Ekisodo 36 - Chiyawo Bible

¹ “Besalele ni Oholiyabu, pampepe ni afundi wosope ŵele AMBUJE* ŵapele lunda lwa umisili, ni kumanyilila kupanganya masengo ga mtundu uliwose, gakusosekwa pakutaŵa Nyumba ja AMBUJE, ni ŵitapanganye yosope jemanjajo, mpela muŵalamulile AMBUJE.”

Ŵandu akwika nayo yakupeleka yawo yejinji

² Ni Mose* ŵaŵilasile Besalele, Oholiyabu ni afundi wosope ŵele AMBUJE ŵapele lunda ni ŵandu wosope ŵa mtima wakulipeleka kukamucisya kutenda masengo. Mose ŵasalile kuti atande kupanganya masengogo.

³ Mose ni ŵapele jemanjajo yakupeleka yiŵayice nayo ŵandu ŵa ku Isalaeli mwalulele, yakutaŵila Nyumba ja AMBUJE. Nambo ŵandu ŵa ku Isalaeliwo ŵaliji mkupelekape kwa Mose yakupeleka yalulele kundaŵi kulikose.

⁴ Myoyo amisili wosope ŵiŵatendaga masengo gakutaŵa Nyumba ja AMBUJE ŵala, jwalijose malinga ni umisili wakwe ŵatesile masengo gawo,

⁵ ni ŵayice kukumsalila Mose kuti, “Yida yakwika nayo ŵanduŵa yakutendela masengo yitupile, yikupunda mlingo ŵa yida yitukutendela masengo gele AMBUJE giŵatulamwile kuti gatendekwe.”

⁶ Myoyo Mose ŵalamwile ŵandu wosope kuti, “Jwamlume jwalijose ni jwamkongwe jwalijose akapeleka soni yakupeleka yakutaŵila Nyumba ja AMBUJE.” Myoyo ŵandu wosope ŵalesile kwika ni yakupeleka,

⁷ pakuŵa yida yiŵaliji ali asongenye, yaliji yakwanila kumalisya masengo gosope, soni yine mpaka kusigala.

Kupanganya kwakwe kwa citenti ca AMBUJE

⁸ Myoyo amisili wosope ŵacilume ŵiŵaliji pasikati pa ŵandu ŵakutenda masengo ŵala, ŵapanganyisye citenti ca AMBUJE ni nguwo likumi sya bafuta jwakusalala ni jwamluce cenene, soni ni nguwo sya buluwu, sya papo, ni syecejewu, nguwo syosopesyo ŵasipetile cenene ni yitusitusi ya akelubi.

⁹ Nguwo jilijose jaliji mamita 13 mcilewu mwakwe, ni masentimita 183 mcijipi. Nguwo syosopesyo syaliji syakulandana.

¹⁰ Ni ŵasitotekenye pampepe nguwo msano kuti siŵe nguwo jimo, soni ŵasitotekenye pampepe msano sine sila, kuti siŵe nguwo jimo.

¹¹ Ni ŵatotile mapogolo ga tuguwo twa buluwu mumbali mwa nguwo jimo kusa kwakwe, ni ŵatotile soni mapogolo gatuguwo twa buluwu pa nguwo jine jila.

¹² Ŵatotile mapogolo 50 pa nguwo jandanda jila, ni mapogolo 50 pa nguwo jine jila, gakulolegana ni mapogolo ga nguwo jandanda jila.

¹³ Ŵapanganyisye yakoloŵecela ya golidi 50, ni ŵasilumbikenye nguwo syasikulungwa siŵili sila ni yakoloŵecelayo. Pakutenda myoyo citenti ca AMBUJE capanganyidwe kuŵa cimo.

¹⁴ Ŵapanganyisye soni nguwo sya manyunya ga mbusi likumi kwisa lumo, ni ŵapanganyisye cakuwunicila penani pa citenti cila.

¹⁵ Nguwo jilijose jaliji ja mamita 14 mcilewu, ni masentimita 183 mcijipi. Nguwo syosopesyo syaliji syakulandana.

¹⁶ Ŵasitotekenye nguwo msano kuŵa nguwo jimpepe, ni nguwo sine msano ni jimo syakusigalasyo ŵasitotekenye pampepe kuŵa nguwo jimo.

