Ekisodo 18 - Chiyawo Bible

Yetelo ŵamjendele Mose

¹ Yetelo, jwakutaga mbopesi jwa ku Midiyani, akwegwe wawo Mose* ŵayipikene yosope yene yila Mlungu ŵamtendele Mose, ni Aisalaeli ŵandu ŵakwe. Ŵapikene soni yiŵatesile AMBUJE* pakwakoposya Aisalaeli ku Iguputo.

² Myoyo Yetelo, akwegwe ŵawo Mose, ŵamjigele Sipola, ŵamkwawo Mose. Ŵele Mose, ŵatumisye kaje kuja ku musi.

³ Yetelo ŵajigele soni ŵanace ŵaŵili ŵa Sipola, Mwanace jwandanda, Mose ŵampele lina lyakuti Geleshomu, (kugopolela kwakwe ni kuti, “Naliji mlendo mcilambo ca cilendo.”)

⁴ Mwanace jwakwe jwaŵili, Mose ŵampele lina lyakuti, Eliyesa, (gopolela kuti, “Mlungu jwa atati ŵangu ni jwali cikamucisyo cangu, ŵangulupwisye une ku upanga wa Mwenye jwa ku Iguputo.”)

⁵ Yetelo, ŵayice ni ŵamkwawo Mose ni ŵanace ŵakwe ŵacalume, ku cipululu kula, kumalo kwele Mose ŵataŵile masakasa, Petumbi lya Mlungu.

⁶ Mundu jwine ŵamsalile Mose kuti, “Akwegwe ŵenu Yetelo akwisa pampepe ni ŵamkwenu ni ŵanace ŵenu ŵaŵili ŵacalume.”

⁷ Piŵawupikene ŵele utengawu, Mose ŵajawile kukumcingamila ni ŵasimene najo, ŵamjinamile ni ŵamkomasisye. Ali akomasyanile ni kuwusyana ya umi, ŵajinjile mu tenti.

⁸ Mose ŵamsalile Yetelo yosope AMBUJE ŵamtesile Mwenye jwa ku Iguputo ni Aiguputo, ligongo lya Aisalaeli. Ŵamsalile soni ya yisawusyo yiŵasimene nayo mwitala, ni yosope yiŵayitesile AMBUJE pa kwakulupusya.

⁹ Yetelo ŵasangalele mnope ni masengo ngambone, gele AMBUJE ŵatendele Aisalaeli, pakwakulupusya kumacili ga Aiguputo.

¹⁰ Yetelo ŵatite, “Acimbicikwe AMBUJE, ŵaŵamkulupwisye kwa Aiguputo ni kwa Mwenye jwa ku Iguputo. Soni ŵaŵakulupwisye ŵandu ŵakwe ku makono ga macili ga Aiguputo.

¹¹ Sambano ngumanyilila kuti AMBUJE ali ŵamacili kujipunda milungu jine josope, ligongo ŵakulupwisye ŵandu ŵawo ku makono ga macili ga Aiguputo, ndaŵi jele Aiguputowo ŵaliji mkwanyosya Aisalaeli.”

¹² Yetelo ŵapelece mbopesi jakutinisya kwa Mlungu, ni mbopesi sine. Aloni* ni acakulungwakulungwa ŵa Aisalaeli, ŵayice kulya cakulya pampepe ni Yetelo mkwegwe gwawo Mose, pameso pawo Mlungu.

Mose akwaŵika ŵakulamula

¹³ Kundaŵi kwakwe Mose ŵatemi pasi pasikati pa ŵandu kulamula magambo, ni ŵandu ŵayikaga ni magambo gawo kwa Mose, kutandila kundaŵi mpaka ligulo

¹⁴ Yetelo, mkwegwe gwawo Mose, piŵayiweni yosope yiŵatendaga Mose, ŵamwusisye kuti, “Ana yosopeyi yimkwatendela ŵanduyi yili yamtuli? Ligongo cici mkulamula magambo ga ŵandu wosopeŵa jika, ni ŵandu akwika kwenumwe kutandila kundaŵi mpaka ligulo?”

¹⁵ Mose ŵajanjile akwegwe ŵawo ŵala kuti, “Ngwenela kutenda yindu yeleyi ligongo lyakuti ŵanduŵa akwika kwa une, kuti alipikanile acimsyene yakusosa Mlungu.

¹⁶ Naga akanganile, akwisa kwa une, ni ngusalamula ni kulola ŵani ŵalemwisye. Ni ngwamanyisya yigakuti malamusi ni majiganyo ga Mlungu.”

¹⁷ Ni Yetelo ŵatite, “Yakutendayi ngakutenda cenene.

¹⁸ Ŵalakwe pampepe ni ŵandu ŵali nawoŵa, tapele mwacitema. Ligongo masengo gelega gali gamakulungwa kupundana ni macili genu, ngakomboleka kugatenda ŵalakwe jika.

¹⁹ Ambikanile sambano, nape lunda, ni Mlungu taŵe ni ŵalakwe. Ŵalakwe akwenela kwima m'malo mwa ŵandu pameso pa Mlungu, ni kujigala yakangana yawo kwa Jwalakwe.

²⁰ Akwenela kwajiganya malamusi ni majiganyo ga Mlungu ni kwamanyisya yitajileje pakutama ni yakwenela kuyitenda.

²¹ Ŵasagule ŵandu ŵalunda, ŵaŵice kuti aŵe ŵakwalongolela ŵandu camti myiyi: ŵakulongolela ŵa ŵandu 1,000, ŵane ŵandu 100, ŵane ŵandu 50, ŵane ŵandu likumipe. Akwenela kuŵa ŵandu ŵakumjogopa Mlungu, ŵakulupicika, ni ŵangapocela yindu ya pacisyepela.

²² Ŵakunde kuti ŵalamuleje ŵandu ndaŵi syosope. Ni ayiceje ni magambo gakusawusya mnope kwa ŵalakwe, nambo magambo ga mnono alamulaneje acimsyene. Pakutenda myoyo masengo tiganandipe, ligongo jemanjajo taŵe ali mkukamusyana masengo ni ŵalakwe.

²³ Naga akutenda ŵalakwe yeleyi, ni soni naga Mlungu akwalamula ŵalakwe kuti ayitende, ngasapela, ni ŵandu wosopeŵa taciwujila kumangwawo, yindu yosope yayicileje yili yimasile mwa mtendele.”

²⁴ Mose ŵapikanile yosope yiŵaŵecete akwegwe ŵawo yila.

²⁵ Ni ŵasagwile ŵandu ŵalunda pasikati pa Aisalaeli, ni ŵaŵisile kuti aŵe ŵakwalongolela ŵandu camti myiyi: ŵakulongolela ŵandu 1,000, ŵane ŵandu 100, ŵane ŵandu 50, ŵane ŵandu likumipe,

²⁶ jemanjajo ŵaliji mkwalamula ŵandu ndaŵi syosope. Magambo gakusawusyape ŵayikaga nago kwa Mose, nambo magambo ga mnono ŵaliji mkugalamula acimsyenepe.

²⁷ Yetelo piŵamasile kumlanga Mose, ŵawujile kumangwawo.