Ekisodo 34 - Chiyawo Bible

Yiduswa yiŵili ya maganga

¹ AMBUJE* ŵamsalile soni Mose* kuti, “Msepe mawubawo ga maganga gane gaŵili gamti mpela gandanda, kuti une lembe maloŵe gele galiji pa mawubawo ga maganga gandanda gamwakasile gala.

² Mliŵicile cile kundaŵi, mkwele Litumbi lya Sinayi kundaŵi, kuti timsimane ni une penani petumbi.

³ Mkuyika ni mundu jwine jwalijose, soni jwine akawonecela ku mbali jilijose ja litumbilyo. Ngondolo kapena ng'ombe sikalya mungulugulu litumbilyo.”

⁴ Myoyo Mose ŵasepile mawubawo gane gaŵili ga maganga gamti mpela gandanda gala, ŵajimwice kundaŵi ndaŵipe, ni ŵakwesile Litumbi lya Sinayi mpela mwele muŵamlamulile AMBUJE, ali ajigele mawubawo gaŵili ga maganga m'myala mwakwe.

⁵ AMBUJE ŵatulwice m'mawunde, ni ŵajimi piŵaliji Mose, ŵalikolasile lina lyawo lyakuti AMBUJE.

⁶ Ŵajesile pameso pa Mose ni ŵaŵecete mwakwesya maloŵe kuti, “Une, AMBUJE, ndili Mlungu jwa canasa, ni jwambone mtima, jwangatumbila citema, ŵakugumbala ni cinonyelo cangamala, soni jwakulupicika kwa ŵandu ŵakwe.

⁷ Akusalosya cinonyelo cawo cangamala kwa ŵandu ŵajinji, ni akwakululucila yakulemwa yawo, yangalumbana yawo ni ulemwa* wawo. Nambo ngasiŵalecelela ŵakulemwa, ni tacipeleka yipwetesi kwa ŵanace ŵawo ni kwa yisukulu yawo, mpaka mpago watatu mpaka wa mcece, ligongo lya yakusakala ya acatati ŵawo.”

⁸ Ndaŵi jijojo Mose mwacitema citema, ŵatindiŵele pasi ni kulambila.

⁹ Mose ŵatite, “Naga asalalile une mtima, ŵalakwe AMBUJE, ngwaŵenda kuti alongane ni uweji. Atamose kuti ŵanduŵa ali ŵamakani, nambo ŵalakwe atukululucile yileŵi ni ulemwa wetu, ni atupocele uweji, kuti tuŵe ŵandu ŵawo.”

Akuwilisya kutenda Cilanga

¹⁰ AMBUJE ŵatite, “Nguŵika cilanga.* Tindende yakusimonjeka yayikulungwa pameso pa ŵandu ŵenu wosopeŵa, yele yimkaniyitendece kala kose pa cilambo cosope capasi, kapena pasikati pa ŵandu ŵa mitundu jine.* Ŵandu wosope ŵamli nawoŵa tayilole yindu yele une AMBUJE tinayitende, pakuŵa yindu yitinayitende kupitila mwa m'mwejo yili yakogoya mnope.

¹¹ Mgasunje malamusi gangumlamula lelo jinoga. Tinjatoposya Aamoli, Akenani, Ahiti, Apelesi, Ahifi ni Ayebusi.

¹² Mkalolecesye kuti, mkaja kutenda nawo cilanga ŵandu ŵa cilambo cimkwawulaco, ni mkaŵa kuja kuŵa nyambo pasikati penu jakumtendekasya yakulemwa.

¹³ Mkagumule malo gawo gakupelecela mbopesi, ni kuyigwisya yipilala yawo, soni mkayikate yitela yilandanyo yosope ya mlungu jwawo Ashela pa malo pakutendela mapopelo gawo.

¹⁴ “Mkaja kulambila mlungu jwine jwalijose, ligongo Une, AMBUJE jwangasosa ukangani.

¹⁵ Mkaja kutenda nawo cilanga, ŵandu ŵa ku cilambo celeco, ligongo ndaŵi jakutenda yindu yawo yakusakala pa ndaŵi jakujilambila milungu jawo, ni kujitajila mbopesi, takamŵilanje kuti mkatame nawo ni kulya cakulya ca mbopesi syawo.

¹⁶ Timkatande kwajigalila ŵanace ŵenu ŵacalume, ŵanace ŵa acakongwe ŵa cele cilamboco, kuti ŵalombe. Sambano pitakatande acakongwe ŵeleŵa kutenda yakusakala pakujitumicila milungu jawo, takanyenjelele ŵanace wenu ŵacalume kuti akatendeje yakusakala ni kujitumicila milungu jawo.

¹⁷ “Mkalipanganyicisya milungu ja kunyelenyendula.