¹⁷ Ni ŵatotile soni mapogolo ga tuguwo 50 mumbali mwa nguwo ja kumalicisya ja nguwo jandanda jila, ni mapogolo gane 50 mumbali mwa nguwo jinejo.

¹⁸ Panyuma pakwe ŵapanganyisye yakoloŵecela 50 ya cisyano ca kopa* yakulumbikanyicila pampepe nguwo siŵilisyo, kuti apanganye nguwo jimo jakuwunicila citenti ca AMBUJE.

¹⁹ Ni ŵapanganyisye cakuwunicila cine cecejewu ca mapende ga ngondolo sya mkambako. Pakumalicisya ŵapanganyisye soni cakuwunicila cine ca mapende gakuŵeŵela ga mbusi, ni ŵaciŵisile pacanya pa yakuwunicila yosope.

²⁰ Ŵapanganyisye mafelemu ga citentico ni matabwa ga citela ca akesha.*

²¹ Felemu jilijose jaliji mamita mcece mcilewu, ni masentimita 69 mcijipi.

²² Felemu jilijose jakwete mwakulumbikanila ni felemu jijakwe muŵili. Mafelemu gosope ŵapanganyisye ni mwakulumbikanila mwa mtundu welewo.

²³ Ŵapanganyisye mafelemu 20 ga mbali ja kum'mwela,

²⁴ ni yakwimicila pasi pakwe 40, pa felemu jilijose ŵapanganyisye yakutamicila yakwe yiŵili ya silifa,* yakamulana ni mwakulumbikanila muŵili mula.

²⁵ Ŵapanganyisye soni mafelemu 20 gakuŵika kumbali ja kumpoto ja citentico,

²⁶ ni yakwimicila pasi pakwe 40 ya silifa, yakwimicila yiŵili pasi pa felemu jilijose.

²⁷ Ŵapanganyisye soni mafelemu gane msano ni jimo gakuŵika kunyuma kwakwe kwa citentico cakungapilo lyuŵa,

²⁸ ni mafelemu gaŵili gakuŵika pa ndumba sya kunyuma kwakwe kwa citentico.

²⁹ Mafelemu gaŵili ga pandumba galiji gakulekangana capasi pakwe nambo galiji gelumbikane pamo pa mbete jandanda jijaliji kwinani kwa citenti. Ni mwele muŵapanganyicisye mafelemu gaŵili gakupanganya ndumba siŵili sya citenti.

³⁰ Myoyo gapali mafelemu msano ni gatatu gana yakwimicila pasi pakwe 16 ya silifa, yakwimicila yiŵili pasi pa felemu jilijose.

³¹ Ni ŵapanganyisye mbalaŵala sya yitela ya akesha, syakuŵika pacanya pa mafelemu ga mbali jimo ja citenti,

³² ni msano sine syakuŵika pacanya pa mafelemu ga mbali jine, soni msano sine syakuŵika pacanya pa mafelemu ga kungapilo lyuŵa, kunyuma kwa citenti.

³³ Myoyo ŵapanganyisye mgomba wakupita pasikati pa citenti, ŵakamula mafelemu gosope, kutandila mbali jimo ja citenti mpaka mbali jine.

³⁴ Mafelemu gosopego ŵapacile golidi,* ni ŵapanganyisye mbete sya golidi syakuti akapisye mgomba ula, wuŵawupacile soni golidi.

³⁵ Ni ŵatotile nguwo jakucijila mkati mwa citenti ja mtundu ŵa buluwu, ŵa papo, ni wecejewu, soni nguwo ja bafuta jwakunyililika, jeluce cenene, ni ŵajipetile ni yitusitusi ya akelubi.

³⁶ Ŵapanganyisye njalamila mcece sya yitela ya akesha, syakuja kukoleka nguwo jakucijila jila. Njalamilasyo syaliji syepace golidi, ni ŵaŵisile yakukolecela pa njalamilasyo. Ni ŵalinganyisye yakutamicila njalamila mcece ya silifa.

³⁷ Pa mlango wakwinjilila mu tentimo ŵaŵisile nguwo jakuciga ja mtundu wa buluwu, wa papo ni wecejewu, ni nguwo ja bafuta jakusalala, jeluce ni jepete cenene.

³⁸ Myoyo ŵapanganyisye njalamila msano syana yakolecela nguwojo, ni penani pa njalamilasyo ni migomba jakwe ŵajipacile golidi, nambo yakwimicila yakwe msano yaliji ya cisyano ca kopa.