Ekisodo 38 - Chiyawo Bible

Malo gakupelecela mbopesi syakoca

¹ Ŵapanganyisye malo gakupelecela mbopesi syakoca ga matabwa ga citela ca akesha.* Galiji masentimita 229 mcilewu, ni masentimita 229 mcijipi, mbali syosope syaliji syakulandana, ukulu wakwe waliji masentimita 137.

² Ŵapanganyisye misengo pa ndumba mcece sya malo gakupelecela mbopesigo, misengo ni malo gakupelecela mbopesi yalumbikene ni ŵayipacile kopa.*

³ Ni ŵapanganyisye yida yosope ya pa malo gakupelecela mbopesi, mpela mipika jakokolela liwu, mafosholo, mabeseni, mafoloko gamakulungwa, ni yiwaya yakukolesyapo moto. Yida yosopeyo yaliji yakupanganyidwa ni kopa.

⁴ Ni ŵajipanganyisye sefa ja cisyano, ja pa malo gakupelecela mbopesi, ŵajilucile ni cisyano ca kopa, ni ŵajiŵisile mungulugulu mwa malo gakupelecela mbopesi, ni jalecesye pasikati pakwe.

⁵ Ŵapanganyisye soni mbete mcece ni ŵasilumbikenye pa ndumba mcece sya sefa jila, kuti aswece mbiko syakunyakulila.

⁶ Ni ŵapanganyisye mbiko sya kunyakulila sya citela ca akesha, ni ŵasipacile kopa.

⁷ Sambano pakuganyakula malo gakupelecela mbopesigo, ŵaswekaga mbikosyo mu mbete, sisyaliji mu mbali siŵili sya malo gakupelecela mbopesigo. Malo gakupelecela mbopesigo ŵagapanganyisye ni matabwa, ni ŵagasepile mkati mwakwe.

Kupanganya kwa libeseni lya kunaŵila

⁸ Ŵapanganyisye libeseni lya cisyano ca kopa lyakunaŵila, pampepe ni cipaka cakwe cakutamicila, ŵapanganyisye ni kopa jwa yakulilolela ya acakongwe ŵaŵatumicilaga pa mlango wa kwinjilila mu citenti cakusimanilana cila.

Nguwo jakuciga luŵala lwakusyungulila pacili citenti

⁹ Ŵapanganyisye luŵala. Nguwo syakwe syakucijila luŵalalo, ca kum'mwela kwakwe, syaliji sya nguwo ja bafuta jwakusalala, ni ulewu wakwe waliji mamita 46,

¹⁰ ni njalamila 20, pampepe ni yakwimicila yakwe 20, yosopeyo yaliji ya kopa, nambo yakukolecela ya pa njalamilasyo, ni yakutaŵila yakwe yaliji ya silifa.*

¹¹ Kumbali ja kumpoto kwaliji kwana likatani lyakucijila luŵalalo, ulewu wakwe waliji mamita 46, ni njalamila 20, pampepe ni yakwimicila yakwe soni 20 yaliji ya kopa. Nambo yakukolecela ya pa njalamilasyo ni yakutaŵila yakwe yaliji ya silifa.

¹² Ku mbali ja kungapilo lisiku kwapali nguwo syakucijila luŵalalo, ulewu wakwe waliji mamita 23, ni njalamila likumi, pampepe ni yakwimicila yakwe likumi. Yakukolecela yakwe pampepe ni yakutaŵila yakwe yaliji ya silifa.

¹³ Kumbali jakungopoko lyuŵa kwaliji kwana nguwo ja mamita 23.

¹⁴ Syapali nguwo syakuciga mbali jimo ja cipata, ulewu wakwe waliji mamita msano ni gaŵili, syakwete njalamila syakwe sitatu ni yakwimicila yakwe yitatu.

¹⁵ Ku mbali jine ja cipata jaliji yalumo mpela mbali jinejo. Myoyo ku mbali syosope siŵili sya cipata cakwinjilila ku luŵala kula, syapali nguwo syakuciga ulewu wakwe mamita msano ni gaŵili, syakola njalamila sitatu ni yakwimicila yakwe yitatu.

¹⁶ Makatani gakuciga kusyungulila luŵalalo, galiji ga bafuta jwakusalala mnope.