¹⁸ “Mkatendeje cindimba ca mikate jangali cakusasaŵilisya mpela munamlamulile. Mkalyeje mikate jangali cakusasaŵilisyajo pa ndaŵi jakwe kwa masiku msano ni gaŵili, m'mwesi ŵa Abibu,* ligongo pa wele mwesi ŵa Abibu ni wumwakopwece jemanja mcilambo cila ca Iguputo.

¹⁹ “Mwanace jwalijose jwamlume jwandanda kupagwa, ni mwanace jwalijose jwamlume jwandanda kupagwa, jwa ng'ombe kapena jwangondolo ali jwangu.

²⁰ Nambo mkamwomboleje mwanace jwandanda kupagwa jwa bulu, pakupeleka ngondolo m'malo mwakwe. Naga mkulepela kumwombola mkaposokoleje lukosi lwakwe. Ŵanace ŵenu ŵosope ŵacalume ŵandanda kupagwa mkawomboleje. “Pangali mundu jutaciyika pameso pangu ali jwangali kandu kakupeleka myala mwakwe.

²¹ “Mkatendeje masengo masiku msano ni limo, nambo pa lisiku lya msano ni gaŵili, mkaja kutenda masengo gali gose, atamose pa ndaŵi ja kulima kapena jagowola.

²² “Mkatendeje cindimba ca masika* pamtimkatandeje kugowola tiligu jwenu jwandanda, ni soni cindimba cakututa yakugowola yenu yosope pakumala pa caka.

²³ “Ŵandu ŵacalume wosope awoneceleje pameso pa une, AMBUJE, Mlungu jwa Aisalaeli, katatu pa caka.

²⁴ Tingajitoposye mitundu jine ja ŵandu ndaŵi jimkwika jemanja mcilamboco, ni kugakusya malile ga cilambo cenu. Pangali jutacisaka kusumula cilambo cenuco pa gele masiku gatatu ga pa caka, gakwawula kuja kulilosya pameso pa une AMBUJE Mlungu jwenu.

²⁵ “Ndaŵi jimkupeleka miasi ja mbopesi kwa une, mkajipeleka pampepe ni mikate jana cakusasaŵilisya. Mbali jilijose ja nyama jijawulajidwile cindimba ca Pasaka,* mkajisunga mpaka kundaŵi.

²⁶ “Myiceje ni yagowola yakutanda, yambone mnope, ya ku migunda kwenu, ku Nyumba ja AMBUJE Mlungu jwenu. “Mkateleka kamwanace ka nyama mu mkaka wa mamagwe.”

²⁷ AMBUJE ŵamsalile Mose kuti, “Mlembe gele maloŵega, ligongo ni gele maloŵega nguŵika cilanga ni m'mwejo ni Aisalaeli wosope.”

²⁸ Mose ŵatemi ni AMBUJE kwitumbi kula, ngalya cakulya cilicose, soni ngamwa mesi, kwa masiku 40, musi ni cilo. Ni AMBUJEWO ŵalembile pa mawubawo ga maganga gaŵili gala maloŵe ga cilanga, gele gali malamusi likumi.

Mose akutuluka mwitumbi mula

²⁹ Myoyo Mose ŵatulwice kuwuma Kwitumbi lya Sinayi. Ndaŵi jiŵatulukaga Mose Kwitumbi lya Sinayi ali ajigele mawubawo gaŵili ga maganga ga malamusi gala, nganamanyilila kuti ngope jakwe jaliji jakunyesimila ligongo lyakuŵecetana ni Mlungu.

³⁰ Aloni* ni ŵandu wosope ŵa ku Isalaeli piŵamlolite Mose, ŵajiweni ngope jakwe kuti jaliji ja kunyesimila, ŵatesile woga ni nganasaka kumŵandicila.

³¹ Nambo Mose ŵaŵilasile, ni Aloni ni acakulungwakulungwa ŵa ku Isalaeli ŵawujile, ni Mose ŵatandite kuŵeceta nawo.

³² Panyuma pakwe Aisalaeli wosope ŵasejelele pakuŵandika, ni Mose ŵapele malamusi gosope ga ŵamsalile AMBUJE Kwitumbi lya Sinayi kula.

³³ Mose piŵamasile kuŵecetana ni ŵandu ŵala, ŵaliwunicile ngope jakwe.

³⁴ Ndaŵi syosope Mose piŵajinjilaga mu citenti kuja kuŵecetana ni AMBUJE, ŵatyosyaga nguwo jiŵaliwunicilaga pa ngope jila mpaka pa ndaŵi jakopoka. Ali akopwece, ŵaliji mkwasalila Aisalaeli ŵala yosope yiŵamlamulile AMBUJE kuti asale.

³⁵ Ŵanduwo ŵajiwonaga ngope ja Mose kuti jaliji jakunyesimila, Mosejo ŵaliji mkuliwunicila ngope jakwe mpaka ndaŵi jine jakuti ajawule soni kuja kuŵecetana ni AMBUJE.