Ekisodo 31 - Chiyawo Bible

Ŵamasengo ŵakupanganya citenti ca AMBUJE

¹ AMBUJE* ŵamsalile Mose* kuti,

² “Mlole, namsagwile Besalele mwanace jwa Uli, cisukulu ca Huli, jwa mtundu wa Yuda.

³ Jweleju nampele Msimu wangu, kwakuti sambano akwete lunda ni kumanyilila, ni akugamanyilila cenene masengo gamti mpela aga:

⁴ kulemba mapulani ga masengo, kukamulisya masengo golidi,* silifa,* ni kopa.*

⁵ Akumanyilila soni kusokota maganga gakutendela masengo, akumanyilila kugoba yitela, ni kutenda masengo ga mtundu uliwose.

⁶ Namsagwile soni Oholiyabu mwanace jwa Ahisamaki, jwa mtundu wa Dani. Ni kwa ŵandu ŵane ŵajinji ŵakumanyilila, napele lunda lwejinji, lwakuti apakombole kupanganya cindu cilicose, citinamlamule kuti mcipanganye.

⁷ Apanganye citenti cakusimanilana une ni ŵandu ŵangu, Libokosi lya Cilanga* ca AMBUJE,* ciwuniko ca libokosilyo, pampepe ni yida yosope ya mu citenti,

⁸ mpela tebulo ni yida yakwe, cakuŵika nyali ca golidi jwambone mnope, pampepe ni yida yakwe, malo gakupelecela mbopesi gakututumicisya ubani,*

⁹ malo gakupelecela mbopesi sya koca, pampepe ni yida yakwe yosope, libeseni lya kunaŵila ni cakutamicila cakwe,

¹⁰ Ni yakuwala yeluce cenene, yeŵice pajika ya jwakutaga mbopesi Aloni,* ni yakuwala ya ŵanace ŵakwe ŵacalume pa ndaŵi jakutumicila,

¹¹ ni mawuta gakupakasya, ni ubani wakununjila cenene, yosopeyo yakutama ku malo gamaswela. Tapanganye yindu yosopeyi mpela munamlamulile m'mwejo.”

Lisiku lyakupumula

¹² AMBUJE ŵamsalile soni Mose kuti,

¹³ “Mwasalile Aisalaeli kuti, ‘Msunjeje Sabato, lisiku lyangu lyakupumula, ligongo celeci ni cilocesyo ca yaka yosope, pasikati pa une ni jemanja, mpaka yisukulu yenu, kuti m'manyilile kuti une AMBUJE ni jungusinamswejesya.

¹⁴ Myoyo mlisunjeje lisiku lya Sabato, ligongo lili lisiku lyeswela kwa jemanja. Mundu jwalijose jwangalisunga awulajidwe. Jwalijose jwakukamula masengo pa lyele lyuŵalyo, amtyose pa cilikati pa ŵandu acimjakwe.

¹⁵ Mundu akamule masengo gakwe gosope kwa masiku msano ni limo, nambo lisiku lya msano ni kaŵili, liŵeje lisiku lya Sabato, lisiku lyakupumula, lisiku lyeswela lya AMBUJE. Mundu jwalijose jwakukamula masengo lyele lisikuli awulajidwe.

¹⁶ Aisalaeli akwenela kulisunga lisiku lya Sabato, mpaka mipago jawo ja msogolo, mpela cilanga cangamala.

¹⁷ Celeci ni cilocesyo ca mpaka kalakala pasikati pa une ni Aisalaeli, cakuti une AMBUJE napanganyisye kwinani ni cilambo ca pasi masiku msano ni limo, napumwile pa lisiku lya msano ni gaŵili.’ ”

¹⁸ AMBUJE piŵamasile kuŵeceta ni Mose Petumbi lya Sinayi lila, ŵampele Mosejo maganga gaŵili ga umboni, gele Mlungu msyene ŵaliji ali alembile kala.