Ekisodo 23 - Chiyawo Bible

Cilungamo ni ungatenda lusagu

¹ “Mkasimpeleka umboni wa unami. Mkamkamucisya mundu jwakulemwa, pakumpelecela umboni wa unami.

² Atamose ŵandu ŵajinji atendeje yakusakala, mkajiticisyana nawo. Soni mkapeleka umboni wakusokonesya kulamula mwa cilungamo, pa nganya ja magambo, ligongo lya kusaka kwanonyelesya ŵandu ŵajinji.

³ Pamkulamula magambo ga mundu jwakulaga, mkalamula mwa lusagu.

⁴ “Naga mkujiwona ng'ombe ja m'magongo jwenu jili mkusokonecela, kapena bulu jwakwe, mjiwucisye kwa msyene.

⁵ Naga mkuwona bulu jwa m'magongo jwenu ali agwile najo katundu, mkampeleta ni kumleka, nambo mumkamucisye mundujo ni bulu jwakwe kuti ajimuce.

⁶ “Mlolecesyeje kuti jwakulaga akulamulwa mwacilungamo, mwangali lusagu, ndaŵi jakwika pa nganya ja magambo.

⁷ Mkapeleka umboni wa unami, wa mpaka kumwulajisya mundu jwangalemwa ni jwagoloka, ligongo une ngasinamkululucila mundu jwa kulemwa.

⁸ Mkapocela yipupu, pakuŵa, mbote ja cilo jikwatendesya m'meso cipi, ŵandu ŵakulamula magambo pa nganya, ni magambo gakumsakalila mundu jwangalemwa.

⁹ “Mkasimumtendela yindu yangalumbana mlendo, pakuŵa mkukumanyilila kutama kwa mundu jwa cilendo pakuŵa mwacimsyene mwaliji acalendo kucilambo ca Iguputo.

Caka ca msano ni yiŵili soni lisiku lya msano ni gaŵili

¹⁰ “Mpandeje mbeju yaka msano ni cimo m'migunda mwenu, ni kugowola mbejusyo.

¹¹ Nambo pa caka ca msano ni yiŵili* mleceje ngapanda, ni kujipumusya migundajo. Ŵandu ŵakulaga ŵa mtundu wenu ni ŵatacilya yakumela m'migundamo, ni yinyama ya mwitinji tiyicilya yitaciyileka ŵanganyawo. Mtendeje myoyo soni ni migunda jenu ja mipeleya ni ja olifi.*

¹² “Mkamuleje masengo masiku msano ni limo, nambo pa lisiku lya msano ni yiŵili mkakamulaga masengo, kuti ng'ombe syenu ni abulu ŵenu apumule, soni kuti acikapolo ŵenu ni acalendo ŵakumkamulila masengo, apate soni macili.

¹³ Mpikanicisye yosope yinamsalileyi. Mkasimkolanga mena ga milungu jine, atamose kupikanika menago gali mkukopoka pa ngomo syenu.

Masiku gatatu gamakulungwa gakutenda yindimba

¹⁴ “Mundendeleje une cindimba katatu pa caka.

¹⁵ Mkatendeje cindimba ca mikate jangali cakusasaŵilisya, mpela munamlamulile, mkalyeje mikate jangali cakusasaŵilisya kwa masiku msano ni gaŵili pa ndaŵi jakwe, m'mwesi wa Abibu,* ligongo pa wele mwesi wa Abibu, ni wumwakopwece jemanja mcilambo cila ca Iguputo. Mundu akayika pameso pangu ali jwangali kandu kakupeleka m'myala mwake.

¹⁶ Mkakoleje lisiku lyakutenda cindimba* ca masika, pagowola mbeju syenu syandanda, ni ndaŵi jimkumalisya kugowola yisogosi ya m'migunda mwenu, mkakoleje lisiku lya kutenda cindimba cakututa yisogosi yenu yosope, pakumala pa caka.

¹⁷ Ŵandu ŵacalume wosope awoneceleje pameso pa une AMBUJE* Mlungu, katatu pa caka.

¹⁸ “Ndaŵi jimkupeleka miasi ja mbopesi kwa une, mkajipeleka pampepe ni mkate wana cakusasaŵilisya, kapena mawuta ga nyama gakupelecedwa pa lisiku lya cindimba cangu, gakagona mpaka kundaŵi.

¹⁹ “Myiceje ni yagowola yakutanda, yambone mnope, ya ku migunda kwenu ku Nyumba ja AMBUJE Mlungu jwenu. “Mkateleka kamwanace ka nyama mu mkaka ŵa mamagwe.

Majiganyo ni yilanga

²⁰ “Mlole, tinalipelece lilayika lyangu kuja pasogolo penu kuti limcenjele petala, ni kuja kumyicisya kumalo ganimŵicile cile.

²¹ Mlipikanile lilayikalyo, soni mlipikanicisye maloŵe gakwe, mkasisyana nago, ligongo ngasilimkululucila yakulemwa yenu. Lilayikalyo likutenda yeleyi mu lina lyangu.

²² “Nambo naga mkulipikanila lilayikalyo ni kuyitenda yosope yinguŵeceta, Une tinjiŵengana nawo amagongo ŵenu, ni wosope ŵa kusisyana ni jemanja tinjilimbana nawo.

²³ “Ndaŵi jele lilayika lyangu tilicimlongolela, ni kumjinjisya mcilambo ca Aamoli, Ahiti, Apelesi, Akenani, Ahifi, ni Ayebusi. Une tinjajonanga wosopewo.

²⁴ Nambo jemanja mkaja kujitindiŵalila milungu jawo, kapena kujilambila, mkaja kutenda nawo misyungu jakusatenda ŵandu welewo. Mkajipasulanye milungu jawo ni kugumula yipilala yakwe.

²⁵ Mundumicileje Une AMBUJE Mlungu jwenu, ni tinjimjaliwasya, pakumpa yakulya ni mesi. Tinjityosya yilwele yosope pasikati penu.

²⁶ Pangali jwamkongwe mcilambo cenu jutacijasanga kapena kuŵa jwangaŵeleka, jwalijose tacikola umi wawulewu.

²⁷ Ŵandu wosope ŵakulimbana ni jemanja tinjajogoya kuti anjogope une. Tinjiyika pasikati pa ŵandu ŵamkumenyana nawo ni kwasokonesya. Ni amagongo ŵenu ŵosope tacigalawuka ni kutila.

²⁸ Tinjitumisya matendewu, ni kwatoposya Ahifi, Akenani, ni Ahiti, jemanja mkanimjinjile mcilamboco.

²⁹ Nginatoposya ŵandu wosopewo m'caka cimo, ni mkaŵa mcilambomo kuŵa mwangali ŵandu, ni kumlecela yinyama ya mwitinji yejinji kumpunda jemanja.

³⁰ Nambo tinatopoleje panandipanandi, mpaka patimciŵelekana ŵandu ŵajinji, ni kucijigala cilambo cosopeco.

³¹ Tinjimŵicila malile ga cilambo cenu, tigacitandila ku Nyasa Jecejewu* mpaka ku Nyasa ja Afilisiti, ni kutandila soni ku cipululu mpaka ku Lusulo lwa Yufuleti. Tinjimpa macili gakwapundila ŵandu ŵa mcilambomo pa ngondo, ni timcatoposya mcilambomo.

³² Mkaja kutenda nawo cilanga* jemanjajo kapena milungu jawo.

³³ Akaja kutama mcilambo cenu, nimkaŵa kuja kumlemwekasya, naga mkuja kujipopela milungu jawo, timkatanjile.”