Ekisodo 26 - Chiyawo Bible

Kupanganya kwakwe kwa citenti ceswela ca AMBUJE

¹ “Mkapanganye tenti ja mapopelo ni nguwo likumi syakusalala, syepanganyikwe cenene, sya buluwu, sya papo ni syecejewu. Nguwo syelesi mkasipete cenene ni yitusitusi ya akelubi.

² Nguwo jilijose jikaŵe mamita 12 ni hafu mcilewu, ni mamita gaŵili mcijipi. Nguwo syosopesyo sikaŵe syakulandana.

³ Mkasitotekanye nguwo msano, kuti jikaŵe nguwo jimo, mkatende myoyopeyo ni nguwo msano sinesyo.

⁴ Mkatote mapogolo ga nguwo ni nguwo ja buluwu, mungulugulu mwanguwo jandanda, mkatende soni myoyo ni nguwo jijakwejo.

⁵ Panyuma pakwe mkatote mapogolo ga nguwo 50 pa nguwo jandanda, ni mapogolo soni gane 50 pa nguwo jijakwejo, ni mapogologo gakalolegane.

⁶ Ni mkapanganye yakolecela ya golidi* 50, ni mkasilumbikanye nguwo siŵili sila, kuti sikapanganye citenti cimo.

⁷ “Mkapanganye nguwo sya manyunya ga mbusi likumi kwisa lumo, syakuti mkawunicile penani pa citentico.

⁸ Nguwo jilijose jikaŵe ja mamita 14 mcilewu, ni masentimita 183 mcijipi, nguwo syosopesyo sikaŵe syakulandana.

⁹ Mkasitotekanye nguwo msano kuti sikaŵe nguwo jimo, nguwo msano ni jimo sinesyo mkasitotekanye soni, kuti jikaŵe nguwo jimo. Mkajipinde nguwo ja msano ni jimo, ni kujitota mwa kupwatikanya ni nguwo jili kusogolo kwa citenti.

¹⁰ Mkapanganye soni mapogolo ga nguwo gane 50, mungulugulu nguwo ja kumalicisya jajili pa nguwo jandanda, ni mapogolo gane 50 pa nguwo jakumalicisya jajili pa nguwo jaŵili.

¹¹ “Mkapanganye yakutaŵila 50 ya kopa* ni mkayijinjisye m'mapogolo mula. Ni mkapwatikanye nguwo siŵili sila, kuti mkapanganye citenti cimo.

¹² Nguwo jakusigala mkajikolece kunyuma kwa citentico.

¹³ “Nambo nguwo ja masentimita 46, jakusigalila mu mbali syosope siŵili sya mcilewu, mkajikolece ca mumbali mwakwe, kuti jikawunicile citentico.

¹⁴ Mkajipanganyicisye tentijo cakuwunicila cecejewu, ca mapende ga ngondolo syamkambako ni mbusi.

¹⁵ “Mkapanganye mafelemu ga citenti, ni matabwa gakongoka ga citela ca akesha.*

¹⁶ Felemu jilijose jikaŵe mamita mcece mcilewu, ni masentimita 69 mcijipi mwakwe.

¹⁷ Litabwa lili lyose likole mwakulumbikanila muŵili. Mafelemu gosope ga citentico, mkagapanganye ni matabwa gamti myoyo.

¹⁸ Mkapanganye mafelemu ga citenti gakwana 20, ga mbali ja kum'mwela.

¹⁹ Mkapanganye yakwimicila pasi ya silifa* yakwana 40 pasi pa mafelemu 20 gala. Pasi pa felemu jilijose pakaŵe pana yakwimicila ya silifa yiŵili, yikakamulile matabwa gakulumbikana gaŵili gala.

²⁰ Ni mkapanganye soni mafelemu 20, ga kuŵika kumbali ja kumpoto kwa citenti,

²¹ ni yakwimicila pasi pa mafelemu, 40 ya silifa, yiŵili yikaŵe pasi pa felemu jilijose.

²² Kunyuma kwa citentico, ku mbali ja kungapilo lyuŵa, mkaŵice mafelemu msano ni jimo.

²³ Cakunyuma kwa citenti kukoko, mkaŵice soni mafelemu gaŵili pandumba jilijose ja citenti.

²⁴ Mafelemu gaŵili gali pandumba galumbikane kutandila pasi mpaka pa mbete jandanda jajili kwinani kwa citenti. Mwelemu ni mutigatamile mafelemu gaŵili gakupanganya ndumba sine siŵili sya citenti.

²⁵ Myoyo tipaciŵa pana mafelemu msano ni gatatu, gakukola yakwimicila pasi pakwe, 16 ya silifa, yakwimicila yiŵili pasi pa felemu jilijose.

²⁶ “Mkapanganye mbalaŵala sya yitela ya akesha msano, sya kuŵika pacanya pa mafelemu gambali jimo ja citenti,

²⁷ ni mbalaŵala msano sine soni, syakuŵika pacanya pa mafelemu gambali jine. Sikapagwe soni mbalaŵala msano, syakuŵika pacanya pa mafelemu gali kumbali ja kungapilo lyuŵa, kunyuma kwa citentico.

²⁸ Mgomba wakupita pasikati pa citenti, wakukamula mafelemu gosope, kutandila mbali jimo ja citenti mpaka soni ku mbali jine.

²⁹ Mafelemu gosope mkagapace golidi, ni mkapanganye mbete sya golidi syakuti mkapisye mgomba ula, nombe mgombawo mkawupace golidi.

³⁰ Myoyo timkapanganye citenti cangu, mpela yinguti pakumlosya upanganye wakwe, petumbi pano.

³¹ “Mkatote nguwo jakucijila mkati mwa citenti, jamtundu wabuluwu, wapapo ni wecejewu, ni nguwo ja bafuta jwakutililika, jeluce cenene, ni nguwojo mkajipete ni yitusitusi ya akelubi.

³² Mkajikolece nguwojo pa njalamila mcece, syakola yakolecela ya golidi, sya yitela ya akesha, syepace golidi, sitimkajimice pa yakwimicila pasi pakwe, mcece ya silifa.

³³ Mkakolece nguwo jakucijila mkati mwa citentico, ku yakukolecela, ni mkaŵice Libokosi lya Cilanga* ca AMBUJE* mkatimo, kusyeto kwa nguwo ja kucigajo. Nguwo jakucingajo, jikalekanganye Cipinda Ceswela ni Cipinda Ceswela Mnope.

³⁴ Mkaŵice ciwuniko cila, pacanya pa Libokosi lya Cilanga ca AMBUJE, ku Cipinda Ceswela Mnopeco.

³⁵ Mkatamice tebulo jila, kusa kwa nguwo jakuciga. Mkaŵice cakuŵika nyali, cakumwela kwa citentico, mwakulolegana ni tebulo, jitimkaŵice ca kumpoto.

³⁶ “Mkaŵice pa mlango wakwinjilila mu citentimo, nguwo jakuciga ja mtundu wa buluwu, wa papo ni wecejewu, ni nguwo ja bafuta jwakutililika mnope, jeluce ni jepete cenene.

³⁷ Mkapanganye njalamila msano sya yitela ya akesha, pakoleka jele nguwo jakuciga pa mlango. Mkasipace golidi, yakoloŵecela yakwe yikaŵe soni ya golidi, mkapanganye yakwimicila pasi pa njalamila syelesi, msano sya ni kopa ca kopa.