Ekisodo 32 - Chiyawo Bible

Mwanace jwa ng'ombe jwa golidi

¹ Ŵandu piŵalolite kuti Mose* atemi masiku gamajinji kwitumbi ngatuluka, ŵasongene kwa Aloni* ŵamsalile kuti, “Kwende atupanganyicisye milungu jakuti jitulongolele uŵe, pakuŵa ngatukumanyilila yimwonecele Mose, jwele juŵatulongolele pakutukoposya ku Iguputo kula.”

² Myoyo Aloni ŵasalile ŵanduwo kuti, “Mkatyosye ndolo sya golidi* syawete m'mapikanilo aciŵamkwenu, ŵanace wenu ŵacalume ni ŵacakongwe ŵakwe, ni myice nayo kwa une.”

³ Ŵanduwo ŵawusile ndolo syawo, ni ŵayice nasyo kwa Aloni.

⁴ Myoyo Aloni ŵapocele golidijo kutyocela m'myala mwa ŵanduwo, ni ŵasungunukwile, ni ŵapananganisye mwanace jwa ng'ombe jwakwenga m'cikombole. Ni ŵandu ŵatandite kugumila kuti, “Jemanja Aisalaeli, aji ni milungu jenu jijamkopwesye ku Iguputo.”

⁵ Aloni piŵalolite yeleyi, ŵataŵile malo gakupelecela mbopesi pasogolo pa mwanace jwa ng'ombe jwa golidijo. Ni ŵagombelesye kuti, “Malaŵi tipaŵe cindimba cakumcimbicisya AMBUJE.”*

⁶ Ŵajimwice kundaŵindaŵipe, ni ŵapelece mbopesi syakutinisya, ni ŵayice nasyo soni mbopesi sya mkamulano. Ŵanduwo ŵatemi pasi ni ŵatandite kulya ni kumwa, panyuma pakwe ŵatandite kuŵina.

⁷ AMBUJE ŵamsalile Mose kuti, “Mtuluce citema mwitumbi muno, pakuŵa ŵandu ŵenu ŵimwalongolele pakwakoposya mu Iguputo ŵala, atesile ulemwa* ni anganile une.

⁸ Alesile mwacitema yosope yene yila yinalamwile kuti ayitendeje. Alipanganyicisye mwanace jwa ng'ombe jwakusungunula jwa golidi, akumlambila ni akumtajila mbopesi, ali mkusala kuti, ‘Aji ni milungu jenu jijamkopwesye mcilambo ca Iguputo.’ ”

⁹ AMBUJE ŵamsalile Mose kuti, “Ngwamanyilila ŵandu ŵeleŵa kuti ŵamakani.

¹⁰ Ni ligongo lyakwe sambano, mundece kuti najonanje jemanjaji, ligongo ndumbile mnope, nambo m'mwejo pamo ni yisukulu yenu tinamtende lukosyo lwekulungwa lwa ŵandu.”

¹¹ Nambo Mose ŵadandawulile AMBUJE Mlungu ŵawo, kuti, “Ŵalakwe AMBUJE, ligongo cici akwatumbilila ŵandu ŵawo camti myiyi, ŵandu ŵimwakopwesye mcilambo ca Iguputo ni macili genu gamakulungwa, ni mkono wenu wamacili?

¹² Ana akusosa kuti Aiguputowo tajile kuti, ‘Ŵakopwesye Aisalaeli ku cilambo ca Iguputo ni nganisyo syakusakala, syakusosa kuti akawulajile ku matumbi ni kwajonanga wosope, kuti akawoneka soni pa cilambo ca pasi?’ Ukali wawo AMBUJE wakolela mpela motowo conde awutulasye, akajonanga ŵandu ŵawo.

¹³ Ŵakumbucile ŵakutumicila ŵawo ŵala Abulahamu,* Isaki, ni Yakobo* ni yindu yeyila yiŵaŵisile ŵalakwe cilanga* pakulumbila pa lina lyawo, ndaŵi jiŵasalile kuti, ‘Tinjimpa yisukulu yejinji, winji wakwe mpela ndondwa sya kwinani. Tinjiyipa yisukulu yenuyo cilambo cosope cinaŵisile cilanga. Cilambo celeci ticiciŵa cawo mpaka kalakala.’ ”

¹⁴ Myoyo AMBUJE ŵalesile kupeleka cilango cakogoya ciŵatiji ŵagwicisye ŵandu ŵakwewo.

¹⁵ Mose ŵagalawice, ni ŵatulwice mwitumbi mula ali ajigele mawubawo gaŵili ga maganga ga malamusi, gelembe mbali syosope siŵili.

¹⁶ Mlungu msyene ni ŵaŵapanganyisye mawubawo gelega, ni ŵalembile malamusigo mwakusokota pa magangago.

