Ekisodo 7 - Chiyawo Bible

¹ AMBUJE* ŵatite kwa Mose,* “Mlole, Une tinampanganye m'mwejo kuŵa mpela Mlungu kwa Mwenye jwa ku Iguputo, ni Aloni* akulu ŵenu ni ŵatakaŵe mpela jwakulocesya* jwenu.

² Timkaŵecete yindu yosope yinamlamulile m'mwejo, ni akulu ŵenu Aloni ni ŵatakamsalile Mwenye jwa ku Iguputo kuti akakunde Aisalaeli kutyoka mcilambo cakwe.

³ Nambo Une tingawulimbisye mtima wa Mwenye jwa ku Iguputo, nambo atamose tingayitende yitagu ni yindu yakusimonjeka yejinji mcilambo ca Iguputo.

⁴ Mwenye jwa ku Iguputojo ngaja kumpikanila jemanja. Nambo une tinjicijonanga cilamboco, ni pakutenda masengo ga macili ni mkono wangu, pa cilambo ca Iguputo, tinjigalongolela makuga gangu ga ngondo, ŵali ŵandu ŵangu Aisalaeli, kwakoposya mcilambo ca Iguputo.

⁵ Pelepo Aiguputo tacimanyilila kuti Une ndili AMBUJE, pitinjipeleka yisawusyo pa cilambo ca Iguputo ni kwakoposya Aisalaeli mcilambo mwawomo.”

⁶ Mose ni Aloni ŵatesile mpela mwele AMBUJE ŵamlamulile.

⁷ Mose ŵaliji ni yaka 80 ni Aloni ŵaliji ni yaka 83 pa ndaŵi jiŵaŵecetanaga ni Mwenye jwa ku Iguputo.

Simbo ja Aloni

⁸ AMBUJE ŵamsalile Mose ni Aloni kuti,

⁹ “Naga Mwenye jwa ku Iguputo akuja kumlamula kuti, Mtulosye yindu yakusimonjeka kuti uwe tumkulupilile, m'mwejo Mose mkasalile Aloni kuti, mjigale simbo jenu ni mjiponye pasogolo pa Mwenye jwa ku Iguputo kuti jisyuce lijoka.”

¹⁰ Myoyo Mose ni Aloni ŵajawile kwa Mwenye jwa ku Iguputo, ni ŵajile kutenda mpela mwele AMBUJE ŵamlamulile. Aloni ŵajiponyisye pasi simbo jakwe jila pasogolo pa Mwenye jwa ku Iguputo ni nduna syakwe, ni jasyucile lijoka.

¹¹ Ali atesile yeleyo, Mwenye jwa ku Iguputo nombe najo ŵaŵilasile ŵandu ŵakwe ŵalunda, asaŵi, ni ŵamatipwi ŵa mu Iguputo, nombe nawo ŵatesile yalumope mu matipwi gawo.

¹² Jwalijose ŵaponyisye pasi simbo jakwe, ni syasyucile majoka. Nambo simbo ja Aloni jila jaliji mkumila simbo syawosyo.

¹³ Nambo Mwenye jwa ku Iguputo ni pawapundile kumula mtima, soni mpela muŵaŵecetele AMBUJE mula, mwenye nganiŵapikanila Mose ni Aloni.

Yakogoya yikwagwila Aiguputo Mesi gakusanduka kuŵa miasi

¹⁴ AMBUJE ŵamsalile Mose kuti, “Mwenye jwa ku Iguputo ali jwakulimba mtima, akukana kwakunda Aisalaeli kuti ajawuleje.

¹⁵ Mjawule kundaŵi mkasimane najo Mwenye jwa ku Iguputo ndaŵi jakwawula ku Lusulo lwa Nayilo, mkalindilile mungulugulu lusulolo, soni mjigale simbo jijasandwice lijoka jila m'myala mwenu.

¹⁶ Mkamsalile Mwenye jwa ku Iguputo kuti, ‘AMBUJE, Mlungu jwa Ahebeli andumile kwenumwe kuti nimsalile aga maloŵega gakuti mwakunde ŵandu ŵangu kuti akandumicile Une mcipululu, nambo mpaka sambano jino m'mwejo ngamkumbikana.

¹⁷ Sambano AMBUJE akusala kuti, patimyiwone yitinayitende, tim'manyilile kuti Une ndili AMBUJE. Mlole, timbute mesi gali mu Lusulo lwa Nayilo ni simbo jajili m'myala mwangu, ni mesi tigasanduce kuŵa miasi.

¹⁸ Ni somba syosope sya mu lusulo lwelelu tisimale kuwa, ni mesi tiganunje, kwakuti ŵandu ŵa mu Iguputo ngasagasaka kose kumwa mesi ga mu lusulolu.’ ”

¹⁹ AMBUJE ŵaŵecete ni Mose kuti, “Mwasalile Aloni kuti, mjigale simbo jenu, ni mjilosye kugali mesi gosope ga mu Iguputo muno, kutandila mesi ga sulo syawo, ngalande syawo, ni matanda gawo. Mesigo tigasanduce kuŵa miasi, ni m'mcilambo cosopeco timuciŵa miasimiasipe, atamose muyakutecela mesi yawo ya yitela ni ya maganga.”

²⁰ Myoyo Mose ni Aloni ŵatesile yosope mpela muŵagombelecesye AMBUJE, Aloni ŵajinyakwile simbo ni ŵaputile pacanya pa mesi ga mu Lusulo lwa Nayilo, pameso pa Mwenye jwa ku Iguputo ni nduna syakwe, ni mesi gosope ga mu lusulogo gasandwice kuŵa miasi.

²¹ Ni somba syosope sya mu lusulomo syawile, kununga kwakwe kwa mesigo kwaliji kwakuti Aiguputo nganapakombola kugamwa, ni paliji pana mesi pa cilambo cosope ca Iguputo.

²² Nambo ŵandu ŵamatipwi ŵa mu Iguputo ŵala nombe nawo ŵatesile yalumope mwa matipwi gawo, nambo Mwenye jwa ku Iguputo ŵaliji ciŵela kulimba mtima, nganayipikanila yiŵaŵecetaga Mose ni Aloni mpela muŵaŵecetele AMBUJE mula.

²³ Mwenye jwa ku Iguputo ŵagalawice ni kuwujila ku nyumba jakwe, ngayiŵalanjila kose yindu yiyatendekweyi.

²⁴ Aiguputo wosope ŵatandite kuwukula yisima mungulugulu Lusulo lwa Nayilo kuti apate mesi gakumwa, pakuŵa mesi ga mu Lusulo lwa Nayilo nganapakombola kumwa.

²⁵ AMBUJE ŵagasakesye mesi ga mu lusulo lula, kwa masiku msano ni gaŵili.