Ekisodo 30 - Chiyawo Bible

Malo gakututumicisya ubani

¹ “Mkapanganye malo gakututumicisya ubani* ga matabwa ga citela ca akesha.*

² Gakaŵe masentimita 46 mcilewu ni masentimita 46 mcijipi, nipo ukulu wakwe ukaŵe masentimita 91. Misengo jakwe akajipanganyicisye kumo ni malo gakututumicisya ubani,

³ ni mkagapace golidi* jwambone mnope pacanya pakwe, ni mumbali mwakwe mosope mcece ni pa misengo jakwe. Ni mkapanganye mkombelo wa golidi, ni mkawuŵice malo gosope kusyungula malo gosope ga kututumicisya ubani.

⁴ Mkapanganye mbete siŵili sya golidi syakunyakulila malo gakututumicisya ubanigo, ni mkasilumbikanye mwiŵanda mwa mkombelo wa mbali siŵili, sya malo gakututumicisya ubani, kuti aswece mbiko mu mbetesyo.

⁵ Mbiko syelesi sikaŵe sya citela ca akesha, nipo mkasipace golidi.

⁶ Mkagaŵice malo gakututumicisya ubanigo pasogolo pa nguwo jakucinga Libokosi lya Cilanga* ca AMBUJE,* pasogolo pa ciwuniko cili pacanya pa libokosi lya Cilanga ca AMBUJE. Tingamsimaneje m'mwejo pa malo gelego.

⁷ Kundaŵi kulikose pa ndaŵi jakwisa Aloni* kukolosya nyali, atutumisyeje ubani wa liwungo lyambone.

⁸ Ndaŵi jele Aloni jakupamba nyali ligulo, akatutumisyeje soni ubani. Myoyo pakaŵeje kututumisya kwa ubani kwangalecesya pameso pa une ndaŵi josope.

⁹ Pa malo gakututumicisya ubani, mkasimtutumisya ubani wa cilendo, kapena yakupeleka ya nyama ja koca, kapena ya yakulya. Mkapeleka soni pelepo yakupeleka ya yakumwa.

¹⁰ Aloni takatendeje msyungu wa kuswejesya, pa caka kamo, pa misengo jili pa malo gakututumicisya ubani, ni miasi ja nyama sya mbopesi jakuŵenda kululucila kwa ulemwa* ula. Msyungu wakuswejesya welewu tiwuciŵa mkutendekwa pa caka kamo, pa mipago jenu josope. Malo gakututumicisya ubani gelega tigaciŵa gamaswela mnope kwa AMBUJE.”

Mbiya syakuliwombolela

¹¹ AMBUJE ŵamsalile Mose* kuti,

¹² “Patimkatendeje kalembela jwa Aisalaeli, mundu jwalijose akapelece kwa Une AMBUJE cakuliwombolela umi wakwe, ndaŵi jimkwaŵalanga. Kuti mlili uliwose kuti ukamgwila mundujo pa ndaŵi jimkwaŵalanga.

¹³ Jwalijose jwajinjile mkawundula akwenela kupeleka mbiya, pakukuya mpimo wa ku Nyumba ja AMBUJE. Jwalijose akwenela kupeleka yeleyi mpela cakupeleka ca kwa AMBUJE.

¹⁴ Jwalijose jwalembedwe mkawundulamo, jwa yaka makumi gaŵili kapena kupunda, akwenela kupeleka yeleyi kwa une AMBUJE.

¹⁵ Jwakusicila akaja kupeleka mwakuculuya, nipo jwakulaga akaja kupeleka mwakunandiya pa mlingo wa litika lya mbiya, patimkapeleceje kwa une AMBUJE yakupeleka yeleyi, kuti mkawuwombole umi wenu.

¹⁶ Nipo mkajigale mbiya sya kuliwombolela syakutyocela kwa Aisalaeli, ni mkasitendele masengo ga citenti cakusimanilana. Kuti ciŵe cikumbukumbu kwa Aisalaeli pameso pa une AMBUJE, cakuliwombolela umi.”

Libeseni lya kunaŵila

¹⁷ Nipo AMBUJE ŵamsalile Mose kuti,

¹⁸ Mkapanganye libeseni lya kunaŵila lya cisyano ca kopa,* ni cakutamicila libesenilyo ca cisyano ca kopa. Mkaliŵice pasikati pa citenti cakusimanilana ni malo gakupelecela mbopesi, nipo mkateje mesi.

