Ekisodo 35 - Chiyawo Bible

Malamusi ga lisiku lyakupumula

¹ Mose* ŵaŵilasile Aisalaeli wosope, ni ŵasalile kuti, “Aga ni Malamusi ga AMBUJE ga yindu yakuti mtendeje,

² Mkamuleje masengo genu masiku msano ni limo. Nambo lisiku lya msano ni gaŵili, tiliciŵa lisiku lya sabato lyeswela, lisiku lyakupumula, lyakwacimbicisya AMBUJE. Mundu jwalijose jwakutenda masengo pa lyele lyuŵali, akwenela kuwulajidwa.

³ Mkasimkolesya moto m'majumba mwenu pa lisiku lya sabato.”

Yakupeleka yakutaŵila citenti ceswela ca AMBUJE

⁴ Mose ŵasalile ŵandu wosope ŵa ku Isalaeli ŵala kuti, “Ayi ni yindu yakulamula AMBUJE kuti,

⁵ ‘Mpeleceje yakupeleka kwa AMBUJE. Myoyo mundu jwalijose jwakwete mtima wakusaka kupeleka kwa une, ayice nayo yakupeleka ayi: golidi,* silifa,* kopa*

⁶ soni nguwo sya litonji sya buluwu, syecejewu ni sya mtundu wa papo. Ayiceje ni nguwo ja bafuta jakutililika, ni nguwo jakupanganyikwa ni manyunya ga mbusi,

⁷ mapende ga ngondolo geloŵece mu utoto wecejewu, mapende gakuŵeŵa ga mbusi, matabwa ga yitela ya akesha,*

⁸ mawuta ga nyali, yindu ya kununjila yakupanganyicisya mawuta gakupakasya, soni yakupanganyicisya ubani* wakununjila cenene,

⁹ mpocele soni maganga ga onikisi ni maganga gane gakusalala, gakuŵika pa cakuwala ca ŵakutaga mbopesi ca efodi* ni cakuwala pamtima.’ ”

Yida yakuŵika mu citenti cakusimanilana ni AMBUJE

¹⁰ “Ŵandu wosope ŵali afundi pasikati penu ayice, ni apanganye yindu yosope yiŵalamwile AMBUJE.

¹¹ Apanganye citenti ca AMBUJE, ni yakuwunicila yakwe, yakukolecela, mafelemu gakwe, mitwalo jakwe, njalamila pampepe ni yakwimicila yakwe.

¹² Apanganye soni Libokosi lya Cilanga* ca AMBUJE* lyakuŵika malamusi, ni mbiko syakwe sya kunyakulila, ciwuniko ca Libokosi, ni nguwo syakwe syakucijila libokosilyo,

¹³ tebulo pampepe ni mbiko syakwe syakunyakulila, ni yida yakwe, ni soni mikate jakupeleka kwa Mlungu ndaŵi ni ndaŵi mwangalecesya,

¹⁴ cakuŵika nyali ni yida yakwe, nyali ni mawuta gakwe,

¹⁵ malo gakupelecela mbopesi jakututumisya ubani, ni mbiko syakwe sya kunyakulila, mawuta gakupakasya, ubani wa liwungo lyambone, ni nguwo syakucijila pa mlango wa citenti ceswela ca AMBUJE.

¹⁶ Apanganye soni malo gakupelecela mbopesi syakoca, pamo ni sefa ja kopa, mbiko syakwe syakunyakulila, ni yida yakwe yosope, libeseni lyakunaŵila ni cakutamicila cakwe,

¹⁷ nguwo syakucijila luŵala, njalamila pamo ni yakwimicila yakwe, nguwo syakucijila pa cipata cakwinjilila mluŵala,

¹⁸ yicili pamo ni ngonji sya citenti ceswela ca AMBUJE ni sya luŵala lwakwe,

¹⁹ nguwo syakusalala mnope syakuwala ŵandu ŵakutumicila ku malo gamaswela, soni yakuwala yeswela ya jwakutaga mbopesi Aloni,* ni ŵanace ŵakwe ŵacalume, ndaŵi jakutumicila mpela ŵakutaga mbopesi.”