¹⁷ Yakwimicila yakwe ya njalamilasyo yaliji ya kopa. Nambo ku songa kwa njalamila ni yakukolecela ya pa njalamilasyo, pampepe ni ya kutaŵila yakwe, yaliji yepace silifa. Njalamila syosope sya luŵalalo ŵasitaŵile ni yakutaŵila ya silifa.

¹⁸ Nguwo jakuciga pa cipata cakwinjilila ku luŵalako, lyaliji lya mtundu wa buluwu, wa papo ni wecejewu. Ni nguwo ja bafuta jwakutililika mnope, jeluce ni jepete cenene. Ulewu wakwe waliji mamita msano ni mcece, ni mcijipi mwakwe mwaliji masentimita 229, mpela mujaŵelele nguwo jakucijila luŵala lula.

¹⁹ Makatanigo ŵagakolece ku njalamila mcece syakola yakwimicila yakwe mcece ya kopa. Songa sya njalamilasyo, ni yakukolecela ya pa njalamila, ni yakutaŵila yakwe yaliji ya silifa.

²⁰ Nambo yicili yakukomela citenti, ni yicili yakukomela nguwo sya luŵalalo yaliji ya kopa.

Yida ya cisyano ya mu citenti ca AMBUJE

²¹ Awu ni winji wa yindu ya cisyano yiŵayitendelaga masengo mu citenti ca AMBUJE* mula, mpela muŵalamulile Mose* kuti ayiŵalanje, Alefi ni ŵaŵakwete masengo gakuŵalanga, ni Itamala, mwanace jwa Aloni* jwakutaga mbopesi ni juŵalongolelaga.

²² Besalele, mwanace jwa Uli, cisukulu ca Huli jwa lukosyo lwa Yuda, ŵapanganyisye yosope yele AMBUJE ŵamlamwile Mose, kuti ayipanganye.

²³ Ŵakumkamucisya ŵakwe Oholiyabu, mwanace jwa Ahisamaki, jwa lukosyo lwa Dani, ŵaliji ŵakumanyila ya kusokota maganga, kulemba mapulani, ni kupanganya nguwo syepete cenene sya litonji lya buluwu, papo ni syecejewu. Ni soni nguwo ja bafuta jwa kutililika jeluce cenene.

²⁴ Golidi* josope juŵamkamulisyaga masengo pakupanganya malo gamaswela, jwaliji golidi juŵapelekaga ŵandu kwa AMBUJE, ni jwaliji mkusitopa makilogalamu 1,000 malinga ni mpimo wa ku Nyumba ja AMBUJE.

²⁵ Silifa jwakutyocela ku makuga ga ŵandu giŵalembesye, jwakwanile makilogalamu 3,430, malinga ni mlingo wa ku Nyumba ja AMBUJE.

²⁶ Mundu jwalijose ŵapelekaga ma galamu msano ni jimo ja mbiya, malinga ni mlingo wa ku Nyumba ja AMBUJE. Ŵandu wosope ŵalembesye mkawundula ŵapali 603,550 acalumepe ŵa yaka 20 kapena kupunda pelepo.

²⁷ Silifa jwa kusitopa makilogalamu 3,400 ŵagumbile yakwimicila Nyumba ja AMBUJE ni nguwo jakucijila. Cakwimicila cilicose cakwanilaga silifa jwa kusitopa makilogalamu 34.

²⁸ Makilogalamu 20 gakusigala ga silifa, Besalele ŵapanganyisye yakukolecela ya pa njalamila ni yakutaŵila, ni silifa jwine ŵapacile ku songa kwa njalamila.

²⁹ Kopa jwele juŵampelece kwa AMBUJE josope ŵakwanile makilogalamu 2,425.

³⁰ Kopa jweleju ŵapanganyisye yakwimicila ya pa cipata cakwinjilila ku citenti cakusimanilana. Soni ŵapanganyisye malo gakupelecela mbopesi sya koca, pampepe ni sefa, ni yida yine yosope ya pa malo gakupelecela mbopesi,

³¹ ni yakwimicila njalamila sya luŵala lwa kusyungulila luŵala, ni yicili yakomela citenti, ni yakomela luŵala losope lwa kusyungulila luŵalalo.