Ekisodo 28 - Chiyawo Bible

Kupanganya kwa yakuwala ya jwakutaga mbopesi

¹ “Ni mumtyosye Aloni* mkulugwenu, ni ŵanace ŵakwe ŵacalume pasikati pa Aisalaeli, ni ayice kwenumwe, kuti aŵe ŵakundumicila une pa masengo gakutaga mbopesi. Ayice Aloni pampepe ni ŵanace ŵakwe Nadabu, Abihu, Eliyesa ni Itamala.

² Mumtotele yakuwala ya jwakutaga mbopesi, Aloni mkulu gwenu, kuti aŵe ŵakucimbicika ni ŵana lumbili.

³ Ni mŵecete ni ŵandu wosope ŵakwete lunda, ŵandu ŵele ŵanapele lunda lwa kumanyilila, kuti amtotele Aloni yakuwala, yitaciwala pa lisiku lya ku mŵika pajika kuti aŵe jwakutaga mbopesi jwangu.

⁴ Awu ni mtundu wa yakuwala yitatote: cakuwala pa mtima, cakuwala ca efodi,* mkanjo, mwinjilo wepete cenene, nduŵila, ni lamba. Atote yakuwala ya jwakutaga mbopesiyi ya Aloni mkulu gwenu ni ŵanace ŵakwe ŵacalume, kuti aŵe ŵakundumicila une pa masengo gakutaga mbopesi.

⁵ “Ŵandu ŵalunda ŵakumanyilila kutotawo, ayitote yakuwalayi ni nguwo ja golidi,* ni nguwo ja buluwu, ni nguwo ja papo, ni nguwo jecejewu, soni ni nguwo ja bafuta jwakutililika mnope, jeluce ni jepete cenene.

⁶ Ajitote efodi ni nguwo ja golidi, ni nguwo ja buluwu, ni nguwo ja papo, ni nguwo jecejewu soni ajitote ni nguwo ja bafuta jwakutililika mnope, jeluce ni jepete cenene.

⁷ Tijiŵe ni malamba gaŵili gakolecela m'makoyo, gakutaŵilila efodijo, getotelele musonga mwa mbali syosope siŵili.

⁸ Aluce soni lamba jwambone jwakutaŵila efodi. Amluce lambajo ni nguwo ja golidi, ni nguwo ja buluwu, ni nguwo ja papo, ni nguwo jecejewu, soni ni nguwo ja bafuta jwakutililika mnope, jeluce cenene.

⁹ Mjigale maganga gaŵili ga onikisi, ni mlembe pa magangago mena ga ŵanace ŵacalume ŵa Yakobo.*

¹⁰ Mlembe mena msano ni limo pa liganga limo, ni mena msano ni limo gakusigala, mgalembe peganga linelyo. Mlembe menago mwakuya kupagwa kwa Aisalaeliwo.

¹¹ Mena gawogo mgalembe mwakusokota pa maganga gaŵiligo, mpela mwakusokotela m'misili jwa maganga. Magangago mgaŵice muyakuŵika yakwe ya golidi.

¹² Mtaŵilile maganga gaŵili gelega pa malamba gaŵili gakukolecela m'makoyo ga efodi, kuti gaŵe maganga ga kwakumbucila Aisalaeli. Aloni tacinyakula menago pa makoyo gakwe, kuti gaŵe cikumbukumbu pameso pa AMBUJE.*

¹³ Mpanganye yindu yakukoleka yakusalalisya ya golidi,

¹⁴ ni mikufu jiŵili ja golidi jwambone mnope, jakutiŵa mpela lukonji, mjilumbikanye ku yindu yakukoleka yakusalalisya yila.

Cakuwala ca pamtima

¹⁵ “Mtote cakuwala ca pamtima, ni kujipeta cenene, cakuwala pa kulamula. Mtote mpela mwatotele efodi, ni nguwo ja golidi, ni nguwo ja buluwu, ni nguwo ja papo, ni nguwo jecejewu, ni nguwo ja bafuta jwakutililika, jeluce cenene.

¹⁶ Ukulu wakwe uŵe wakulandana mbali syakwe syosope, mcipinde paŵili. Ciŵe cana masentimita 23 mcilewu, ni masentimita 23 mcijipi mwakwe.

¹⁷ Mtotelele misela mcece ja maganga. Pa msela wakutanda mŵice maganga ga lubi, topasi* ni kabako.

¹⁸ Pa msela waŵili mŵice maganga ga emeladi, safilo ni dayamondi.

¹⁹ Pa msela watatu mŵice maganga ga yasinti, agate* ni ametisiti.*

²⁰ Ni pa msela wa mcece mŵice maganga ga belili,* onikisi ni ga jasipa, ni maganga gosopego mgatotelele pa cakuwalaco mli mgaŵisile mucakuŵicila ca golidi.

²¹ Maganga gelega gaŵe likumi kwisa gaŵili ga malembe mena, mpela mugaŵelele mena ga ŵanace wa Yakobo. Mgasokote magangago mpela yidindo, liganga lili lyose likole lina lya lukosyo lumo.

²² Mpanganye tumikufu twakutiŵa cenene mpela lukonji, twa golidi jwambone mnope, twakuŵika pa cakuwala pamtima.

²³ Mpanganye mbete siŵili sya golidi, msitotelele mbete siŵilisyo ku songa siŵili sya mwinani mwa cakuwala pamtimaco.

