Ekisodo 25 - Chiyawo Bible

Yakupeleka yakutaŵila citenti ceswela ca AMBUJE

¹ AMBUJE* ŵamsalile Mose* kuti,

² “Mwasalile Aisalaeli kuti apelece yakupeleka kwa une. M'mwejo mpocele yakupelekayo kwa mundu jwalijose jwakwete mtima ŵakusaka kupeleka kwa une.

³ Yakupeleka yitimpoceleyo yiŵe ayi: golidi,* silifa,* kopa,*

⁴ soni nguwo syetonji sya buluwu, syecejewu, ni sya mtundu wa papo. Ayiceje ni nguwo sya bafuta sya kutililika, ni nguwo jakupanganyikwa ni manyunya ga mbusi,

⁵ mapende ga ngondolo geloŵece mu utoto wecejewu, mapende ga kuŵeŵa ga mbusi, matabwa ga yitela ya akesha,*

⁶ mawuta ga nyali, yindu yakununjila yakupanganyicisya mawuta gakupakasya, soni yakupanganyicisya ubani* wa kununjila cenene.

⁷ Mpocele soni maganga ga onikisi, ni maganga gane gakusalala gakuŵika pa cakuwala ca ŵakutaga mbopesi ca efodi,* ni pa cakuwala cakuŵika pamtima.

⁸ Ni akambanganyicisye une Nyumba jangu, jakuti une ngatame pa sikati pawo.

⁹ Mkapanganye citenti ceswela ni yida yosope ya mkati mwakwe, mpela mutinamsalile upanganye wakwe.

Kupanganya kwa Libokosi lya Cilanga ca AMBUJE

¹⁰ “Akapanganye libokosi lya matabwa ga citela ca akesha. Ulewu wakwe ukaŵe masentimita 110, mcijipi mwakwe mukaŵe masentimita 66, ukulu wakwe ukaŵe masentimita 66.

¹¹ Mkalipace libokosilyo ni golidi jwambone mnope, mkati ni kusa kwakwe. Ni mkaŵice mkombelo wa golidi kusyungulila libokosi lyosopelyo.

¹² Mkapanganye mbete mcece sya golidi sya kunyakulila libokosilyo, ni mkasitaŵilile mbetesyo mungongolo syakwe mcece, aku siŵili aku siŵili.

¹³ Mkapanganye soni mbiko kutyocela ku yitela ya akesha, ni mkasipakasye mbikosyo ni golidi.

¹⁴ Mkalonje mbikosyo mu mbete, syasili mumbali siŵili sya libokosilyo, kuti akanyakulileje.

¹⁵ Mbikosyo sikaŵeje mu mbete sya libokosilyo, sikatameje m'momo ngaswekula.

¹⁶ Mkaŵice mwibokosimo, mawubawo gaŵili ga maganga ga malembe Malamusi, gatinjimpa.

¹⁷ Mkapanganye ciwuniko ca golidi jwambone mnope, cikaŵe masentimita 110 mcilewu ni masentimita 66 mcijipi.

¹⁸ Mungulugulu mwa ciwuniko, kumbali syakwe siŵili, mkapanganye akelubi ŵaŵili ŵa golidi, ŵakusyana ni nyundo.

¹⁹ Akelubi ŵaŵiliwo akaŵe jumo mbali jine ni mjakwe akaŵe soni mbali jinejo, nambo akelubiwo akaŵe ŵalumbikane ku ciwunikoco.

²⁰ Mapapiko ga akelubiwo gakaŵe gamatambasukule pacanya pa ciwuniko, kuti gakaciwunicile ciwunikoco. Akelubiwo akatame cakulolegana, jwalijose ali mkulola pa ciwunikoco.

²¹ Mkaciŵice ciwuniko pacanya pa libokosi, ni mwibokosimo timŵice mawubawo gaŵili ga maganga, gelembe Malamusi, gatinjimpa.

