Nyumba AMBUJE, Mlungu jwakusamlambilaga Aisalaeli, mpela muŵatulamulile Mwenye Sailasi jwa ku Pelesiya.”

⁴ Kaneko ŵandu ŵiŵatamaga mcilambomo ŵalinjile kwajasisya mitima ni kwajogoya Ayuda kuti alece masengo gakutaŵago.

⁵ Ŵalembile soni masengo acakulungwakulungwa ŵane kuti alepelesye cakulinga cawo pa masengogo pa ndaŵi jiŵalamulilaga Mwenye Sailasi ni pa ndaŵi ja Mwenye Daliyasi jwa ku Pelesiya.

Akwalekasya kutaŵa msinda wa Yelusalemu

⁶ Pandaŵi jiŵatandite Ahasuwelo kulamulila cilamboco, amagongo ŵala ŵalembile cikalata cakwalaŵila ŵandu ŵa ku Yuda ni ku Yelusalemu.

⁷ Myoyo pa ndaŵi jiŵalamulilaga Mwenye Alitakisesi jwa ku Pelesiya, Bishilamu, Mitiledati, Tabele ni acimjakwe ŵane wosope, ŵalembile nombe nawo cikalata cakwawula kwa Mwenye Alitakisesi. Cikalataco calembedwe mu ciŵeceto ca m'Cialamu, nipo pakuciŵalanga cikalataco ŵacigopolelaga.

⁸ Nombe nawo Lehumu juŵaliji bwanamkubwa ni Shimushayi juŵaliji mlembela, ŵalembile cikalata kwa Mwenye Alitakisesi cakwalaŵila ŵandu ŵa ku Yelusalemu mwakuyicisyamu:

⁹ “Cikalataci cikutyocela kwa bwanamkubwa Lehumu, mlembela Shimushayi, pamo ni acimjawo wosope, kupwatikapo ŵakulamula, nduna ni acakulungwa ŵane, ŵandu ŵa ku Pelesiya, ku Eleki, ku Babiloni,* ni ku Susa, mcilambo ca Elamu,

¹⁰ pamo ni mitundu jine ja ŵandu jiŵajisamisye Ashubanipala jwamkulungwa ni jwakupikanika jula, ni kuja kukujitamika m'misinda ja Samaliya ni malo gane mbali jine jajili kungapilo lyuŵa pesi pa Lusulo lwa Yufuleti.”

¹¹ Aga ni maloŵe gigaliji mcikalatamo: “Ŵakucimbicikwa Mwenye Alitakisesi, uwe ŵakutumicila ŵawo ŵakutyocela mbali ja pesi pa Lusulo lwa Yufuleti, candanda tukwapa moni.

¹² “Mwenye, tukusaka kuti wawo amanyilile kuti Ayuda ŵiŵayice akuno kutyocela kweleko, ajile kukutama ku Yelusalemu. Kweleko akutaŵako soni msinda ŵakwimucila ni ŵangalumbana ula. Akumalisya kutaŵa mapupa gakwe ni kulinganya yilimbilimbi yakwe.

¹³ Mwenye, wawotu akwenela kumanyilila kuti naga akuwutaŵa msinda welewu ni kumalisya kutaŵa mapupa gakwe, ni kuti Ayuda tacileka kukoma msongo uliwose, nipo mbiya syakwinjila mu msaku wa mwenye tisicinandipa.

¹⁴ Myoyo pakuti uwe tukusalya nawo ya m'nyumba ja mwenye, ngaŵa yambone kuti tugambeje kuyilola yindu yeleyi yili mkutendekwa, ali ni ligongo lyakwe tukutumisya maloŵega kwa wawo mwenye kuti ayimanyilile,

¹⁵ ni cakulinga cakuti kuwungunya kutendekwe m'buku jakala ja acinangolo ŵetu. M'buku jakalajo tacisimana ni kuŵalanga kuti msinda welewo uli wakwimucila, wakwasawusya ayimwene ni nduna sya mbali jelejo. Msindawu uŵele uli mkutenda yakwimucila kutandilila kalakala. Ali ni ligongo lyakwe msindawo ŵawusandwisye kuŵa masame.

¹⁶ Tukwamanyisya wawo mwenye kuti naga msinda welewu ukutaŵidwa ni kumalisya kutaŵa mapupa gakwe, ni kuti wawojo ngasapakombola kulamulila mbali ja kungapilo lyuŵa pesi pa Lusulo lwa Yufuleti.”

¹⁷ Mwenye Alitakisesi ŵajanjile mwamti myi: “Bwanamkubwa Lehumu ni mlembela Shimushayi, ni acimjawo wosope ŵakutama ku Samaliya, ni mbali ja pesi pa Lusulo lwa Yufuleti, une ngupeleka moni.

¹⁸ “Cikalata cimwatumisye jemanja ciŵalanjidwe mwakupikanika ni kugopoleledwa cenene pameso pangu.

¹⁹ Une pinalamwile kuti nganiji jiwungunyidwe, pasimanikwe kuti ŵandu ŵa mu msinda wa Yelusalemu ŵajimucile ayimwene kalakala, nipo ya upandu ni yakwimucila yiŵele yili mkutendeka mu msindamo.

²⁰ Ayimwene ŵamacili ŵaŵele ali mkulamulila ku Yelusalemu ni mbali jesope jene ja pesi pa Lusulo lwa Yufuleti, nipo ŵapocelaga kasitomu ni msongo pa kandu kane kalikose.

²¹ Sambano ngusaka kuti jemanja mwalamule ŵanduwo kuti alece kutaŵa soni msindawo, mpaka pa ndaŵi jitinjakunda jemanjajo.

²² Myitende yeleyi mwakwanguya, kuti cilicose cakogoya cikayika kwa une.”

²³ Picaŵalanjidwe cikalata ca Mwenye Alitakisesi pameso pa bwanamkubwa Lehumu, ni mlembela Shimushayi, ni acimjawo, jemanjajo ŵapite mwacitema ku Yelusalemu ni kwalekasya Ayuda ŵala mwamacili kuti alece masengo gakutaŵa soni msindawo.

Masengo gakutaŵa Nyumba ja AMBUJE gakutanda soni

²⁴ Kaneko masengo gakutaŵa Nyumba ja AMBUJE gajimi mpaka mcaka caŵili ca ucimwene ŵa Daliyasi, mwenye jwa ku Pelesiya.