²⁴ Mtaŵilile tumikufu tuŵili twa golidi ku mbete siŵilisyo syasili mu ndumba sya cakuwala pamtima.

²⁵ Songa sya tumikufu tuŵilito, mtaŵilile ku yakuŵicila tumaganga twa golidi tuli mu yakukolecela m'makoyo.

²⁶ Mpanganye mbete siŵili sya golidi, ni msitaŵilile ku songa syakwe sya mkati, mundumba sili mwiŵanda mwa cakuwala pamtima, mwakuŵandikana ni cakuwala ca efodi cila.

²⁷ Mpanganye soni mbete sine siŵili sya golidi, ni msilumbikanye kusogolo kwa malamba gaŵili ga m'makoyo ga efodi, ca mwiŵanda mwakwe, pakulumbikanila lamba jwamluce cenene jwa efodi.

²⁸ Mlumbikanye mbete sili pa cakuwala ca pamtima ni mbete sya cakuwala ca efodi ni kaguwo ka buluwu, kuti cakuwala ca pamtimaco citame penani pa lamba jwamluce cenene jula, ni soni kuti cakuwala pamtima cilumbikane cenene ku cakuwala ca efodi.

²⁹ Pa ndaŵi jakwinjila Aloni kumalo geswela, awaleje cakuwala pa mtima celembe mena gosope ga ngosyo sya Aisalaeli, kuti une, AMBUJE, tinakumbucileje ŵandu ŵangu ndaŵi syosope.

³⁰ Mu cakuwala pa mtimaco mŵice tumaganga tuŵili twakolanjidwa Ulimu ni Tumimu,* kuti Aloni ajigaleje ka ndaŵi pa malo gangu gamaswela. Pa ndaŵi jakutama Aloni pa malo gangu gamaswelago, awaleje cakuwala ca pamtimaco, kuti cimkamucisyeje kutenda lisosa pa Aisalaeli, mpela mungusacila une, AMBUJE, ndaŵi syosope.

Yakuwala ya mtundu wine ya ŵakutaga mbopesi

³¹ “Mtote mkanjo wanguwo ja buluwu, wakuwala pacanya pa cakuwala ca efodi cila.

³² Pacilikati pa mkanjowo mŵice cibowo cakupisya mtwe. Mungulugulu cibowo celeci mtote mwakulimbika, kusyungulila cibowo cosopeco, mpela lukosi lwa malaja, kuti mkanjowo ukapapuka.

³³ Pa lutoto lwa mwiŵanda mwa mkanjo, mpete maluŵa gakuwoneka mpela yisogosi. Mpete ni nguwo ja buluwu, ja papo ni jecejewu, kusyungulila mlutoto losope lwa mwiŵanda mwa mkanjo. Pacilikati pa yakupeta yakuwoneka mpela yisogosi yila, mŵice tumabelo twa golidi.

³⁴ Myoyo mŵice mwakupacisya, kacisogosi kamo ni kabelo kamo, kacisogosi kamo ni kabelo kamo, mpaka m'male kusyungulila mlutoto losope lwa mwiŵanda mwa mkanjo.

³⁵ Aloni awaleje wele mkanjowo pakutumicila masengo ga kutaga mbopesi. Kusona kwa tumabelo tikupikaniceje pakwinjila kapena pakukopoka Aloni ku malo gamaswela, pameso pawo AMBUJE.

³⁶ “Mpanganye liluŵa lya golidi jwambone mnope, ni mlembe mwa kusokota maloŵe gakuti, ‘Cakupelecedwa ceswela kwa AMBUJE.’

³⁷ Mlitaŵilile liluŵalyo ni kaguwo ka buluwu pa nduŵila ja Aloni, liluŵalyo liŵe pasogolo pa nduŵilajo.

³⁸ Liluŵalyo liŵe pa usyo ja Aloni, pakutenda myoyo Aloni, taŵe ali atwicile cakulemwa cilicose ca yakupeleka yele Aisalaeli akuyipeleka kwa AMBUJE. Aloni awaleje lyele liluŵali ndaŵi syosope, kuti AMBUJE ayipocele yakupeleka ya ŵanduwo.

³⁹ “Ni mluce mwinjilo ni ulusi wambone mwakupinjikanyapinjikanya, ni nduŵila ja nguwo jambone mnope, ni lamba jepete cenene.

⁴⁰ “Ŵanace ŵa Aloni ŵacalume, mwapanganyicisye mwinjilo, lamba ni nduŵila, kuti alekanganeje ni ŵandu ŵane, kuti awoneceje ŵawukoto ni ŵakucimbicika.

⁴¹ Yakuwala yeleyi mwawece Aloni akulu ŵenu ni ŵanace ŵawo ŵacalume. Mwapakasye pa mitwe pawo ni mawuta, ni mwape masengo gakutaga mbopesi, ni mwaŵice pajika, kuti aŵe ŵakutaga mbopesi ŵakundumicila une.

⁴² Mwatotele makabudula gakutandila mciwunu kulecesya mu yiga, kuti akatamaga makonope.

⁴³ Aloni ni ŵanace ŵakwe ŵacalume awaleje yakuwala yeleyi, ndaŵi jakwawula ku citenti cakusimanilana, ni ndaŵi jakwinjila kuja kundumicila une, mpela ŵakutaga mbopesi kumalo gamaswela, kogopela ni mkaŵa kuwulajidwa ligongo lyakutama makonope. Lilamusi lyeleli liŵe kwa Aloni ni kwa yisukulu yakwe kwa yaka yosope.