²² Tinjisimana ni m'mwejo pelepo, ni tinjiŵecetana namwe kutyocela pacanya pa ciwuniko, pasikati pa akelubi ŵaŵili awo ŵali pacanya pa libokosilyo, tinjimpa malamusi gakuti mwasalile Aisalaeli.

Ya tebulo jakuŵika mkate wakupeleka kwa Mlungu

²³ “Ni mkapanganye tebulo ja matabwa ga akesha, jikaŵe masentimita 88 mcilewu mwakwe, ni masentimita 44 mcijipi mwakwe, ni ukulu wakwe ukaŵe 66 sentimita.

²⁴ Ni mkalipace ni golidi jwambone mnope, ni mkaŵice mkombelo wa golidi mumbali mwakwe.

²⁵ Mkapanganye katabwa ni kukaŵika mumbali kusyungula tebulojo, ngwasa jakwe jikaŵe ligasa limo, ni mkaŵice mkombelo wa golidi kusyungulila katabwako.

²⁶ Mkapanganye mbete mcece sya golidi, ni mkasilumbikanye m'makona mcece ga ngongolo sya tebulojo.

²⁷ Mbete syakwinjisya mbiko syakunyakulila tebulo, mkasiŵice mwakuŵandikana ni katabwa, katimkaŵice mumbali kusyungulila tebulo jila.

²⁸ Mkapanganye mbiko syakunyakulila syayitela ya akesha, ni mkasipakace golidi.

²⁹ Mkapanganye mbale ni yikoŵi yakusosekwa pakututumisya ubani, soni malulo ni migawo jakwe, yakusosekwa pa yakupeleka ya yakumwa, yosopeyi yiŵe ya golidi jwambone mnope.

³⁰ Mkaŵiceje pa tebulopo mkate, wutimkawupeleceje kwa une mwangalecesya, kuti ukatameje pameso pangu ndaŵi syosope.

Cakuŵika nyali

³¹ “Ni mkapanganye cakuŵika nyali ca golidi jwambone mnope. Cakutamicila cakwe ni cilu cakwe mkatende yakusyana ni nyundo, ni maluŵa gakwe gakusalalisya gakaŵe gakusyanila kumo.

³² Nyambi msano ni lumo sikaŵe mumbali mwa cakuŵika nyalico, sitatu mbali jilijose.

³³ Nyambi syandanda sikakole makapu gatatu gakupanganyidwa mpela mugakuwonecela maluŵa ga mtowo. Ku nyambi sinesyo kukaŵe soni makapu gatatu gakupanganyidwa mpela mugakuwonecela maluŵa ga mtowo. Nyambi msano ni lumo, sya pa cakuŵika nyali sikawoneceje myoyo.

³⁴ Pa cakuŵika nyalipo pakaŵe soni migawo mcece jakuwoneka mpela maluŵa ga mtowo.

³⁵ Mkaŵice migawo jitatu mwiŵanda, musitandile nyambi msano ni lumo, sili pa cakuŵika nyali, kapu jilijose jiŵe mwiŵanda mwa nyambi siŵili.

³⁶ Migawo jakuwoneka mpela maluŵa ga mtowo jila, pampepe ni nyambisyo, akasyanile kumope ni cakuŵika nyali. Cindu cosopeco cikaŵe cimo, cakupanganyikwa ni golidi, soni cakutenda kusyana ni nyundo.

³⁷ Mkapanganye nyali msano ni siŵili, ni mkasiŵice pa cakuŵika nyali cila, kuti sikamuliceje malo gali pasogolo pakwe.

³⁸ Mkapanganye cakusimila nyali, pampepe ni mbale sya kutyocesya liwu, ya golidi jwambone mnope.

³⁹ Cakuŵika nyalico pamo ni yida yakwe yosope, mkayipanganye ni golidi jwa kusitopa makilogalamu 35.

⁴⁰ Mkalolecesye kuti, mkuyipanganya yele yinduyi, mpela yinguti pakumlosya upanganye wakwe petumbi pano.