Ekisodo 24 - Chiyawo Bible

Cilanga ca Mlungu

¹ AMBUJE* ŵamsalile Mose* kuti, “Mjise akuno kwa une kwitumbi, pamo ni Aloni,* Nadabu, Abihu, ni acakulungwakulungwa ŵa Aisalaeli 70. Myoyo mkwenela kulambila une mli pakutalicila mnope.

² Mose ni ŵakwenela kumbandicila une, nambo ŵandu ŵanewo akayika pakuŵandicila, ŵandu ŵane wosope nombe nawo akayika kwa une pamo ni Mosejo.”

³ Mose ŵajawile kukwasalila ŵandu maloŵe ni malamusi gosope gaŵasasile AMBUJE, ŵandu wosope ŵajanjile kuti, “Tuyitende yosope yaŵecete AMBUJE.”

⁴ Mose ŵalembile maloŵe gosope ga AMBUJE. Ŵajimwice kumasikusiku ni ŵatandite kutaŵa malo gakupelecela mbopesi mungulugulu litumbi, ni yipilala 12, mpela mujaŵelele mitundu 12 ja Aisalaeli.

⁵ Ŵatumile Aisalaeli ŵa cinyamata kuti akapelece mbopesi syakutinisya, ni kuwulaga ng'ombe syakuti apelecele mbopesi sya mkamulano kwa AMBUJE.

⁶ Mose ŵajigele litika lya miasi, ni ŵajitasile mu mbale, ni miasi jakusigala ŵajimisile pa malo gakupelecela mbopesi.

⁷ Panyuma pakwe ŵajigele buku ja cilanga,* ni ŵajiŵalasile kwa ŵanduwo mwakupikanika, Ŵanduwo ŵatite, “Tuyitende yosope yatulamwile AMBUJE. Tutwapikanile welewo.”

⁸ Mose ŵajigele miasi jiŵajitasile mumbale jila, ni ŵajimisile kwa ŵandu, ŵatite, “Miasi jeleji jikusimicisya cilanga capangene sambano AMBUJE ni jemanja pampele maloŵe gosopega.”

⁹ Myoyo Mose, Aloni, Nadabu ni Abihu kwisa soni acakulungwakulungwa 70 ŵa Aisalaeli, ŵakwesile litumbi ŵala.

¹⁰ Ŵawonegene ni Mlungu jwa Aisalaeli. Pasi pa sajo syakwe paliji pana cine cakwe cakuwoneka mpela msewo wepanganyidwe ni liganga lya safilo lyakuwoneka mpela liwunde.

¹¹ Mlungu nganiŵajonanga acakulungwakulungwa ŵa Aisalaeli, ŵam'weni Mlungu, ni panyuma pakwe ŵalile ni kumwa.

Mose Petumbi lya Sinayi

¹² AMBUJE ŵamsalile Mose kuti, “Mjise kwa une kwitumbi, mlindilile kunokuno, tinimpe mawubawo ga maganga gilembile majiganyo ni malamusi kuti najiganye ŵandu.”

¹³ Mose ŵanyakwice pampepe ni jwakutumicila jwakwe Yoswa, ni Mosejo ŵakwesile Litumbi lya Mlungu.

¹⁴ Jwalakwe ŵaliji ali ŵasalile acakulungwakulungwa ŵala kuti, “Mtulindilile um'we apano, mpaka titumsimane pakuwuja. Aloni ni Huli mli nawo panopano, jwalijose jutakole magambo, ajawule kwa jemanjaji.”

¹⁵ Myoyo Mose ŵakwesile litumbi, ni liwunde lyaliwunicile litumbilyo.

¹⁶ Lilanguka lya kumelemenda kwawo AMBUJE kwatulucile Petumbi lya Sinayi, ni liwunde lyaliwunicile litumbilyo kwa masiku msano ni limo. Pa lisiku lya msano ni kaŵili AMBUJE ŵamŵilasile Mose ali mkati mwa liwundemo.

¹⁷ Lilanguka lya kumelemenda kwawo AMBUJE, kwalolekaga kwa Aisalaeli, mpela lilamba lya moto penani petumbi.

¹⁸ Mose ŵajinjile mwiwundemo mpaka kuja kwika penani petumbi. Ŵatemi kweleko masiku 40, musi ni cilo.