Ekisodo 20 - Chiyawo Bible

Malamusi likumi

¹ Mlungu ŵaŵecete aga maloŵe gosopega, ŵatite,

² “Une ndili AMBUJE* Mlungu jwenu junamkopwesye mu ukapolo, mcilambo ca Iguputo.

³ “Mkamkola milungu jine, akaŵe une jika.

⁴ “Mkasimlipanganicisya cindu cilicose cakusepa, atamose kupanganya cindu, cakulandanicisya ni cindu cilicose ca kwinani, kapena pa cilambo capasi, kapena cindu cili m'mesi ga pasi pa cilambo.

⁵ Mkasimyitindiŵalila kapena kuyipopela yeleyi, pakuŵa Une AMBUJE Mlungu jwenu, nganimkunda kuti mkole milungu jine. Soni ngupeleka cilango kwa ŵanace ligongo lya yakulemwa ya acinangolo ŵawo, kuyicila mpago watatu ni wamcece, wa ŵandu ŵakuŵengana ni une.

⁶ Nambo ngusalosya cinonyelo cangu cangamala kwa ŵandu ŵajinji, ŵa mipago jangaŵalanjika, ŵakunonyela une ni kugasunga malamusi gangu.

⁷ “Mkalikamulisya masengo gangalumbana lina lya AMBUJE Mlungu jwenu, pakuŵa AMBUJE ngasalepela kumpa cilango, mundu jwakulikamulisya masengo gangalumbana, lina lyakwelyo.

⁸ “Mkumbucileje lisiku lya Sabato kuti liŵe lisiku lyakupumula.*

⁹ Masiku msano ni limo mkamule masengo genu gosope.

¹⁰ Nambo lisiku lya Sabato, lili lisiku lyakupumula ligongo lya une, AMBUJE Mlungu jwenu, pa lyele lyuŵali mkasimkamula masengo m'mwejo, kapena ŵanace ŵenu, kapena ŵamasengo ŵenu, atamose yinyama yenu kapena acalendo ŵali pasikati penu.

¹¹ Pakuŵa masiku msano ni limo, AMBUJE ŵamalisisye kupanganya kwinani, cilambo capasi ni nyasa, ni yindu yosope yamwelemo, nambo pa lisiku lya msano ni kaŵili ŵapumwile, ni ligongo lyakwe AMBUJE ŵalipele upile lisiku lya Sabato ni kuliswejesya.

¹² “Mwacimbicisye atati ŵenu ni mama ŵenu, kuti masiku ga umi wenu gaŵe gamajinji, mcilambo cele cakumpa AMBUJE Mlungu jwenu.

¹³ “Mkawulaga.

¹⁴ “Mkatenda cikululu.

¹⁵ “Mkajiŵa.

¹⁶ “Mkapeleka umboni wakumlambucisya mjenu.

¹⁷ “Mkakumbila nyumba ja mjenu. Mkakumbila ŵakongwe ŵa ajenu, atamose ŵamasengo ŵakwe ŵalume, atamose ŵamasengo ŵakwe ŵakongwe, atamose ng'ombe jakwe, atamose bulu jwakwe kapena cindu cilicose ca mjenu.”

Ŵandu akutenda woga

¹⁸ Ŵandu wosope piŵakupikene kulindima ni kulila kwa lipenga, piŵasiweni njasi ni lyosi petumbipo, wakamwile woga, ŵaliji mkutetemela, ni ŵajimi pakutalicila.

¹⁹ Ŵanduwo ŵamsalile Mose* kuti, “Mŵecete m'mwejo ni uwe, ni uweji tupikane, nambo akakunda kuti Mlungu aŵecete ni uwe, ni mkaŵa uweji kuwa.”

²⁰ Mose ŵajanjile kuti, “Mkajogopa, Mlungu ayice kukumlinga, kuti kumcimbicisya kwakwe kuŵeje kwa kutyocela m'mitima mwenu, kuti mkaleŵa.”

²¹ Ŵandu ŵajimi kwakutalicila, nambo Mose ŵaŵandicile kucipi cekulungwa ku ŵaliji Mlungu.

Malamusi ga pa malo gakupelecela mbopesi

²² AMBUJE ŵamsalile Mose kuti, “Mjawule mkasalile Aisalaeli kuti, ‘Mlolite mwacimsyene kuti Une Mlungu mbecete ni jemanja ndili kwinani.

²³ Mkasimpanganya milungu ja silifa* kapena ja golidi,* kuti mjilambileje pampepe ni Une.

²⁴ Mundaŵile malo gakupelecela mbopesi ga litaka, pelepo mpeleceje mbopesi syenu syakutinisya, ni mbopesi sya mkamulano, kutyocela ku ngondolo, mbusi kapena ng'ombe syenu. Pa malo gali gose gatinamsalile kuti mulambileje, Une tinjiyika kukumpa upile.

²⁵ Naga mkundaŵila Une malo gakupelecela mbopesi ni maganga, mkasimsepa maganga gakwe, ligongo naga mkusepa ni yida yakusepela, timcigasakasya malo gakupelecela mbopesigo.

²⁶ Pamkwawula kumalo gangu gakupelecela mbopesi, kukaŵa kwana masitepe, ligongo nimkaŵa kulosya umakonope wenu, pakuliŵata masitepego.’ ”