Ekisodo 9 - Chiyawo Bible

Ciwa ca Yinyama

¹ AMBUJE* ŵamsalile Mose* kuti, “Mjawule kwa Mwenye jwa ku Iguputo mkamsalile kuti, AMBUJE, Mlungu jwa Ahebeli akuti, ‘Mwakunde ŵandu ŵangu kuti ajawule akandumicile une.

² Nambo naga mkukana soni kwakunda kuti ajawuleje,

³ Une timbelece yisawusyo yekulungwa ya cilwele cakogoya pa yilangwa yenu mpela pa ng'ombe syenu syasili m'migunda, haci, abulu, ngamila,* ngondolo ni mbusi syakwe.

⁴ Tinjilekaganya pasikati pa yilangwa ya ŵanace ŵa Aisalaeli ni yilangwa ya Aiguputo. Pangali cilangwa cilicose ca Aisalaeli citiciciwa.

⁵ Soni AMBUJE ŵaŵisile ndaŵi, ŵatite, Une tinayitende yele yinduyi malaŵi.’ ”

⁶ Ni pakwacele AMBUJE ŵayitesile yele yinduyi mpela muŵaŵecetele, ni yilangwa yosope ya Aiguputo yawile, nambo paliji pangali cilango cilicose ca ŵanace ŵa Aisalaeli cicawile.

⁷ Ni Mwenye jwa ku Iguputo ŵaliji mkuwusya kuti apikanicisye pa yindu yitendekwe, ŵapikene kuti pangali cilango cilicose ca Aisalaeli cicawile. Nambo Mwenye jwa ku Iguputo ni piŵapundile kumula mtima, ni nganiŵakunda ŵanduwo kuti atyoce.

Yisumbukute

⁸ Ni AMBUJE ŵamsalile Mose ni Aloni* kuti, “Msapule liwu lya pa moto ni kugumbasya m'magasa mwenu, ni Mose aliponye liwulyo kwinani Mwenye jwa ku Iguputo ali mkulola.

⁹ Liwulyo tilicigulucila pa cilambo cosope ca Iguputo mpela luwundu. Ni kulikose kutilikagulucileko, tikukakopoce yisumbukute yakuwulikaga ni kutenda maŵanga pa cilu ca ŵandu ni pa yinyama yakwe mcilambo cosope ca Iguputo.”

¹⁰ Myoyo Mose ŵasapwile liwulyo pa moto, ni ŵajile kwima pa ujo, pameso pa Mwenye jwa ku Iguputo, ni ŵaliponyisye liwulyo kwinani, ndaŵi jijojo yakopwece yisumbukute, yiyawulice ni kutenda maŵanga pa cilu ca ŵandu ni pa yinyama yakwe.

¹¹ Ŵandu ŵamatipwi ŵala nganapakombola kwika kwima pameso pa Mose ligongo ŵakwete yisumbukute nombe nawo, pampepe ni ŵandu wosope wa mu Iguputo.

¹² Nambo AMBUJE ŵawujumwisye mtima wa Mwenye jwa ku Iguputo, ni nganampikanila Mose ni Aloni, mpela muŵaŵecetele AMBUJE kwa Mose mula.

Matalila

¹³ AMBUJE ni ŵamsalile Mose kuti, “Mjimuce kundaŵindaŵipe ni mkasimane najo Mwenye jwa ku Iguputo, ni mkamsalile kuti, AMBUJE, Mlungu jwa Ahebeli, akusala kuti, ‘Mwakunde ŵandu ŵangu kuti ajawule akandumicile une.

¹⁴ Pakuŵa sambano nguti namgwicisye yisawusyo yangu yosope pa m'mwejo, ni kwa nduna syenu, ni kwa ŵandu ŵenu wosope, ni tim'manyilile kuti pangali jwine jwakulandana ni une pa cilambo cosope ca pasi.

¹⁵ Ngatambasukule mkono wangu kuti ni mpute m'mwejo pamo ni ŵandu ŵenu, mkaliji wosope mli m'masile kuwa pa cilambo ca pasi cino.

¹⁶ Nambo namlesile m'mwejo ni umi kuti mgalole macili gangu, kuti lina lyangu limanyice pa cilambo cosope ca pasi.

¹⁷ Nambo m'mwejo mli ciŵela kulikwesya, soni ngamkusaka kwakunda ŵandu ŵangu kuti ajawuleje.

