Ekisodo 3 - Chiyawo Bible

Mlungu akumŵilanga Mose

¹ Mose* ŵaliji mkucinga ngondolo sya Yetelo, akwegwe ŵawo ŵalume, ŵiŵaliji jwambopesi jwa ku Midiyani. Lisiku line ŵasilongolele ngondolo ca kungapilo lyuŵa kwa cipululu, ni ŵayice Kwitumbi lya Mlungu, lina lyakwe Sinayi.

² Lilayika lya AMBUJE* lyamwonecele Mose mpela lilamba lya moto, lilyakolelaga pasikati pewukutu. Mose piŵalolite, ŵaliweni liwukutu lili mkolela moto, nambo liwukutulyo likakutinika.

³ Mose ŵatite mu mtima mwakwe, “Tisepuce kuti nacilolecesye cindu cakusimonjekaci. Ligongo lyakwe cici liwukutu ngalikutinika?”

⁴ AMBUJE piŵam'weni Mose kuti asepwice kwisa kulola, Mlungu ŵamŵilasile ali mkati mwiwukutu mula kuti, “M'mwe, Mose!” Mose ŵajanjile kuti, “Une ndili apano.”

⁵ Mlungu ni ŵatite, “Mkaŵandicila akuno, wulani sapato sili ku sajo syenu, pakuŵa malo gamjimigo gali gamaswela.”

⁶ Ni ŵatite, “Une ndili Mlungu jwa atati ŵenu, Mlungu jwa Abulahamu,* Mlungu jwa Isaki ni Mlungu jwa Yakobo.”* Papopo Mose ŵasisile ngope jakwe, pakuŵa ŵajogwepe kumlola Mlungu.

⁷ AMBUJE ŵatite, “Nakuweni kulaga kwa ŵandu ŵangu ŵali ku Iguputo, ni mbikene kulila kwawo ligongo lya ŵandu ŵakwakamulisya masengo mwa ngalwe, ngukumanyilila kulaga kwawo,

⁸ ni Une ndulwice kwisa kukwakulupusya, m'myala mwa Aiguputo, ni kwatyosya mcilambo celeco kuja ku cilambo cacikulungwa, cacili cakusicila ni ca cajila cambone, kumalo kwakutama Akenani, Ahiti, Aamoli, Apelesi, Ahifi, ni Ayebusi.

⁹ Sambano, une nakupikene kulila kwa Aisalaeli, soni nakuweni kulaga kwawo, ni mwele mwakwasawucisya jemanjajo Aiguputo.

¹⁰ Myoyo, une tinamtume m'mwejo kwa Mwenye jwa ku Iguputo, mkakoposye ŵandu ŵangu ŵa ku Isalaeli, mcilambo ca Iguputo.”

¹¹ Mose ŵamwusisye Mlungu kuti, “Ana une ŵani, kwakuti mpaka njawule kwa Mwenye jwa ku Iguputo, ni kuja kwakoposya Aisalaeli mu Iguputo?”

¹² Mlungu ŵamjanjile kuti, “Une timbe pampepe ni m'mwejo. Aci ticiŵe cilocesyo cenu, cakusimicisya kuti une namtumile, patimkamale kwakoposya ŵandu ŵangu ku Iguputo, timcimbopela une petumbi alino.”

¹³ Nambo Mose ŵajanjile kuti, “Sambano une patinjawule kwa Aisalaeli kukwasalila kuti Mlungu jwa acatati ŵenu andumile kwa jemanja, naga jemanjajo akambusye une kuti, ‘Lina lyakwe ŵani?’ Ana uneji ngajanje kuti uli?”

¹⁴ Mlungu ŵamsalile kuti, “Lina lyangu lili, UNE NDILI. Mkasalile Aisalaeliwo kuti, ‘UNE NDILI andumile kwa jemanja.’

¹⁵ Mkasalile Aisalaeli kuti, ‘AMBUJE, Mlungu jwa acinangolo ŵawo, Mlungu jwa Abulahamu, Isaki, ni Yakobo, ni jwele jwandumile kwa jemanja. Lyeleli ni lina lyangu mpaka kalakala. Ŵandu wosope ŵakupagwa msogolo tacingolanga Une ni lina lyeleli.

¹⁶ Mjawule mkasonganye acakulungwa wosope Aisalaeli pampepe, mkajile kwa jemanjajo kuti Une, AMBUJE, Mlungu jwa acinangolo ŵenu, Mlungu jwa Abulahamu, Isaki, ni Yakobo ŵambonecele une, ni ŵangombelesye kuti namsalile jemanja kuti, Mlungu ayice kwa jemanja, yosope yakutenda Aiguputo ayiweni.

¹⁷ Mlungu asimicisye kuti tamkoposye ku Iguputo kuno ku mkulaga, ni takamjinjisye ku cilambo cakusicila ni cana cajila cambone, kumalo kwakutama Akenani, Ahiti, Aamoli, Apelesi, Ahifi, ni Ayebusi.’

¹⁸ “Jemanjajo takayipikane yitimkasalileyo. M'mwejo ni acakulungwa ŵa ku Isalaeli, mkajawule kwa Mwenye jwa ku Iguputo ni mkamsalile kuti, ‘AMBUJE, Mlungu jwa Ahebeli ŵatusimene uwe. Ni sambano, um'we tukwaŵenda, atukunde tujawule pa ulendo wa masiku gatatu cipululu, kuti tukapelece mbopesi kwa AMBUJE, Mlungu jwetu.’

¹⁹ Une ngumanyilila kuti Mwenye jwa ku Iguputojo, ngajakukunda kuti mkatyoce, mpaka une ngamcisye mwenyejo mwamacili.

²⁰ Myoyo une, tingagakamulisye masengo macili gangu, tinjipeleka cilango kwa ŵandu ŵa ku Iguputo, pakutenda yindu yakusimonjeka une kweleko. Patiyicitendekwa yindu yeleyo, tacimkunda kutyoka.

²¹ “Tinjijoloya mitima ja Aiguputo pa ŵandu ŵangu, kuti ndaŵi jitimcityokaga, ngasimtyoka ŵangajigala kandu.

²² Jwamkongwe jwalijose jwa ci Isalaeli, takajuje kwa jwamkongwe jwa ci Iguputo jwaŵandikene najo, ni kwa jwamkongwe jwa ci Iguputo jwakutama najo m'nyumba mwakwe, kuti akampe yakuwala yakusalalisya ni golidi* ni silifa,* yakuwala yeleyi cimwawece ŵanace ŵenu ŵacalume ni ŵacakongwe, pakutenda myoyo timcasumula yosope Aiguputo.”