Ekisodo 37 - Chiyawo Bible

Upanganye wa Libokosi lya Cilanga ca AMBUJE

¹ Besalele ŵapanganyisye libokosi lya Cilanga ca AMBUJE* ni matabwa ga citela ca akesha.* Libokosilyo lyaliji masentimita 110 mcilewu, ni masentimita 66 mcijipi mwakwe, ni masentimita 66 ukulu wakwe.

² Ŵalipacile ni golidi* mkati mwakwe mosope ni kusa kwakwe, ni ŵaŵisile mkombelo wa golidi jwambone mnope kusyungulila libokosi lyosopelyo.

³ Ŵapanganyisye mbete sya golidi mcece syakunyakulila, ni ŵasitaŵilile pa ndumba mcece sya libokosilyo, aku siŵili aku siŵili.

⁴ Ni ŵapanganyisye mbiko mcece sya yitela ya akesha, ni ŵasipacile golidi,

⁵ ni ŵasilonjile mbikosyo mu mbete syaliji mu mbali syosope siŵili sya libokosi lila, kuti anyakulileje.

⁶ Ni ŵapanganyisye ciwuniko ca golidi jwambone mnope, ulewu wakwe waliji masentimita 110, ni masentimita 66 mcijipi mwakwe.

⁷ Ni ŵapanganyisye akelubi ŵaŵili ŵa golidi, ŵakusyana ni nyundo, mumbali mwa ciwuniko.

⁸ Akelubiwo ŵaliji jwine aku jwine aku, nambo ŵaliji ŵalumbikane ku ciwunikoco.

⁹ Mapapiko ga akelubiwo ŵagatambasukwile pacanya, kuciwunicila ciwunikoco. Ŵatemi cakulolegana, ni jwalijose ŵaliji mkulola pa ciwunikoco.

Kupanganya kwa tebulo

¹⁰ Besalele ŵapanganyisye soni tebulo ja matabwa ga yitela ya akesha, jaliji masentimita 88 mcilewu mwakwe, ni masentimita 44 mcijipi mwakwe, ni ukulu wakwe waliji masentimita 66.

¹¹ Ni ŵalipacile golidi jwambone mnope, ni ŵaŵisile mkombelo wa golidi kusyungulila tebulo josopejo.

¹² Ŵapanganyisye katabwa ni ŵakaŵisile mumbali kusyungulila tebulojo, ngwasa jakwe jaliji ligasa limo, ni ŵaŵisile mkombelo wa golidi kusyungulila muŵaŵisile katabwa kala.

¹³ Kaneko ŵapanganyisye soni mbete mcece sya golidi, ni ŵasilumbikenye mu ndumba mcece sya ngongolo sya tebulojo.

¹⁴ Mbete syakupisyamo mbiko pakujinyakula tebulojo ŵasitaŵilile mwakuŵandikana ni katabwa kala.

¹⁵ Ni ŵapanganyisye mbiko sya yitela ya akesha, ni ŵasipacile ni golidi.

¹⁶ Ŵapanganyisye soni yida yakuŵika pa tebulojo ya golidi jwambone mnope, mpela mbale ni yikoŵi yakusosekwa pakututumisya ubani* malulo, migawo ni mabeseni, yakusosekwa pakupeleka yakumwa.

Kupanganya cakuŵika nyali

¹⁷ Ni ŵapanganyisye cakuŵika nyali ca golidi jwambone mnope. Cakutamicila ni cilu cakwe yaliji ya golidi, yosope yaliji yakusyana ni nyundo. Ni maluŵa gakwe gakusalalisya galiji gakusyanila kumpepe ni cakuŵika nyalico.

¹⁸ Ni ŵapanganyisye nyambi msano ni jimo mumbali mwakwe, sitatu mbali jilijose.

¹⁹ Lujambi luli lose mwa nyambi msano ni jimo lwakwete maluŵa gatatu, gakupanganyidwa mpela mugakuwonecela maluŵa ga mtowo.

²⁰ Pa cakuŵika nyalico japali migawo mcece jakuwoneka mpela maluŵa ga mtowo.

²¹ Lyapali liluŵa limo mwiŵanda mwa mawunjili gatatu ga nyambi sisyaŵicidwe siŵilisiŵili sila.

²² Maluŵago pampepe ni nyambisyo, ŵasipanganyisye kumo ni cakuŵika nyali cila. Cindu cosopeco caliji cindu cimo ca golidi, cakusyana ni nyundo.

²³ Ni ŵapanganyisye nyali msano ni siŵili syakuŵika pa cakuŵika nyali cila, soni ŵapanganyisye cakusimila nyali, pampepe ni mbale syakutyocesya liwu, sya golidi jwambone mnope.

²⁴ Pakupanganya cakuŵika nyalico, pampepe ni yida yakwe yosope, ŵatendele masengo golidi jwambone mnope jwa makilogalamu 35.

Kupanganya malo gakututumicisya ubani

²⁵ Ŵapanganyisye malo gakututumicisya ubani ni matabwa ga citela ca akesha. Ulewu wakwe waliji masentimita 46, masentimita 46 mcijipi, ni ukulu wakwe waliji masentimita 91, ni misengo jakwe ŵajipanganyisye pamo ni malo ga kututumicisya ubanigo.

²⁶ Ŵagapacile golidi jwambone mnope pacanya pakwe, ni mumbali mwakwe mosope mcece, ni pa misengo jakwe. Ni ŵapanganyisye mkombelo wa golidi, ni ŵawuŵisile kusyungulila malo gakututumicisya ubani gala.

²⁷ Ŵapanganyisye mbete siŵili sya golidi syakunyakulila malo gakututumicisya ubanigo, ni ŵasilumbikenye ku mbali syosope siŵili sya malo ga kututumicisya ubani, ca mwiŵanda mwa mkombelo ula, kuti akaswece mbiko syakunyakulila.

²⁸ Ŵasipanganyisye mbikosyo ni yitela ya akesha, ni ŵayipacile golidi.

Kupanganya kwa mawuta gakupakasya ni kwa ubani

²⁹ Ŵapanganyisye soni mawuta gamaswela gakupakasya, ni ubani wa liwungo lyambone. Ŵapanganyisye mpela mwele m'misili jwakusapanganya yakununjila akusatendelaga.