Ekisodo 39 - Chiyawo Bible

Akupanganya yakuwala ya jwakutaga mbopesi

¹ Ŵapanganyisye yakuwala yakusalala mnope ya ŵakutaga mbopesi, yakuwala pakutumicila ku malo gamaswela. Ŵapanganyisye yakuwalayo ni nguwo ja buluwu, ja papo ni jecejewu. Ŵapanganyisye yakuwala ya Aloni* mpela mwele AMBUJE* ŵamlamulile Mose.*

² Ŵatotile cakuwala ca efodi* ni nguwo ja golidi,* nguwo ja buluwu, nguwo ja papo ni nguwo jecejewu, ni nguwo ja bafuta jakutililika mnope soni jeluce cenene.

³ Ŵasyanile golidi mwa kwepepala ni ŵamlenjilelenjile, kuti alucile kumo mwa umisili, ni litonji lya buluwu, litonji lya papo, ni litonji lyecejewu, ni kuti alucile kumo ni litonji lya nguwo ja bafuta jakutililika.

⁴ Ŵapanganyisye ngoleka sya m'makoyo pa cakuwala ca efodi cila, ŵasilumbikenye ku mbali siŵili sya ya cakuwalaco.

⁵ Ŵalucile soni lamba jwakulandana ni nguwo ja efodi mwa umisili, jwakutaŵila cakuwala ca efodijo. Lamba ŵaliji jwa nguwo ja golidi, nguwo ja buluwu, nguwo ja papo ni nguwo jecejewu, ŵaliji jwa nguwo ja bafuta jwakusalala ni jwamluce cenene, mpela mwele AMBUJE ŵamlamulile Mose.

⁶ Ŵakolosisye maganga gakusalala ga mtundu wa onikisi, ni ŵagaŵisile mu yakuŵicila yakwe ya golidi. Ŵagasokwete magangago mpela mwele mwa kusokotela pa cidindo, ŵalembile mwa kusokota cenene mena gosope ga ŵanace ŵacalume ŵa Aisalaeli.

⁷ Maganga gosopego ŵagataŵilile pa ngoleka sya cakuwala ca efodi cila, kuti gakumbusyeje ngosyo 12 sya Aisalaeli, mpela mwele AMBUJE ŵamlamulile Mose.

Kupanganya kwa cakuwala pamtima

⁸ Ŵapanganyisye cakuwala pamtima mwa umisili, mpela muŵatotele cakuwala ca efodi cila. Ŵatotile ni nguwo ja golidi, nguwo ja buluwu, nguwo ja papo ni nguwo jecejewu, ni soni nguwo ja bafuta jwakutililika, jeluce cenene.

⁹ Ukulu wakwe waliji wakulandana mbali syakwe syosope, ni ŵacipindile paŵili, caliji cana masentimita 32 mcilewu, ni masentimita 23 mcijipi mwakwe.

¹⁰ Ŵaŵisile misela mcece ja maganga. Pa msela wandanda ŵaŵisile maganga ga lubi, topasi* ni kabako.

¹¹ Pa msela waŵili ŵaŵisile maganga ga emeladi, safilo ni dayamondi.

¹² Pa msela watatu ŵaŵisile maganga ga yasinti, agate* ni ametisiti,*

¹³ ni pa msela wa mcece ŵaŵisile maganga ga belili,* onikisi ni jasipa. Magangago ŵagatotelele pa cakuwalaco ali agaŵisile muyakuŵicila yakwe ya golidi.

¹⁴ Maganga gosope gapali 12 giŵagalembile mena ŵanace ŵa Yakobo.* Ŵagasokwete mpela cidindo, ni pa liganga lili lyose ŵalembile lina lya lukosyo lumo lwa ku Isalaeli.

¹⁵ Ŵapanganyisye tumikufu twakutiŵa cenene mpela lukonji twa golidi jwambone mnope, twakuŵika pa cakuwala pa mtima.

¹⁶ Ŵapanganyisye yakolecela yakwe yiŵili ya golidi, mbete siŵili, ŵasitotelele mbete siŵilisyo ku songa siŵili sya mwinani mwa cakuwala pamtimaco.

¹⁷ Ŵataŵilile ngonji siŵili sya tumikufu twa golidi tula, ku mbete siŵili syaliji ku songa sya cakuwala pamtima cila.

¹⁸ Ŵasilumbikenye songa sine sya ngonji siŵili sya tumikufu twa golidi tula, kuyakukolecela ya golidi yiŵili yila. Ni pakutenda myoyo ŵacilumbikenye cakuwala pamtima, ku ngoleka sya m'makoyo sya cakuwala ca efodi cila.

¹⁹ Ŵapanganyisye mbete siŵili sya golidi, ni ŵasitotelele ku songa siŵili sya mwiŵanda, mwa cakuwala pamtima, ca mkati mwakwe, mwakuŵandikana ni cakuwala ca efodi.

²⁰ Ŵapanganyisye soni mbete sine siŵili sya golidi, ni ŵasitotelele ca mwiŵanda mwa ngoleka siŵili sya m'makoyo ga cakuwala ca efodi, capenani pa lamba jwamluce cenene jula jwa efodi.

²¹ Ŵasilumbikenye mbete sya cakuwala pamtima cila ku mbete sya efodi ni kaguwo ka buluwu, kuti cakuwala ca pa mtimaco ciŵe penani pa lamba jamluce cenene jula, ni soni kuti cakuwala pamtima cilumbikane cenene ni efodi, mpela mwele AMBUJE ŵamlamulile Mose.

