Ekisodo 5 - Chiyawo Bible

Mose ni Aloni pameso pa Mwenye jwa ku Iguputo

¹ Panyuma pakwe Mose* ni Aloni* ŵajawile kwa Mwenye jwa ku Iguputo ni ŵamsalile kuti, “Ayi ni yakuti AMBUJE,* Mlungu jwa Aisalaeli, ‘Mwakunde ŵandu ŵangu kuti ajawule akandendele Une cindimba cipululu.’ ”

² Nambo Mwenye jwa ku Iguputo ŵatite, “Ana AMBUJE ni ŵani, ŵampakana napikanile une, kuti nalece Aisalaeli kuti ajawuleje?”

³ Ni ŵajanjile kuti, “Mlungu jwa Ahebeli atusimene uwe, tukwaŵenda kuti atukunde tujawule pa ulendo wa masiku gatatu ku cipululu, kuti tukapelece mbopesi kwa AMBUJE Mlungu jwetu. Naga ngatukwawula, tacituwulaga ni cilwele kapena ni ngondo.”

⁴ Nambo Mwenye jwa ku Iguputo ŵamwusisye Mose ni Aloni kuti, “Ligongo cici mkwalekasya masengo gawo Aisalaeli? Mtyoce apa, mkawusye ŵandu akakamule masengo gawo.”

⁵ Mwenye jwa ku Iguputo ŵaŵecete soni kuti, “Mlole, ŵandu ŵeleŵa ali ŵajinji kulekangana ni acimsyene cilambo cino, ni sambano jemanja mkusosa kwalekasya kukamula masengo gawo!”

⁶ Lisiku lilyolyo Mwenye jwa ku Iguputo ŵalamwile acakulungwa ŵakukamulisya ŵandu masengo, ni acikapitawo ŵa ci Isalaeli kuti,

⁷ “Mkasimwapela manyasi gakugumbila njelwa ŵandu ŵeleŵa, mpela mumtendeleje. Mwalece akacuŵeje manyasigo acimsyene.

⁸ Nambo winji wakwe wa njelwa uŵe mwatendeleje kala, mkasimwanandiya amta panandi, pakuŵa masengo gakwanandipila, ni ligongo lyakwe akulimbicila kuŵenda kuti, ‘Atukunde tujawule tukamtajile mbopesi Mlungu jwetu.’

⁹ Mwape masengo gakunonopa mnope kupundana ni mwatendeleje kala ŵele ŵanduŵa, kuti akakola lipesa lyakupikanila ya unami.”

¹⁰ Myoyo acakulungwa ŵakukamulisya masengo ni acikapitawo ŵa ci Isalaeli ŵakopwece, ni ŵajile kukwasalila Aisalaeli kuti, “Mwenye jwa ku Iguputo asasile kuti, ngapeleka soni manyasi kwa jemanja.

¹¹ Timlicuŵileje mwacimsyene manyasi, kulikose kwele kutimkagasimane, nambo soni ciŵalanjilo ca njelwa ni cilacila.”

¹² Myoyo ŵandu ŵajawile pa cilambo cosope ca Iguputo, kuja kulolesya manyasi.

¹³ Acakulungwa ŵakukamulisya masengo mwakwanguya Aisalaeli kugumba njelwa ali mkusala kuti, m'malisye kugumba njelwa sya lisiku ni lisiku mpela mumwagumbilaga pandanda pitwampaga manyasi.

¹⁴ Acakulungwa ŵakukamulisya masengo ŵa Mwenye jwa ku Iguputo ŵala, ŵaliji mkwaputa soni acikapitawo ŵa ci Isalaeli, ŵaŵaŵisile kuti aŵe ŵakulolela masengo, ali mkwawusya kuti, “Ligongo cici jemanja lelo nganimgumba mlingo ulawula wa njelwa, mpela mumwagumbilaga kala?”

¹⁵ Akapitawo ŵa ci Isalaeli ŵala ŵajawile kwa Mwenye jwa ku Iguputo kuja kumdandawulila kuti, “Pepani mwenye, uweji tukusosa kwawusya ŵalakwe, ana ligongo cici akututendela yindu yamti myiyi uweji ŵakutumicila ŵawo?

¹⁶ Manyasi ngatukupegwa, soni uwe akutulamula kuti tugumbe njelwa, soni agamba kutuputa. Nambo ŵandu ŵawo mwenye, akutulemwecesya.”

¹⁷ Nambo mwenye ŵajanjile kuti, “Jemanja ŵaulesi! Mkutenda ulesi mnope, ni ligongo lyakwe mkuti, ‘Mtukunde tujawule tukatajile AMBUJE mbopesi.’

¹⁸ Sambano mjawule mkatende masengo, manyasi akampa kwene, nambo mkwenela kuja kugumba njelwa pa mlingo uwowo wakala.”

¹⁹ Acikapitawo ŵa ci Isalaeli ŵayiweni kuti ŵaliji pa yisawusyo, piŵasalile kuti, “Mkaja kwanandiya nambala ja njelwa sya kugumba pa lisiku lililyose.”

²⁰ Ali atyosile kwa Mwenye jwa ku Iguputo, ŵasimene ni Mose ni Aloni petala ali mkwalindilila,

²¹ ni ŵatite kwa Mose ni Aloni, “AMBUJE ayiweni yimtesile jemanja, tampe cilango ligongo lyakutuŵenganya uweji ni mwenye ni nduna syakwe, soni jemanja ni ŵimwapele macili gakuti atuwulaje uweji.”

Mose akudandawula kwa AMBUJE

²² Mose ŵapopesile kwa Ambuje, ŵatite, “Ŵalakwe AMBUJE, ligongo cici mkwalagasya ŵandu ŵenu? Nambi uneji mwandumilaga cici?

²³ Pakuŵa citandilile cinayice une kwa Mwenye jwa ku Iguputo ni kumsalila maloŵe genu gala, jwalakwe aŵele ali mkwasawusya ŵandu ŵenu. AMBUJE pangali kandu kalikose kamtesile kakwakulupusya ŵandu ŵenuŵa.”