¹⁸ Ngumsalila kuti, malaŵi ndaŵi mpela ajino, tinjigwisya ula ja matalila jamacili, jele jimkanijigwe kala kose mu Iguputo muno citandilile ca cilambo cino.

¹⁹ Sambano mlamule kuti ng'ombe syenu syosope siŵe mwicinga pampepe ni yilangwa yenu yine yosope. Pakuŵa matalila tigagwe pa ŵandu ni pa yinyama yosope yagamba kwendajenda pasa, ligongo lyangayijinjisya mwicinga, ni yosopeyo tiyiciwa.’ ”

²⁰ Nduna sine sya Mwenye jwa ku Iguputo syatesile woga ligongo lya maloŵe ga ŵaŵecete AMBUJE, ni ŵawugalile acikapolo ŵawo m'nyumba pampepe ni yilangwa yawo yakwe,

²¹ nambope ŵane nganasamala kose maloŵe giŵaŵecete AMBUJE, ni ŵagambile kwaleka kusa acikapolo ŵawo pampepe ni yilangwa yawo.

²² Ni AMBUJE ŵamsalile Mose kuti, “Mkwesye mkono wenu kwinani, kuti matalila gagwe pa ŵandu, ni pa yinyama, ni pa yakumela yosope ya m'migunda, mcilambo cosope ca Iguputo.”

²³ Mose ŵanyakwile simbo jakwe kulosya kwinani, AMBUJE ŵatumisye kulindima ni matalila, njasi syaputile petaka. AMBUJE ŵagwisisye matalila pa cilambo ca Iguputo.

²⁴ Ni japali ula ja matalila, njasi syakogoya syaliji mkumesya, gagwile matalila gakogoya, gamkanigawonece citandilile piŵatemi Aiguputo kuŵa mtundu wakulijimila pajika.

²⁵ Matalilago gayijonasile yindu yosope yiyaliji pasa mcilambo cosope ca Iguputo, kutandila ŵandu wosope pampepe ni yinyama yakwe. Gajonasile soni yindu yosope yakumela m'migunda ni kutemangula yitela yosope ya mwitinji.

²⁶ Nambo mcilambo ca Gosheni, ciŵatamaga Aisalaeli, mwaliji mwangali ula ja matalila.

²⁷ Mwenye jwa ku Iguputo ŵaŵilasile Mose ni Aloni ni ŵasalile kuti, “Une ndemwisye, nambo AMBUJE ali ŵakulungama, une ni ŵandu ŵangu tuli ŵakulemwa.

²⁸ Mpopele kwa AMBUJE kuti alekasye ula ja matalila ni kulindimaku ni tinamkunde kuti mjawuleje. Ngamtama soni akuno.”

²⁹ Mose ŵamsalile Mwenye jwa ku Iguputo kuti, “Patingopoce mu msinda awuno, tingatambasukule magasa gangu kwa AMBUJE, ni kulindima ni matalila tigalece, kuti m'manyilile kuti cilambo cosope capasi cili ca AMBUJE.

³⁰ Nambo ngumanyilila kuti m'mwejo ni nduna syenu ngamkwajogopape AMBUJE Mlungu.”

³¹ Litonji lyamasile konasika pampepe ni mbeju ja balele* jakwe, ligongo lyakuti mbeju ja balelejo jaliji jili jekomale, ni litonji lyaliji lili litandite uluŵa.

³² Nambo mbeju ja tiligu ni mbeju ja usanje, nganiyijonasika ligongo akusapanda mwakokoŵa.

³³ Ni Mose ŵalekangene najo Mwenye jwa ku Iguputo, ni ŵakopwece kusa kwa msinda, ni ŵanyakwile makono gakwe kwinani ni ŵapopesile kwa AMBUJE, ni kulindima ni matalila yalesile, soni ula jalesile kugwa pacilambo.

³⁴ Nambo Mwenye jwa ku Iguputo piŵalolite kuti ula, matalila, ni kulindima, yosopeyo yilesile, ŵalemwisye soni, jwalakwe ni nduna syakwe ŵajumwile soni mtima.

³⁵ Mwenye jwa ku Iguputo ŵajumwile mtima, ni nganiŵakunda ŵanace ŵa Aisalaeli kuti atyoce, mpela muŵaŵecetele AMBUJE kwa Mose mula.