¹⁷ Yoswa ŵapikene ŵandu ali mkugumila, ni ŵamsalile Mose kuti, “Ngupikana lisegwe lya ngondo ku masakasako.”

¹⁸ Nambo Mose ŵatite, “Lisegwe lyelelyo ngalikupikanika mpela lisegwe lyakupunda pa ngondo, kapena kulila kwa ŵandu ŵakulepela pa ngondo. Une ngupikana lisegwe lya kwimba.”

¹⁹ Mose piŵagaŵandicile masakasa gala, ni pa kumwona mwanace jwa ng'ombe jwa golidi jula ni kwawona ŵandu ali mkuŵina, ŵapile mtima mnope. Ŵagaponyisye pasi maganga, gigaliji m'myala mwakwe gala, ni ŵagakasile mungulugulu mwa litumbi lila.

²⁰ Myoyo ŵamjigele mwanace jwa ng'ombe juŵampanganyisye jula ni ŵamjocile pa moto, ŵamsyajile mpela utandi ni ŵamjasile m'mesi. Mose ŵamwesisye Aisalaeli mesigo.

²¹ Kaneko Mose ŵamwusisye Aloni kuti, “Ana ŵandu ŵeleŵa ŵamtesile cici m'mweji, kwa mpaka kwatendekasya ulemwa wakogoya camti myiyi?”

²² Aloni ŵajanjile kuti, “Akandumbilila une ambuje ŵangu. Paja akwamanyilila ŵandu ŵeleŵa kuti ŵakwanonyela yindu yakusakala.

²³ Jemanjaji ŵasalile une kuti, ‘Mtupanganyicisye uwe milungu jakuti jitulongolele uweji, pakuŵa ngatukumanyilila yimwonecele Mose, juŵatulongolele pakutukoposya ku Iguputo.’

²⁴ Myoyo une nasalile kuti, ‘Jwalijose jwakwete golidi ayice najo kwa une,’ ŵandu ŵaŵakwete yindu yakupanganyidwa ni golidi ŵambele uneji. Nayiponyisye pa moto, napanganyisye mwanace jwa ng'ombe jwa golidi jula.”

²⁵ Mose ŵayiweni kuti ŵandu ŵala sambano ŵaliji ŵasokonecele (ligongo Aloni ŵalecelele Aisalaeli kutenda yindu yakutesya usilu, pameso pa amagongo ŵawo).

²⁶ Mose ŵajimi pa cipata cakwinjilila ku masakasa gala ni ŵagumisile mwakwesya maloŵe ni ŵawusisye kuti, “Ana ŵani ŵakwasaka AMBUJE? Ayice akuno.” Ni Alefi ŵosope ŵajaŵile kuŵaliji Mose.

²⁷ Mose ŵasalile kuti, “AMBUJE Mlungu jwa Aisalaeli, akusala kuti, ‘Jwalijose jwa jemanja ajigale upanga, ni mjawule ku masakasa ni kwinjila m'yipata yosope. Jwalijose akamwulaje mlongo mjakwe kapena jwa cinasi kapena m'mbusanga jwakwe.’ ”

²⁸ Alefi ŵala ŵatesile mpela mwele Mose ŵalamulile, acalume 3,000 ŵawulajidwe lyele lisikulyo.

²⁹ Mose ŵasalile Alefiwo kuti, “Lelo jino mliŵisile pajika mwacimsyene kuti mŵe ŵakutaga mbopesi ŵakumtumicila AMBUJE, pakwawulaga ŵanace ŵenu ni acalongo acimjenu ŵakwe. Myoyo AMBUJE tampe upile lelo.”

³⁰ Kundaŵi kwakwe Mose ŵasalile ŵandu kuti, “Jemanja mtesile ulemwa wakogoya. Nambo sambano tinjawule kwa AMBUJE kwitumbi, kuti mwine pitingampopelele, akukomboleka kumkululucila ulemwa wenu.”

³¹ Mose ŵawujile soni kwa AMBUJE, ni ŵajile kusala kuti, “Ŵanduŵa atesile ulemwa wakogoya mnope pakulipanganicisya milungu ja golidi.

³² Nambo sambano, conde mwakululucile ulemwa wawo. Naga ngakwakululucila, conde afute lina lyangu m'buku jiŵalembile.”

³³ AMBUJE ŵamsalile Mose kuti, “Jwele jwandemwecesye une pejo, ni jutinamfute lina lyakwe m'buku jangu.

³⁴ Nambo sambano mjawule, mkalongolele ŵanduwo kumalo gatinamsalile. Mlole, lilayika lyangu tilikamlongolele. Nambo ndaŵi jikwisa jitinjipeleka yipwetesi kwa jemanjajo ligongo lya ulemwa wawo.”

³⁵ AMBUJE ŵapelece cilwele pa ŵanduwo, ligongo lyakuti ŵamkanganice Aloni kuti ŵapanganyicisye mwanace jwakwenga jwa ng'ombe.