Kupanganya kwa yakuwala ya mtundu wine ya ŵakutaga mbopesi

²² Ŵatotile mkanjo wa nguwo ja buluwu, wakuwala pacanya pa efodi.

²³ Mkanjowo wakwete cibowo cakupisya mtwe, camti mpela ca pa malaja. Kusyungulila mungulugulu mwa cibowoco, ŵatotile mwakulimbika kuti ukapapuka.

²⁴ Pa lutoto lwa mwiŵanda mwa mkanjo, ŵaŵisile maluŵa gakuwoneka mpela yisogosi, gakupeta ni nguwo ja buluwu, ja papo ni jecejewu, ni soni nguwo ja bafuta jwakutililika ni jeluce cenene.

²⁵ Ŵapanganyisye soni tumabelo twa golidi jwambone mnope, ni ŵatuŵisile mwakupacisya pa cilikati pa maluŵa gakuwoneka mpela yisogosi yila, kusyungulila mlutoto losope lwa mwiŵanda mwa mkanjo.

²⁶ Myoyo ŵaŵisile mwakupacisya, kacisogosi kamo kabelo kamo, kacisogosi kamo kabelo kamo, kusyungulila mlutoto losope lwa mwiŵanda mwa mkanjo, uŵawalaga ŵakutaga mbopesi pakukamula masengo gawo gakutaga mbopesi, mpela mwele AMBUJE ŵamlamulile Mose.

²⁷ Ŵatotele Aloni ni ŵanace ŵakwe mwinjilo, wa nguwo ja bafuta jakutililika mnope soni jeluce cenene,

²⁸ ni nduŵila, yikofiya ni makabudula, yosopeyo yakupanganyidwa ni nguwo ja bafuta jwakutililika mnope soni jeluce cenene.

²⁹ Ŵapanganyisye soni lamba jwakutaŵila, jwa nguwo ja bafuta jwa kutililika mnope soni jwamluce cenene, ni litonji lya buluwu, lya papo ni lyecejewu, ŵa msalalisye lambajo ni yakupetapeta, mpela mwele AMBUJE ŵamlamulile Mose.

³⁰ Ŵapanganyisye liluŵa lya golidi jwambone mnope, ni ŵalilembile pacanya pakwe mwakusokota, mpela mwakusokotela cidindo, maloŵe gakuti, “Cakupelecekwa ceswela kwa AMBUJE.”

³¹ Ŵajigele kaguwo ka buluwu, ni ŵalitaŵilile liluŵalyo pa nduŵila jila, mpela mwele AMBUJE ŵamlamulile Mose.

Kumalisya kwa masengo

³² Myoyo masengo gosope gakutaŵa citenti cakusimanilana ni AMBUJE gamasile. Aisalaeli ŵala ŵayitesile yindu yosope mpela mwele AMBUJE ŵamlamulile Mose.

³³ Ŵayice nayo yindu yosopeyo kwa Mose: citenti ca AMBUJE, pampepe ni yida yakwe yosope, yakolecela, mafelemu, mitwalo, njalamila, ni yakwimicila yakwe.

³⁴ Ŵayice ni yakuwunicila citentico ya mapende ga ngondolo geloŵece mu utoto wecejewu, ni mapende ga mbusi, ni nguwo syakucijila mu mbali,

³⁵ ni Libokosi lya Cilanga ca AMBUJE* lyakuŵika malamusi pampepe ni mbiko syakunyakulila, ni ciwuniko ca libokosilyo.

³⁶ Ŵayice soni ni tebulo pampepe ni yida yakwe yosope, ni mikate ja kupeleka mwangalecesya kwa Mlungu.

³⁷ Ŵayice naco cakuŵika nyali ca golidi jwambone mnope, ni nyali syakwe ni mawuta ga nyali gakwe,

³⁸ malo gakupelecela mbopesi ga golidi, mawuta gakupakasya, ubani* wa liwungo lyambone, likatani lyakucijila pa mlango wakwinjilila mu citenti,

³⁹ ŵayice nago malo gakupelecela mbopesi ga kopa* pampepe ni sefa ja kopa, ni mbiko syakwe syakunyakulila, pampepe ni yida yakwe yosope, ni soni ŵayice ni libeseni lyakunaŵila ni cipaka cakwe cakutamicila.

⁴⁰ Ŵayice nasyo nguwo syakucijila luŵala, pampepe ni njalamila ni yakwimicila yakwe, likatani lyakucijila pa cipata cakwinjilila ku luŵalako, pampepe ni ngonji ni yicili yakwe, soni ni yida yosope yakutendela masengo, pa ndaŵi ja kutumicila mu citenti mula.

⁴¹ Ŵayice nayo soni yakuwala yakusalala mnope, yakwenela kuwala ŵakutaga mbopesi, ndaŵi jakutumicila ku malo gamaswela, yakuwala yeswela ya jwakutaga mbopesi Aloni, ni soni yakuwala ya ŵanace wakwe ŵacalume, yakwenela kuwala pakukamula masengo ga kutaga mbopesi.

⁴² Myoyo Aisalaeli ŵagatesile masengo gosope mpela mwele AMBUJE ŵamlamulile Mose.

⁴³ Mose ŵayiweni yindu yosope yiŵapayinganyisyeyo, ŵasimicisye kuti ŵayipanganyisye mpela mwele AMBUJE ŵalamulile. Mose ŵapele upile ŵandu wosope ŵala.