Ekisodo 22 - Chiyawo Bible

Malamusi gakulipila magambo

¹ “Mundu naga akwiŵa ng'ombe kapena ngondolo, ni kujiwulaga kapena kujisumisya, akwenela kulipila ng'ombe msano pa ng'ombe jimo, kapena ngondolo mcece pa ngondolo jimo.

² “Nambo naga mundu jwawiyi akukamulwa ali mkugumula nyumba cilo, akuputwa mpakana kuwa, mundu jwakuwulagajo nganakola magambo gakuwulaga.

³ Nambo naga mundu jwawiyijo akuwulajidwa lisiku lili likopwece, mundu jwakuwulagajo akwete magambo gakuwulaga. Mundu jwawiyi jwalijose akwenela kulipila. Naga mundu jwawiyi akukamulwa, ni akulepela kulipila magambo, akwenela kumsumisya ligongo lyawiyi wakwewo.

⁴ Naga cinyama cajiŵileco cikusimanikwa ca umi m'myala mwakwe, kanga ng'ombe, kanga bulu, kanga ngondolo, mundu jwawiyijo alipile kwakwana kaŵili yinyama yajiŵileyo.

⁵ “Naga mundu akuyilecelela yilangwa yakwe, kwinjila mu mgunda wa mundu jwine, ni kuja kulya mbeju sya mu mgundamo, msyene yilangwayo alipile mbeju syambone mnope, kapena mipeleya jambone mnope ja mu mgunda mwakwe.

⁶ “Naga moto ukukolela mpaka kuja kwika kwitinji, ni ukuja koca liwunjili lya tiligu, kapena tiligu jwali mu mgunda jwangakata, kapena mgunda ukwete mbeju, mundu jwatandisye motowo akwenela kulipila yindu yijonasiceyo.

⁷ “Naga mundu akumsunjisya mjakwe mbiya kapena katundu, sikwiŵidwa m'nyumba ja mundu jwakusunga jula, naga mundu jwawiyijo akukamulwa, alipile kwakwana kaŵili.

⁸ Nambo naga mundu jwajiŵile ngakusimanikwa, amjigale msyene nyumba jula, ni kwika najo pameso pa Mlungu ni Mose,* kuti alumbile kuti katundujo nginajigala jwalakwe.

⁹ “Naga ukupagwa ukangani wa mtundu uliwose, pa yindu yili yose ya msyene, kanga tijiŵe ng'ombe, kanga bulu, kanga ngondolo, kanga yakuwala kapena cindu cilicose cacijasice, cele jwine akuti cili cakwe, ŵandu ŵaŵiliwo ayice nawo pameso pawo Mlungu. Jutasimanikwe ni Mlungu kuti alemwisye, amlipile mjakwejo kakwana kaŵili.

¹⁰ “Naga mundu akupeleka ng'ombe, ngondolo, kapena cilango cilicose ca mundu jwine kuti amloleleje, nambo cilangwa cila ni cikuwa, kapena kuwulala, kapena kujigalwa, pangali jwine mboni,

¹¹ mundujo akwenela kwawula ku malo ga mapopelo kukulumbila* kuti jwalakwejo nganajiŵa cilango ca mundu jwine cila kukutenda umboni kusimicisya kuti nganajigala cilango ca msyenejo. Msyene cilangojo akwenela kwiticisya, ni mundu jwine jwakulolelajo akalipila kandu.

¹² Nambo naga cilangwaco cajiŵidwe cili m'myala mwa jwakulolelajo, akwenela kumlipila msyene cilangwa.

¹³ Naga cakamwilwe ni yilombo, ajigale yiŵalo yakwe yakusigalila kuti yiŵe mboni, nambo akusalipila ligongo lya cilango cacikamwilwe ni yilomboco.

¹⁴ “Naga mundu akwasima cilango ca mjakwe, sambano cilangwa cila cikuwulala kapena kuwa msyene pali pangali, jwakwasima cilangwaco alipile.

¹⁵ Nambo naga yeleyi yikutendeka msyene ali papopo, jwakwasimajo akalipila. Naga cilangwaco ŵacijasime pakupeleka mbiya, cisumene ni mbiyasyo.

Malamusi ga ndamo ja ŵandu ni malamusi ga mapopelo

¹⁶ “Naga mundu akumnyenga mwali jwamkanagoneje ni ŵalume, soni jwangatomelwa, na kugona najo, alipile mtengo ŵa ulombela ni amlombe.

¹⁷ Nambo naga babagwe mwalijo akukana kuti mwanace jwakwejo akalombedwa ni jwalakwejo, mundujo akwenela kulipilape mbiya syakulandana ni mtengo ŵa ulombela wa ŵali ŵa mkaniŵamanya ŵalume.

¹⁸ “Mundu jwamkongwe jwakutenda ya usaŵi, akamkunda kuti akole umi.

¹⁹ “Jwalijose jwakutenda msangu ni cinyama, awulajidwe.

²⁰ “Jwalijose jwakutaga mbopesi kwa milungu jine, ngaŵaga kwa AMBUJE* Mlungu, jwelejo awulajidwe.

²¹ “Mkasimumlagasya mlendo kapena kumtamika mwa ukapolo, pakuŵa jemanja soni mwaliji acalendo mcilambo ca Iguputo.

²² Mkasimumlagasya jwamkongwe jwamasije kapena mwanace jwa masije jwalijose.

²³ Naga mkwalagasya, tinjikupikana kulila kwawo, ndaŵi jakundilila une kuti nakamucisye,

²⁴ tinjitumbila mnope, ni kumwulaga pa ngondo. Aciŵamkwenu ni ŵanace ŵenu taciŵa ŵamasije.

²⁵ “Naga mkumkongosya mbiya mundu jwalijose, jwa ŵandu ŵangu ŵakulaga, ŵali pasikati penu, mkatendaga mpela mwakutendela ŵandu ŵakukongosya mbiya, mkasimumkanganicisya kupeleka mbiya syakonjecesya.

²⁶ Naga mkujigala cakuwala ca mundu mpela cikole, kuti mpaka talipile, mumwucisye lisiku mkanilikapile,

²⁷ pakuŵa cakuliwunicila cakwe cili cicoco peco, soni cili cakulicenjela pa cilu cakwe. Nambi takaliwunicile cici? Tinjikupikana kulila kwakwe, naga akundilila une kuti namkamucisye, tinjimjanga pakuŵa une ndili jwa canasa.

²⁸ “Mkasimumnyosa Mlungu, soni mkasimumlwesa jwakulongolela jwa ŵandu ŵenu.

²⁹ “Mkakokoŵa kumba yakupeleka kutyocela ku yagowola yenu yejinji, soni kutyocela pa finyo jwenu jwejinji mjusunjile m'migolo jenu. “Mumbe une ŵanace ŵenu ŵacalume ŵandanda kupagwa.

³⁰ Mtende soni myoyo ni ŵanace ŵandanda kupagwa ŵa ng'ombe syenu ni ngondolo syenu. Mwanace jwandanda kupagwajo taciŵa ni mamagwe masiku msano ni gaŵili, ni mumpelece kwa une pa lisiku lya msano ni gatatu.

³¹ “Timŵe ŵandu ŵangu, ni pa lyele ligongoli, mkalya nyama ja cilango cili cakukamulwa ni yilombo kwitinji. Nyama jelejo timsipe m'mbwa.