Ekisodo 19 - Chiyawo Bible

Aisalaeli Kwitumbi lya Sinayi

^1-2 Aisalaeli ŵatyosile ku Lefidimu, ni pa lisiku lyandanda lya mwesi watatu cityocele ku Iguputo jemanjajo ŵayice ku cipululu ciŵandika ni Litumbi lya Sinayi. Kweleko ŵataŵile masakasa gawo mungulugulu mwa Litumbi lya Sinayi.

³ Mose* ŵakwesile litumbi kuja kusimana ni Mlungu. AMBUJE* ni ŵamŵilasile ŵamsalile kuti, “Mlisalile liŵasa lya Yakobo,* ni mŵecete ni ŵanace wosope ŵa Aisalaeli kuti,

⁴ ‘Myiweni yindu yinayitesile kwa Aiguputo, ni kuti namnyakwile jemanja mpela mwele nyanga jikusanyakulila ŵanace ŵakwe pa mapapiko gakwe, ni kumyicisya kwa une namsyene.

⁵ Sambano, naga timumbikanile maloŵe gangu, ni kusunga cilanga* cangu, timŵe ŵandu ŵangu pasikati pa ngosyo syosope, pakuŵa cilambo cosope capasi cili cangu.

⁶ Jemanja timciŵa ŵandu ŵakundumicila une mpela ŵakutaga mbopesi, soni mpela lukosyo lweswela. Gelega ni maloŵe gatimkasalile Aisalaeli.’ ”

⁷ Myoyo Mose ŵayice ni ŵaŵilasile acakulungwakulungwa ŵa Aisalaeli, ni ŵasalile maloŵe gosope ago AMBUJE ŵamlamwile kuti agasale.

⁸ Ni ŵandu wosope ŵajanjile pampepe kuti, “Tuyitende yosope yasasile AMBUJE.” Panyuma pakwe Mose ŵajawile kuja kwasalila AMBUJE, yiŵasasile ŵandu ŵala.

⁹ Ni AMBUJE ŵamsalile Mose kuti, “Tiyice kwenumwe mwiwunde lyakandapala, kuti ŵandu akambikane patingaŵeceteje ni m'mwejo, soni kuti akakulupilile kwa yaka yosope.” Myoyo Mose ŵasalile AMBUJE, yiŵasasile ŵandu ŵala.

¹⁰ AMBUJE ŵamsalile Mose kuti, “Mjawule kwa ŵanduwo ni mkasalile aŵe m'mipingu lelo ni malaŵi. Akacape yakuwala yawo,

¹¹ ni aliŵicile cile mtondo, pa lyele lyuŵali, Une AMBUJE tinjituluka Petumbi lya Sinayi, kuti ŵandu wosope akambone.

¹² Ŵanduwo, mkalembele malile kusyungula litumbilyo, ni mkasalile kuti, ‘Mlolecesye kuti, mkakwela litumbi kapena kugakwaya malile gakwe, jwalijose jutalikwaye litumbilyo, akwenela kuwa.

¹³ Jwalijose akamkwaya mundujo, nambo ŵandu amsome ni maganga kapena amsome ni mipamba. Kanga ciŵe cinyama, taciciwulaga, kanga mundu soni tacimwulagape. Nambo patacipikana gomba kwa lipenga, ŵandu tayice kwitumbi.’ ”

¹⁴ Mose ŵatulwice mwitumbi, ni ŵayice kuŵaliji ŵanduwo ni ŵasalile yosope yiŵamsalile AMBUJE. Mose ŵaswejesye ŵanduwo, ni ŵacapile yakuwala yawo.

¹⁵ Mose ŵasalile kuti, “Mliŵicile cile kwana mapopelo mtondo, soni mkasimumkwaya jwamkongwe pa masiku gelega.”

¹⁶ Kundaŵi kwa lisiku lyakwelyo, kwapali kulindima ni kumesya kwa njasi, ni lyapali liwunde lyakandapala petumbipo, ni kulila kwakukulungwa kwa lipenga. Ŵandu wosope ŵaliji m'masakasa ŵatetemele ligongo wakamwile woga.

¹⁷ Mose ŵalongolele ŵandu kutyocela ku masakasa, kuti akasimane ni Mlungu, wosopewo ŵajimi mungulugulu litumbi.

¹⁸ Litumbi lyosope lya Sinayi lyaliji mkutuka lyosi, ligongo lyakuti AMBUJE ŵatulwice pacanya petumbi ni moto, lyosilyo lyakwesile mpela lyosi lyakopoka pa ng'aso, ni litumbi lyosope lyatenganyice mnope.

¹⁹ Kulila kwa lipenga kwaliji mkukulilakulila. Ndaŵi jele Mose ŵaliji mkuŵeceta, Mlungu ŵamjanjile ni kulindima.

²⁰ AMBUJE ŵayice penani Petumbi lya Sinayi, ŵamŵilasile Mose kuti akwele penani pa litumbipo, ni Mose ŵakwesile petumbilyo.

²¹ Ni AMBUJE ŵamsalile Mose kuti, “Mtuluce, mkagombelesye ŵandu kuti akasumba malile kusaka kundolecesya une, ni mkaŵa kuwa ŵandu ŵajinji.

²² Ŵakutaga mbopesi nombe nawo, ŵakwika kuŵandikana ni une, aŵe pa m'mipingu nombe nawo, kogopela kuti tinjigamba kwajonanga.”

²³ Mose ŵatite kwa AMBUJE, “Ŵanduŵa ngakomboleka kukwela litumbi alino, ligongo ŵalakwe ŵatusalile cile kuti, ‘Mkalembe malile kusyungula litumbi, ni mkagombelesye ŵanduwo kuti akaja kusumba malilego.’ ”

²⁴ AMBUJE ŵamsalile Mose kuti, “Mtuluce pasi, ni mkamjigale Aloni* ayice akuno. Nambo ŵakutaga mbopesi pamo ni ŵandu ŵane, akasumba malile kwika kundili une kuno, ni mkaŵa une kwajonanga.”

²⁵ Mose ŵatulwice mwitumbi kuja kuŵaliji ŵandu kula, ni ŵasalile yiŵaŵecete AMBUJE.