¹⁹ Aloni ni ŵanace ŵakwe ŵacalume takanaŵe myala ni kucapa sajo syawo ni mesi gelego.

²⁰ Ndaŵi jakuja kukwinjila mu citenti cakusimanilana kapena ndaŵi jakuja kuŵandicila pa malo pakupelecela mbopesi kuja kutumicila, kapena ndaŵi jakuja kutinisya mbopesi jakoca pa moto kwa une AMBUJE, ngasawa naga akuja kunaŵa mesi gelego.

²¹ Akanaŵeje m'myala ni kucapa sajo syawo, kuti akaja kuwa. Lyeleli tiliciŵa lilamusi lyakwenela kulikuya jemanjajo pamo ni yisukulu ya msogolo kwa yaka yosope.

Mawuta gakupakasya

²² AMBUJE ŵamsalile Mose kuti,

²³ “Mjigale yakununjila mnope: mule* jwa mesi jwakwanila malita msano ni limo, soni yakununjila yambone ya mtundu wa kinamoni makilogalamu gatatu, makilogalamu gatatu ga yakununjila, yakumela ya mpela milasi

²⁴ makilogalamu msano ni limo ga kasiya pakukuya mipimo ja ku nyumba ja Mlungu, ni malita mcece ga mawuta ga olifi.*

²⁵ Yosopeyi timyikamulisye masengo pakupanganyicisya mawuta gakupakasya. Timyipwatikanye yosopeyi pampepe, mpela mwakusatendela mundu jwa kwenga mawuta gakununjila. Mawuta gelego tigaciŵa gamaswela gakutendela masengo gakupakasya.

²⁶ Mkapakasye citenti ni mawuta gelego. Mkapakasye soni Libokosi lya Cilanga ca AMBUJE,

²⁷ tebulo ni yida yakwe yosope, cakuŵika nyali pampepe ni yida yakwe yosope, malo gakupelecela mbopesi ni gakututumicisya ubani

²⁸ malo gakupelecela mbopesi ja koca pampepe ni yida yakwe yosope ni soni libeseni lya kunaŵila lila, pampepe ni cakutamicila cakwe.

²⁹ Yosopeyi timciyiŵika pajika, nipo tiyiciŵa yeswela mnope, nipo cindu cilicose cakwaya yindu yeleyi, ticicijonasika ligongo lya macili ga uswela wakwe.

³⁰ Nipo timcapakasya mawuta Aloni, ni ŵanace ŵakwe ŵacalume ni kwayika pajika kuti aŵe ŵakutaga mbopesi ŵakundumicila une.

³¹ Myoyo timwasalile Aisalaeli kuti, ‘Gelega tigaciŵa mawuta gangu gamaswela gakupakasya, pa mipago jenu josope ja msogolo.

³² Mkasimumpaka mundu wamba gele mawutaga, soni ngapanganya mawuta gane gakulandana ni gelega. Mawuta gelega gali gamaswela, nipo kwa jemanja gaŵeje gamaswela nditu.

³³ Mundu jwalijose jutacipanganya mawuta gakulandana ni gelega, kapena kumpakasa jwalijose jwakanaŵa jwakutaga mbopesi, akwenela kumtyosya pasikati pa ŵandu acimjakwe.’ ”

Kupanganya kwa ubani

³⁴ Nipo AMBUJE ŵamsalile Mose kuti, “Mjigale yakununjila yambone ayi: sitakate, onika, galibanumu, ni ubani usyesyene (winji wakwe uŵe wakulandana).

³⁵ Myiwanganye pamo yosopeyi, nipo mpanganye ubani mpela mwakusatendela mundu jwakupanya yakununjila. Mtaje soni njete, nipo ubaniwo uŵe weswela ni wapajika.

³⁶ Msapule wine ni kusyaga nipo uwe wakutililika mpela utandi, ni mkasapule panandi ni kuwuyika pa moto pa Libokosi lya Cilanga ca AMBUJE, lyele lili mu citenti cakusimanilana ni ŵandu ŵangu. Ubani welewo uŵe weswela mnope kwa jemanja.

³⁷ Nipo ubani utimcipanganya pakukuya upanganye wakwe, ngasiwuŵa ŵenu, nambo tiwuciŵa kwa jemanja wosope, wa une jika AMBUJE.

³⁸ Naga mundu jwine akupanya ubani wakulandana ni welewu kuti alipikane liwungo lyakwe lyambone lyakununjila, akwenela kumtyosya pasikati pa ŵandu acimjakwe.”