Esala 1 - Chiyawo Bible

Mwenye Sailasi ŵalamwile Ayuda kuti awujile

¹ Mcaka candanda ca Sailasi mwenye jwa ku Pelesiya, AMBUJE* ŵakwanilisye yiŵaŵecete kupitila mwa jwakulocesya* Yelemiya. AMBUJE ŵaŵisile nganisyo mu mtima mwa Sailasi kuti ajenesye utenga wa pakamwa ni wakulemba kuti ukaŵalanjidwe mu ucimwene wakwe wosope wakuti:

² “Sailasi mwenye jwa ku Pelesiya akuŵeceta kuti, AMBUJE, Mlungu jwakwinani ambisile une kuŵa mwenye jwa cilambo cosope capasi, soni andamwile une kuti nataŵile Nyumba ku Yelusalemu mcilambo ca Yuda.

³ AMBUJE aŵe ni jemanja wosope ŵamli ŵandu ŵakwe, nipo jwalijose jwa jemanja ajawule ku Yelusalemu mcilambo ca Yuda kuti akataŵe Nyumba ja AMBUJE, Mlungu jwa Aisalaeli jwakusalambilidwa ku Yelusalemu.

⁴ Naga ŵandu ŵakwe ŵakusigalawo akusaka cikamucisyo kuti awujile, acimsyene ŵa cilamboco ŵape jemanjajo cikamucisyoci. Ŵape silifa* ni golidi,* katundu ni yinyama yakunyakula katundu, ni yakupeleka mwa lisosa lyawo yakuti akayipelece ku Nyumba ja AMBUJE ku Yelusalemu.”

⁵ Kaneko acimlongola ŵa maŵasa ga lukosyo lwa Yuda ni lwa Benjamini, ŵakutaga mbopesi, Alefi ni ŵandu wosope ŵiŵaŵilanjidwe ni AMBUJE ni kwaŵika nganisyo m'mitima mwawo, ŵaliji cile kwawula ku Yelusalemu kukutaŵa Nyumba ja AMBUJE.

⁶ Ŵandu wosope ŵiŵatamaga mwakuŵandikana nawo ŵakamucisye jemanjajo pakwapa yindu yejinji mpela yida ya ku kicini ya silifa, golidi, katundu, mituka ja mtengo wapenani ni yakupeleka ya ku Nyumba ja AMBUJE.

⁷ Mwenye Sailasi ŵakopwesye mbale ni makapu ga ku Nyumba ja AMBUJE yiŵayijigele Mwenye Nebukadinesa kutyoka nayo ku Yelusalemu ni kuja kuyiŵika ku nyumba ja milungu jawo.

⁸ Mwenye Sailasi jwa ku Pelesiya ŵayikopwesye yeleyi ni kuyipeleka kwa Mitiledati juŵaliji jwakusunga yipanje yawo, nipo ŵayiŵalasile pameso pa Sheshibasala bwanamkubwa jwa ku Yuda.

^9-10 Ciŵalanjilo cakwe caliji myi: mbale sya yakupeleka sya golidi 30 mbale sya yakupeleka sya silifa 1,000 mbale sine 29 mbale sya ŵana sya golidi 30 mbale sya ŵana sya silifa 410 yida yine ya kukicini yakwana 1,000

¹¹ Yida yosope ya golidi ni ya silifa yakwanile 5,400 yele Sheshibasala ŵayikopwesye pa ndaŵi jele jwalakwejo pamo ni ŵandu ŵala piŵawujaga kutyocela ku ukapolo ku Babiloniya kwawula ku Yelusalemu.