Ekisodo 21 - Chiyawo Bible

Malamusi gakusunjila acikapolo

¹ “Sambano, Aisalaeli mwasalile maloŵe aga:

² Naga mkumsuma kapolo jwa Cihebeli, tacimkamulila masengo yaka msano ni cimo, mu caka ca msano ni kaŵili, akwenela kuŵa mlukosyo, pangali cakulipila cilicose jwalakwejo.

³ Nambo naga ŵayice jika, akwenela kutyoka soni jika, nambo naga pakwikapo ŵayice ni ŵamkwakwe, pakutyoka tacityocela yalumo ni ŵamkwakwewo.

⁴ Naga ambujegwe ŵampele jwamkongwe kuti alombele, ni akumŵelecela ŵanace, jwamkongwejo pampepe ni ŵanace wosopewo ali ŵa ambujegwewo. Tacityoka jwamlumejo jika.

⁵ Nambo naga kapolojo akusala kuti, ‘Ngwanonyela ŵalakwe ambuje, ŵamkwangu ni ŵanace ŵangu, ni ngangusosa kuŵa mlukosyo,’

⁶ ambujegwewo ayice najo kapolojo ku Nyumba ja AMBUJE.* Ayice najo ni kumjimika petanga kapena felemu ja litanga, ni ambujegwe ampowole lipikanilo ni cisyano cakupowolela. Myoyo taciŵa kapolo jwa ambujegwewo umi wakwe wosope.

⁷ “Naga mundu akumsumisya mwanace jwakwe jwamkongwe ku ukapolo, mwanacejo ngisaŵomboledwa mpela mwakusatendela ni kapolo jwamlume.

⁸ Naga mundujo akuwona kuti jwamkongwejo ngakumsalalila m'meso mwakwe akwenela kumsumisya soni kwa babagwe, nambo mundujo nginakola macili ga kumsumisya jwamkongwejo kwa ŵandu ŵa cilendo, ligongo jwele mundujo nginatenda yindu yakulupicika.

⁹ Naga mundujo, akumsuma jwamkongwejo kuti aŵe ŵamkwakwe ŵa mwanagwawo jwamlume, amsunje mpela mwanagwawo jwamkongwe.

¹⁰ Naga akulombela mitala, akwenela kumsamalila jwandanda jula, pamkupa yakulya ni yakuwala ni kumtendela yosope yakusosekwa pa ulombela.

¹¹ Naga ngakumtendela yele yindu yitatuyi, amgopole kuti aŵe mlukosyo, nambo ngapocela malipilo gali gose.

Malamusi ga magambo gakuwulaga mundu ni ga ndewo

¹² “Mundu jwalijose jwakumputa mjakwe mpaka kumwulaga, nombe najo awulajidwe.

¹³ Nambo naga atesile mwa ngosi, kwakuti nganaganicisya yakumwulaga mjakwejo, nambo yitendekwe mwakusaka kwawo Mlungu, tinjimlosya malo gakuti atilile jwalakwejo.

¹⁴ Nambo naga mundu akuliŵicila cile, kumwulaga mjakwe mwa melepe mwa litala lya cinyengo, akwenela kuwulajidwa nditu, atamose ali atilile ku malo gangu gakupelecela mbopesi.

¹⁵ “Mundu jwalijose jwakwaputa babagwe kapena mamagwe, awulajidwe.

¹⁶ “Mundu jwalijose jwakumjiŵa mundu mjakwe, kuja kumsumisya kapena kumsunga mpela kapolo, akwenela kuwulajidwa.

¹⁷ “Mundu jwalijose jwakwalwesa babagwe kapena mamagwe, awulajidwe.

¹⁸ “Ŵandu naga akukangana, jumo akumsoma mjakwe ni liganga kapena kumputa ni mkono, mundu jwakuputwajo nginaŵa, nambo akulwala kwa mpaka kugona nako pa ugono,

¹⁹ ni pa nyuma pakwe akwimuka ni kwendajenda kusa ni simbo, mundu jwakuputajo ngasamwucisya mbusyo, nambo alipile ligongo lya ndaŵi jijasice piŵaliji cigonele pa ugono jila. Soni akwenela kumlolela mjakwejo mpaka ali aposile kwene.

