Ekisodo 8 - Chiyawo Bible

Yula

¹ AMBUJE* ŵamsalile Mose* kuti, “Mjawule kwa Mwenye jwa ku Iguputo ni mkamsalile kuti, AMBUJE akusala kuti, ‘Mwakunde ŵandu ŵangu ajawuleje, kuti akandumicile une.

² Nambo naga mkukana kwakunda kuti ajawule, mlole, tinacijonanje cilambo cenu ni yula,

³ Mu Lusulo lwa Nayilo timucigumbala ni yula, tiyicikopoka yula mu lusulomo ni kwinjila m'nyumba jenu, mcipinda cenu cagona ni pa cindanda cenu, ni m'majumba mwa nduna syenu ni ŵandu ŵenu ŵosope, ni mu mbale syenu syakupondela mikate, ni ma ufuni gakocela mikate,

⁴ ni yulayo tiyicimsumbila m'mwejo, pampepe ni ŵandu ŵenu, ni nduna syenu syosope.’ ”

⁵ AMBUJE ŵamsalile Mose kuti, “Mumsalile Aloni* kuti, ‘Mtambasukule mkono wenu ni mlosye simbo jenu ku sulo, ku ngalande, ni ku matanda, kuti mukopoce yula ni kwela pa cilambo cosope ca Iguputo.’ ”

⁶ Myoyo Aloni ŵatambasukwile mkono wakwe ni kulosya simbo jakwe pa mesi ga mu Iguputo, ni yula yakopwece, yagumbele pa cilambo cosope ca Iguputo.

⁷ Nambo ŵamatipwi ŵala ŵapanganyisye matipwi gawo, ŵayipanganyisye nombe nawo yula, ni yakwesile pa cilambo ca Iguputo.

⁸ Mwenye jwa ku Iguputo ŵaŵilasile Mose ni Aloni, ŵasalile kuti, “Mpopele kwa AMBUJE kuti yulayi yindyoce une ni ŵandu ŵanguŵa, ni tinakunde ŵandu ŵenu kuti ajawule akatajile mbopesi AMBUJE.”

⁹ Mose ŵamsalile Mwenye jwa ku Iguputo kuti, “Mgambe kusala ndaŵi jimkusaka kuti ngampopelele m'mwejo, nduna syenu ni ŵandu ŵenu wakwe, kuti yulayi yimtyoce, yityoce soni m'majumba mwenu, ni kuti yikasigale mu Lusulo lwa Nayilope.”

¹⁰ Mwenye jwa ku Iguputo ŵatite kuti, “Malaŵi.” Mose ni ŵatite, “Tiyitendekwe mpela mumŵecetelemo, ni timcimanyilila kuti pangali Mlungu jwine jwakulandana ni AMBUJE Mlungu jwetu.

¹¹ Yulayi tiyityoce m'majumba mwenu, m'majumba ga nduna syenu, pampepe ni ŵandu ŵenu, ni tiyigambe kusigala mu Lusulo lwa Nayilo.”

¹² Myoyo Mose ni Aloni ŵalekangene najo Mwenye jwa ku Iguputo jula. Mose ŵapopesile kwa AMBUJE kuti ayityosye yula, yiŵayipelece kwa Mwenye jwa ku Iguputo yila.

¹³ AMBUJE ŵatesile mpela mwa maloŵe ga Mose, ni yula yosope yene yiyaliji m'majumba, pa maluŵala ni m'migunda mwakwe, yawile.

¹⁴ Aiguputo ŵala ŵayiwunjice yula yila mawunjili mawunjili, ni cilambo cosope cagumbele ni liwungo lya kununga kwa yindu yewole.

¹⁵ Nambo Mwenye jwa ku Iguputo piŵalolite kuti yindu yitandite kutama cenene, ŵatandite kumusya mtima wakwe, ni nginasosa soni kumpikanila Mose ni Aloni, ni kutenda yindu mpela muŵaŵecetele AMBUJE mula.

Ususu

¹⁶ Ni AMBUJE ŵamsalile Mose kuti, “Mumsalile Aloni kuti atambasukule simbo jakwe ni kuputa litaka, pakutenda myoyo luwundu losope tulucisanduka kuŵa ususu mcilambo cosope ca Iguputo.”

¹⁷ Jemanjajo ŵatesile myoyo, Aloni ŵatambasukwile mkono wakwe ali akamwile simbo jakwe ni ŵaputile litaka, ni luwundu losope lwasandwice kuŵa ususu, ususuwo wagulucile pacilu pa ŵandu ni pa yinyama yakwe, luwundu losope lwa mcilambo ca Iguputo lwagambile kuŵa ususu wejinji.

