Esala 3 - Chiyawo Bible

Kulambila kwatandite soni

¹ Pa mwesi wa msano ni jiŵili ŵandu ŵa ku Isalaeli ŵaliji ali atamilicice m'misinda jawo, ŵanduwo ŵasongene ni cakulinga cimpepe,

² nipo Yeswa mwanace jwa Yosadaki, pamo ni ŵakutaga mbopesi ŵane, ni Selubabele mwanace jwa Sheyatiyele, pamo ni acalongo acimjakwe ŵataŵile soni malo gakupelecela mbopesi kwa Mlungu jwa Aisalaeli. Kaneko ŵapelecelagapo mbopesi syakutinisya pakukuya yiyalembedwe mu buku ja malamusi ga Mose, mundu jwa Mlungu jula.

³ Atamose kuti ŵandu ŵiŵawusile ku ukapolo ŵala ŵaliji mkwajogopa ŵandu ŵa ngosyo sine sya mcilambomo, jemanjajo ŵataŵile malo gakupelecela mbopesigo pa malo gakwe gakala, nipo ŵapelekaga mbopesi syakutinisya kwa AMBUJE* pa malopo, kundaŵi ni ligulo lililyose.

⁴ Ŵandu ŵagakuyaga malamusi gakusangalalila cindimba ca masakasa* nipo ŵapelekaga mbopesi syakutinisya masiku gosope pakukuya ciŵalanjilo cicasosekwaga lisiku ni lisiku.

⁵ Panyuma pakwe ŵapelekaga mbopesi syakutinisya mpela mwa masiku gosope, mbopesi syakupeleka pakuwoneka kwa mwesi, ni pa yindimba yosope yakwalambila AMBUJE, ni mbopesi syosope syakupelecedwa mwa lisosa kwa AMBUJE.

⁶ Atamose kuti masengo gakutaŵa soni Nyumba ja AMBUJE galiji mkanigatande, ŵandu ŵatandite kupeleka mbopesi syakutinisya kwa AMBUJE pa lisiku lyandanda lya mwesi wa msano ni jiŵili.

Masengo gakutaŵa soni Nyumba ja AMBUJE gakutanda

⁷ Ŵandu ŵapelece mbiya sya kwalipila ŵandu ŵakusepa maganga ni makalipentala. Ŵatumisye soni yakulya, finyo, ni mawuta ga olifi* kwa ŵandu ŵa ku misinda ja Sidoni ni Taya kuti akacenganyeje ni yitela ya mikungusa ja ku Lebanoni. Yitelayo ŵayice nayo kupitila pa nyasa mpaka kwika nayo ku msinda wa Yopa. Yosopeyi yatendekwe pakukuya ukumu wa Mwenye Sailasi jwa ku Pelesiya.

⁸ Pa mwesi waŵili ŵa caka caŵili pa ndaŵi jiŵayice ku Yelusalemu pa masame pijaliji Nyumba ja AMBUJE ja kalakala, Selubabele mwanace jwa Sheyatiyele ni Yeswa pamo ni acalongo acimjakwe ŵiŵasigele, ŵakutaga mbopesi, Alefi ni ŵandu wosope ŵiŵaliji ali ayice kutyocela ku Yelusalemu kutyocela ku ukapolo ŵagatandite masengo. Ŵasagwile Alefi, kutandilila ŵa yaka 20 mpaka kupunda pelepo kuti aloleleje masengo gakutaŵa Nyumba ja AMBUJE.

⁹ Alefi ŵaŵaliji ŵakulolela masengo gosopego ŵaliji Yeswa ni ŵanace ŵakwe, acalongo acimjakwe, Kadimiyele ni ŵanace ŵakwe (yisukulu ya Hodafiya) ni ŵanace ŵa Henadadi ni Alefi pamo ni ŵanace ŵawo ni acalongo acimjawo.

¹⁰ Amisili ŵakutaŵa nyumba ŵala piŵataŵile yilimbilimbi ya Nyumba ja AMBUJE, ŵakutaga mbopesi ŵayice ali mkwimba malipenga ali awete mikanjo jawo, nipo Alefi ŵa mwiŵasa lya Asafu ŵayice ali mkwimba micekece, ni kwalumbaga AMBUJE pakukuya yiŵaŵecete Mwenye Daudi* jwa ku Isalaeli.

¹¹ Jemanjajo ŵajimbaga mwakupocelangana, mwakwalumba ni mwakwatogolela AMBUJE, acitiji kuti, “AMBUJE ali ŵambone, soni cinonyelo cawo pa Aisalaeli cili cangamala.” Jwalijose ŵagumisile mnope mwamacili gakwe gosope, piŵalumbaga AMBUJE, ligongo lyakuti yilimbilimbi ya Nyumba ja AMBUJE jaliji jili mkutaŵidwa.

¹² Nambo ŵakutaga mbopesi ŵajinji ŵiŵaliji ŵacikulile, Alefi ni acimlongola ŵa maŵasa ŵiŵajiweni Nyumba jandanda ja AMBUJE, ŵalisile mwakugumila piŵajiweni yilimbilimbi ya Nyumbaji yili mkutaŵidwa. Nambo ŵane ŵajinji ŵagumilaga mwa lukondwa.

¹³ Myoyo pangali mundu juŵapakombwele kulekanganya sikati ja masegwe gakugumila mwa lukondwa ni masegwe ga kulila, ligongo lyakuti ŵanduwo ŵagumilaga mnope mwakuti masegwe ga kubangula gapikanikaga pakutalicila.