Ekisodo 40 - Chiyawo Bible

Akutaŵa citenti ni kucipeleka kwa Mlungu

¹ AMBUJE* ŵamsalile Mose* kuti,

² “Pa lisiku lyandanda lya mwesi wandanda, mkataŵe citenti cakusimanilana ni AMBUJE.

³ Mkaliŵice Libokosi lya Cilanga ca AMBUJE* mugali maganga ga malamusimo, mkalicije libokosilyo ni nguwosyo.

⁴ Mkaŵice soni mwelemo tebulo, ni mkaŵice penani pa tebulojo yida yakwe, mkaŵice cakuŵika nyali ni nyali syakwe.

⁵ Mkaŵice malo gakututumicisya ubani* ga golidi,* pasogolo pa Libokosi lya Cilanga ca AMBUJE. Mkawugale pa mlango wa citenti ni nguwo syakuciga.

⁶ Mkatamice malo gakupelecela mbopesi sya koca, pasogolo pa citenti cakusimanilana.

⁷ Mkaŵice libeseni lyakunaŵila pasikati pa citenti cakusimanilana, ni malo gakupelecela mbopesi, mkataje mesi mwibesenimo.

⁸ Mkapanganye luŵala kusyungulila luŵala lwa citentico, ni mkakolece nguwo syakuciga pa cipata cakwinjilila ku luŵalako.

⁹ Panyuma pakwe mkajigale mawuta gakupakasya gala, ni mkacipakasye citentico, ni yindu yosope yili mwelemo. Mkayiŵice pajika yindu yosopeyo kuti yikaŵe yeswela.

¹⁰ Mkapakasye soni mawuta malo gakupelecela mbopesi sya koca, pamo ni yida yakwe yosope. Mkagaŵice pajika malo gakupelecela mbopesigo kuti gakaŵe malo gamaswela, malogo tigakaŵe malo gamaswela kwakupunda mnope.

¹¹ Mkapakasye mawuta libeseni lyakunaŵila, pampepe ni cipaka cakwe ca kutamicila, mkaliŵice pajika, kuti likaŵe lyeswela.

¹² Panyuma pakwe mkajigale Aloni* ni ŵanace ŵakwe ŵacalume ni kwika nawo ku citenti cakusimanilana, pakusaka kuti jemanjajo akaliswejesye, akajoje wosopewo kweleko.

¹³ Mkawece Aloni yakuwala yapajika yeswela, mkapakasye mawuta, ni mkaŵice pajika kuti akaŵe jwakutaga mbopesi jwakundumicila une.

¹⁴ Panyuma pakwe akayice ŵanace ŵakwe ŵacalume ni mkawece mwinjilo.

¹⁵ Mkapakasye mawuta ŵanacewo, mpela yimwatite pa kwapakasya baba ŵawo, kuti akaŵe ŵakutaga mbopesi ŵakundumicila une. Kwapakasya kwa mawuta kweleku tikucatendesya kuti aŵe ŵakutaga mbopesi ŵangu pa mipago jawo josope.”

¹⁶ Mose ŵayitesile yosope mpela mwele AMBUJE ŵamlamulile kuti ayitende.

¹⁷ Myoyo pa lisiku lyandanda, lya mwesi wandanda, wa mcaka caŵili, citenti ca AMBUJE cataŵidwe.

¹⁸ Pakutaŵa Mose citentico, ŵalongwele kutamika ya kwimicila yakwe pasi, ŵajimice mafelemu mu yakwimicilayo, ŵalumbikenye ni mitwalo jakwe, ŵajimice njalamila syakwe sila.

¹⁹ Pacanya pa yitelayo ŵayiwunicile ni nguwo sya kupanganyicisya tenti sila. Mpela mwele AMBUJE ŵamlamulile Mose.

²⁰ Ŵagaŵisile maganga ga malamusi likumi gala mwibokosi lya Cilanga ca AMBUJE, ŵaswecile mbiko syakunyakulila sila mu mbali mwa libokosi, ŵaŵisile ciwuniko pacanya pakwe.

²¹ Ŵaliŵisile libokosilyo mu citenti ca AMBUJE, ŵaŵisile nguwo syakuciga libokosilyo. Ŵalicijile Libokosi lya Cilanga ca AMBUJE ni nguwo mpela mwele AMBUJE ŵamlamulile Mose.

²² Ŵajiŵisile tebulo mu citenti mula, cakumpoto kwa citenti, kusa kwa nguwo jakucijila jila,

²³ penani pa tebulopo ŵaŵisile mikate mpela AMBUJE ŵamlamulile Mose.

²⁴ Mu citenti cakusimanilana ŵaŵisile cakuŵika nyali mwakulolegana ni tebulo, ca kum'mwela kwa malo gamaswela.

²⁵ Pa cakuŵika nyalico ŵaŵisile nyali, kuti siŵe pameso pawo AMBUJE, mpela mwele AMBUJEWO ŵamlamulile Mose.

²⁶ Mu citenti cakusimanilanaco ŵaŵisile malo gakupelecela mbopesi ga golidi, pasogolo pa nguwo jakuciga.

²⁷ Ŵagatutumicisye ubani wa liwungo lyambone malogo, mpela mwele AMBUJE ŵamlamulile Mose.

²⁸ Pa mlango wakwinjila kumalo gamaswela ŵaŵisile nguwo jakuciga.

²⁹ Ŵaŵisile malo gakupelecela mbopesi sya koca pa mlango wa citenti cakusimanilana. Ŵatasile mbopesi sya koca, ni mbopesi sya yakulya, mpela mwele AMBUJE ŵamlamulile Mose.

³⁰ Ŵaŵisile libeseni lya kunaŵila lila pasikati pa citenti cakusimanilana ni malo gakupelecela mbopesi gala, ni ŵatasile mesi ga kunaŵila,

³¹ gele Mose, Aloni ni ŵanace ŵakwe ŵacalume, ŵaliji mkunaŵa m'myala mwawo ni kucapa sajo syawo.

³² Ndaŵi syosope pakwinjila mu citenti cakusimanilana ni AMBUJE, kapena kuŵandicila ku malo gakupelecela mbopesi ŵaliji mkusukusula, mpela mwele AMBUJE ŵamlamulile Mose.

³³ Ŵataŵile luŵala kusyungulila luŵala losope liŵataŵile citenti cakusimanilana ni AMBUJE cila ni malo gakupelecela mbopesi. Ŵaŵisile nguwo syakuciga pa cipata cakwinjila ku luŵalako. Myoyo Mose ŵamalisisye masengo gosopego.

Liwunde lya pacanya pa citenti cakusimanilana ni AMBUJE

³⁴ Liwunde lyaciwunicile citenti cakusimanilana cila, cagumbele ni lumbili lwawo AMBUJE.

³⁵ Mose ŵalepelaga kwinjila mucitentimo ligongo lya liwundelyo lyaliji mwelemowo, soni ligongo lya lumbili lwawo AMBUJE lwagumbele mwelemo.

³⁶ Pa ulendo wawo wosope, liwunde lyatiji mkutyoka pa citentipo, Aisalaeliwo ŵatyokaga pa malo ga cigonogo.

³⁷ Nambo naga liwundelyo ngatyoka, nombe Aisalaeliwo nginatyokaga pa cigonopo. Ŵalindililaga mpaka pa lisiku lyakuti liwundelyo lityosile.

³⁸ Pa ulendo wawo wosopewo, Aisalaeli ŵaliji mkuliwona liwunde lili pa citenti musi, ni cilo ŵawuwonaga moto uli mkolela mkati mwa liwundelyo, lyatendaga myoyo pa ulendo wawo wosope.