¹⁸ Nombe ŵandu ŵamatipwi ŵala ŵalinjile mwa yitagu yawo kukoposya wawo ususu, nambo ŵalepele. Ususuwo wagulucile pa cilu pa ŵandu ni pa yinyama yakwe.

¹⁹ Myoyo ŵandu ŵamatipwi ŵala ŵamsalile Mwenye jwa ku Iguputo kuti, “Ŵayitesile yeleyi ali Mlungu nditu.” Nambo Mwenye jwa ku Iguputo ŵaliji ŵakumula mtima, ni nginapikanila yiŵaŵecete Mose ni Aloni mpela muŵaŵecetele AMBUJE mula.

Membe

²⁰ AMBUJE ŵamsalile Mose kuti, “Malaŵi kundaŵindaŵipe, mjawule mkasimane najo Mwenye jwa ku Iguputo ndaŵi jakwawula ku lusulo, ni mkamsalile kuti, AMBUJE akusala kuti, ‘Mwakunde ŵandu ŵangu kuti ajawule, akandumicile Une.

²¹ Naga ngamkwakunda ŵandu ŵangu kuti ajawuleje, mlole, tinamtumicisye membe syejinji m'mwejo, ni nduna syenu, ni ŵandu ŵenu, ni m'majumba mwenu, soni m'majumba gosope ga Aiguputo, atamose petaka posope pakutama, tipacigumbala ni membe syejinji.

²² Nambo pa lyele lyuŵalyo tinjiciŵika pajika cilambo ca Gosheni cakutama ŵandu ŵangu, kuti membe syelesi sikayicila kweleko, kuti m'mwejo mpate kumanyilila kuti Une ndili AMBUJE soni kuti Une ni jungulamulila cilambo ca pasi.

²³ Tinjilekanganya pasikati pa ŵandu ŵangu ni ŵandu ŵenu. Cindu cakusimonjesya celeci citendekwe malaŵi.’ ”

²⁴ Myoyo AMBUJE ŵayitesile yindu yeleyi, syayice membe syejinji ni kwinjila m'nyumba ja Mwenye jwa ku Iguputo, m'nyumba sya nduna syakwe, ni m'nyumba syosope sya mcilambo ca Iguputo. Cilambo cosope cene casakele ni membe.

²⁵ Mwenye jwa ku Iguputo ŵaŵilasile Mose ni Aloni ni ŵasalile kuti, “Mjawule mkamtajile mbopesi Mlungu jwenu mcilambo munomuno.”

²⁶ Nambo Mose ŵajanjile kuti, “Ngayiŵa kose cenene kutenda myoyo, ligongo Aiguputo ngasanonyela mbopesi syatukutaga uweji kwa AMBUJE Mlungu jwetu. Naga uweji tukutaga mbopesi Aiguputo sikwanyalaya kusilola m'meso mwawo, ana jemanjajo ngatusoma maganga jemanjajo mpaka kutuwulaga?

²⁷ Tukwenela kwawula ulendo wa masiku gatatu mcipululu, kuti tukapelece mbopesi kwa AMBUJE Mlungu jwetu mpela yiŵatite pakutusalila.”

²⁸ Myoyo Mwenye jwa ku Iguputo ŵatite, “Tinamkunde kuti mjawule, mkatajile mbopesi AMBUJE Mlungu jwenu ku cipululu, nambo mkasijawula kwakutalicila mnope. None jwakwe mumbopelele.”

²⁹ Mose ŵatite, “Patindyoce apano, tingapopele kwa AMBUJE, kuti membe simtyoce m'mwejo, nduna syenu soni ni ŵandu ŵenu, malaŵi. Nambo mkatunyenga soni ni kwalekasya ŵandu kwawula kuja kutaga mbopesi kwa AMBUJE.”

³⁰ Mose piŵatyosile kwa Mwenye jwa ku Iguputo, ŵajile kupopela kwa AMBUJE.

³¹ AMBUJE ŵatesile mpela muŵaŵendele Mose, ni syamtyosile membe sila Mwenye jwa ku Iguputo, nduna syakwe ni ŵandu ŵakwe, pangali membe jijasigele.

³² Nambo pa ndaŵi soni jeleji, Mwenye jwa ku Iguputo ŵajumwile mtima, nganiŵakunda Aisalaeli kuti atyoce.