Ŵandu akwika nayo yakupeleka

²⁰ Myoyo Aisalaeli wosope ŵala ŵatyosile pa malo pala ni kumleka Mose.

²¹ Mundu jwalijose juŵaliji m'misili, ni mundu jwalijose jwa mtima ŵakusaka kupeleka, ŵayice kwa AMBUJE ni yakupeleka yakutaŵila citenti cakusimanilana, ni yida yakupanganyicisya yindu yakusosekwa pa ndaŵi ja mapopelo, ni soni kupanganyicisya yakuwala ya ŵakutaga mbopesi.

²² Myoyo ŵayikangene acalume ni acakongwe. Mundu jwalijose ŵayice mwakusaka kwakwe ni yindu yakusalalisya yakuŵika pa yakuwala, ndolo sya m'mapikanilo, mbete, mkufu wa mlukosi, ni yindu yine yakusalalisya ya golidi, ŵayipelece kwa AMBUJE.

²³ Mundu jwalijose juŵakwete nguwo sya buluwu, syecejewu ni sya papo, nguwo sya bafuta sya litonji lyakutililika cenene, nguwo syakupanganyidwa ni manyunya ga mbusi, mapende ga ngondolo geloŵece mu utoto wecejewu, ni mapende ga kuŵeŵa ga mbusi, ŵayice nayo.

²⁴ Ŵandu ŵane ŵaŵakombwele kupeleka silifa kapena kopa, ŵayice nayo kuyipeleka kwa AMBUJE. Ni jwalijose juŵakwete matabwa ga yitela ya akesha, gakukomboleka kutendela masengo gakutaŵago, ŵayice nago.

²⁵ Acakongwe ŵaŵakwete lunda lwakupanganya nguwo pa yala, ŵayice ni nguwo siŵapanganyisye sya mtundu wa buluwu, wecejewu ni wa papo. Ŵayice soni ni nguwo sya bafuta sya litonji lya kutililika cenene.

²⁶ Acakongwe ŵalundawo ŵapanganyisye soni nguwo ni manyunya ga mbusi.

²⁷ Acakulungwakulungwa ŵayice nago maganga ga onikisi ni maganga gane gakuŵika pa cakuwala ca efodi ni pa cakuwala pamtima.

²⁸ Ŵapelece soni yakununjila, mawuta ga nyali, mawuta gakupakasya ni ubani wa liwungo lyambone.

²⁹ Myoyo Aisalaeli wosope, ŵa acalume ni acakongwe, ŵiŵasacile ni mtima wawo wosope kupeleka yindu yawo ku masengo gele AMBUJE ŵalamwile kupitila mwa Mose, kuti gatendece, ŵayice ni yakupeleka yawo kwa AMBUJE.

Ŵandu ŵakupanganya citenti ca AMBUJE

³⁰ Panyuma pakwe Mose ŵasalile Aisalaeli kuti, “AMBUJE amsagwile Besalele, mwanace jwa Uli, cisukulu ca Huli jwa mtundu wa Yuda.

³¹ Mlungu amgumbesye ni Msimu wakwe, kwakuti sambano ali m'misili, ni akwete lunda ni kumanyilila, akugamanyilila masengo ga mtundu uliwose gati mpela aga:

³² Kulemba mapulani ga masengo ga umisili, ni kukamulisya masengo golidi, silifa ni kopa.

³³ Akumanyilila kusokota maganga gakusalalisya yindu, kugoba matabwa, ni kutenda masengo gosope ga umisili.

³⁴ Myoyo AMBUJE apelece lunda kwa jwalakweju ni kwa Oholiyabu mwanace jwa Ahisamaki, jwa mtundu wa Dani, kuti ŵajiganye ŵandu ŵane umisili wawo.

³⁵ AMBUJE ŵapele jemanjaji lunda, lwakupanganya masengo ga mtundu uliwose gakutenda ŵandu ŵa ku sokota, afundi wakulekanganalekangana, ni ŵandu ŵakupanganya nguwo sya mtundu wa buluwu, syecejewu, sya papo ni nguwo sya bafuta sya litonji lya kutililika cenene. Akugamanyilila ni kugatenda masengo ga umisili wa mtundu uliwose.