Ekisodo 33 - Chiyawo Bible

AMBUJE akwalamula Aisalaeli kuti atyoce Kwitumbi lya Sinayi

¹ AMBUJE* ŵamsalile Mose* kuti, “Mtyoce akuno pampepe ni ŵandu ŵimwayice nawo kutyocela ku Iguputo, ni mjawule ku cilambo cinaŵisile cilanga* kuti tinjipeleka kwa Abulahamu,* Isaki ni Yakobo.* Nasalile jemanjajo, jele ndaŵijo kuti, ‘Cilambo celeci tinjicipeleka kwa yisukulu yenu.’

² Tinalitume lilayika kuti limlongolele, tingatoposye Akenani, Aamoli, Ahiti, Apelesi, Ahifi ni Ayebusi.

³ Mjawule ku cilambo ca cajila cambone. Nambo une nginjawula nawo, ligongo mli ŵandu ŵamakani, ni mkaŵa une kumjonanga jemanja petala.”

⁴ Piŵagapikene gele maloŵe gakogoyaga, ŵandu ŵatandite kulila, ni paliji pangali mundu juŵawete yakuwala yakusalala.

⁵ Pakuŵa ndaŵi jeleji, AMBUJE ŵaliji ali amsalile Mose* kuti, “Mwasalile Aisalaeliwo kuti, ‘Jemanja mli ŵandu ŵamakani, ngajawule pampepe ni jemanja, ni ngam'masile, myuu! Sambano mwule yakusalalisya yenu, une timanyilile yakuti namtende jemanja.’ ”

⁶ Myoyo kutandila piŵatyosile Aisalaeli Kwitumbi lya Sinayi, nganawala soni yakusalalisya.

Citenti cakusimanilana AMBUJE ni ŵandu ŵakwe

⁷ Mose ŵacijigalaga citenti cila ni kucitaŵa kusa kwa masakasa gala, cakutalicila nditu. Ŵacipele lina lyakuti, “Citenti cakusimanilana ni AMBUJE.” Jwalijose juŵasacile kuja kuwusya kandu kwa AMBUJE, ŵakopokaga ku masakasa ni kwawula ku citenti ca kusimanilanaco.

⁸ Ndaŵi syosope Mose pati acijawulaga ku citentico, ŵandu wosope ŵaliji mkwima. Jwalijose ŵaliji mkwima pa mlango ŵa cisakasa cakwe, ali mkumlolecesya Mose mpaka ali ajinjile mu citenti cakusimanilana ni AMBUJE cila.

⁹ Ali ajinjile Mose mu citenti mula, cipilala ca liwunde caliji mkutuluka ni kwima pa mlango wa citentico, ni AMBUJE ŵaliji mkuŵecetana ni Mose kutyocela mwiwundemo.

¹⁰ Ŵandu ŵala ŵatiji mkuciwona cipilala ca liwundelyo pa mlango wa citentico, ŵajimaga ni kulambila, jwalijose ali pa mlango wa cisakasa cakwe.

¹¹ Myoyo AMBUJE ŵaŵecetanaga ni Mose pameso ni pameso, mpela mundu mwakusaŵecetelanaga ni m'mbusangagwe. Mose ŵawujilaga soni ku masakasa kula. Nambo Yoswa, mwanace jwa Nuni, juŵaliji jwakutumicila jwa Mose, nginatyokaga ku citentiko.

Cilanga cakuti AMBUJE taciŵa nawo

¹² Mose ŵasalile AMBUJE kuti, “Ŵalakwe asalile une kuti, nalongole ŵanduŵa ku cilamboco, nambo nginasalila mundu jutamtume kuti alongane ni une. Soni ŵalakwe atite kuti, ngum'manyilila cenene m'mwejo, ni ngusangalala namwe.

¹³ Ni ligongo lyakwe sambano ngwaŵenda kuti, naga une asalalile mtima, andosye matala gawo kuti namanyilile ŵalakwe, soni kuti apunde kusalalila mtima. Akumbucile soni kuti mtundu wa ŵanduŵa uli wawo.”

¹⁴ AMBUJE ŵatite, “Une namsyene tinjawule namwe, ni tinampe mtendele.”

¹⁵ Mose ŵasalile AMBUJE kuti, “Naga ŵalakwe ngakwawula pampepe ni uwe, akakunda kuti uwe tutyoce apano.

¹⁶ Nambi tiyicimanyika uli kuti, ŵalakwe une asalalile mtima pampepe ni ŵandu ŵawoŵa? Ana ngati ligongo akasalongana ni uweji, une pampepe ni ŵandu ŵawoŵa, kuti tuŵeje ŵakulekangana ni ŵandu ŵane ŵosope ŵa pa cilambo capasi?”

¹⁷ AMBUJE ŵamsalile Mose kuti, “Tindende mpela mumŵecetelemo, ligongo namsalalile mtima, soni ngum'manyilila cenene.”

¹⁸ Mose ŵaŵendile AMBUJE kuti, “Conde angunde une, kuti nawone ŵalakwe mkati mwakumelemenda kwa lilanguka lyawo.”

¹⁹ AMBUJE ŵajanjile kuti, “Tinamlosye kumelemenda kwa lilanguka lyangu, tinjilikolanga lina lyangu lyakuti AMBUJE pameso penu. Tinjasalalila mtima ni kwatendela canasa ŵandu ŵele ŵinasagwile.”

²⁰ AMBUJE ni ŵatite, “Nambo ngasimjiwona ngope jangu, ligongo pangali mundu jwampaka ambone une, ni kutama ni umi.”

²¹ Ni ŵatite soni kuti, “Pakuŵandikana ni une apano pana liganga, m'mwejo mjime pegangalyo.

²² Sambano patikupiteje kumelemenda kwa lilanguka lyangu, tinamŵice mugangasice ligangalyo, ni tinamwunicile ni mkono wangu mpakana pa timbite une.

²³ Tinjityosya mkono wangu, timciwuwona mgongo wangu, nambo ngasimjiwona ngope jangu.”