²⁰ “Naga mundu akumputa kapolo jwakwe jwamlume kapena jwamkongwe ni simbo, ni kapolojo akuwila papopo, mundujo akwenela kuwulajidwa.

²¹ Nambo naga kapolojo akuŵa ciŵela umi kwa lisiku lya mtundu kapena kwa masiku gaŵili, ambujegwewo akawulajidwa, ligongo kapolojo ali cipanje cakwe.

²² “Ndaŵi jakumenyana acalume, ni ŵamo ŵacalumewo akwatuta ŵakongwe ŵana cilu, ni ŵakongwewo akwasanga ciluco, nambo pangali kuwulala kwine soni, ŵalume ŵamwulesye ŵakongwewo, akwenela kulipila mtengo uliwose wutalamule ŵamkwawo, mwakwiticisyana ni acakulungwa ŵakulamula panganya.

²³ Nambo naga ŵakongwewo awulele, kulipila kwakwe tikuciŵa: umi kulipila umi,

²⁴ liso kulipila liso, lino kulipila lino, mkono kulipila mkono, lusajo kulipila lusajo,

²⁵ koca ni moto kulipila koca ni moto, liŵanga kulipila liŵanga, kuyimba kulipila kuyimba.

²⁶ “Mundu naga akumputa kapolo jwamlume kapena jwamkongwe pa liso, ni kulitusula lisolyo, kapolojo amlece kuti aŵe jwamgopoledwe, ligongo lya liso lyakwe lijonasicelo.

²⁷ Naga akumputa ni kumkuwula lino kapolo jwamlume kapena jwamkongwe, kapolojo amgopole kuti aŵe mlukosyo ligongo lya lino lyakwe lijasicelyo.

Yakwenela kutenda ŵakwete yinyama yakulanga

²⁸ “Naga ng'ombe jikumgunda mundu jwamlume kapena jwamkongwe ni misengo jakwe, ajiwulaje pa kujisoma ni maganga, nyama jakwe akalya. Nambo msyene ng'ombe akakola magambo gali gose.

²⁹ Nambo naga ndamo ja ng'ombejo jaliji jagunda ŵandu, ni msyene ng'ombe ŵamgombelesye, nambo nganajitaŵa, naga ng'ombejo jikumgunda mundu jwamlume kapena jwamkongwe, ajiwulaje pakujisoma maganga. Soni msyene ng'ombe awulajidwe.

³⁰ Nambo naga msyene ng'ombejo akumkunda kuti aliwombole, akwenela kulipila cilicose citamlamule, kuti awukulupusye umi wakwe.

³¹ Naga ng'ombe jikumgunda mwanace jwamlume kapena jwamkongwe ni misengo jakwe, lilamusi lyakwe ni lilyolyo basi.

³² Naga ng'ombe jikumgunda kapolo jwamlume kapena jwamkongwe, msyene ng'ombe amlipile msyene acikapolo, mbiya sya silifa* makumi gatatu, ni ng'ombejo ajiwulaje pakujisoma ni maganga.

³³ “Naga mundu akuwukula lisimbo, kapena akusola lisimbo ni akulileka lyangawunicila, sambano ng'ombe kapena bulu jikugwila mwelemo,

³⁴ msyene lisimbolyo akwenela kulipila ligongo lya cinyamaco, akwenela kulipila mbiya kwa msyene cinyamaco, nambo nyama jewejo ajigale jiŵe jakwe.

³⁵ “Naga ng'ombe ja mundu jwine jikuwulaga ng'ombe ja mjakwe, ŵandu ŵaŵiliwo ajisumisye ng'ombe ja umijo, ni kugaŵana mbiya syakwe. Agaŵane soni nyama ja ng'ombe jakuwajo.

³⁶ Nambo naga yikumanyika kuti jaliji ndamo ja ng'ombejo kugunda ŵandu, ni msyenejo nganajitaŵaga, msyene ng'ombejo akwenela kupeleka ng'ombe ja cijumi kwa msyene ng'ombe jakuwajo. Ni ng'ombe jakuwajo ajijigale jiŵe jakwe.