Ekisodo 17 - Chiyawo Bible

Mesi gakukopoka m'lwala

¹ Likuga lyosope lya ŵanace ŵa ku Isalaeli lyatyosile ku cipululu ca Sini, ni ŵajendaga mpela muŵalamulilaga AMBUJE,* kutyoka pa malo gacigono cine, kuja pa malo ga cigono cine soni. Ni ŵataŵile masakasa gawo ku Lefidimu. Kweleko soni kwaliji kwangali mesi gakumwa.

² Ŵanduwo ŵatandite kangana najo Mose,* ŵatite, “Mtupe mesi gakumwa.” Ni Mose ŵawusisye kuti, “Ligongo cici mkukangana ni une? Ligongo cici mkwalinga AMBUJE?”

³ Nambo ŵandu ŵala jakwete njota mnope, ni ŵandu ŵamdandawulile Mose kuti, “Ligongo cici mwatukopwesye ku Iguputo, kuti mtuwulaje uwe, ni ŵanace ŵetu ni yilangwa yetu, ni njota?”

⁴ Mose ŵapopesile kwa AMBUJE, ŵatite, “Ana ndende nawo uli ŵandu ŵeleŵa? Pakuŵa asigele panandi kumbonya maganga.”

⁵ Myoyo AMBUJE ŵamsalile Mose kuti, “Mjawule kwali ŵanduwo, mwajigale acakulungwakulungwa ŵane ŵa ku Isalaeli, ni mkaŵe pasogolo pa ŵanduwo. Ni mkajigale simbo jimwaputile najo mesi ga mu Lusulo lwa Nayilo jila, ni mkajawule.

⁶ Kweleko Une tingajime pasogolo penu, pa lwala luli Petumbi lya Sinayi. Mkapute lwalalo, ni mesi tigakakopoce m'lwalamo, kuti ŵanduwo akamwe.” Mose ŵatesile yeleyo pameso pa acakulungwakulungwa ŵa ku Isalaeli ŵala.

⁷ Malogo ŵagapele mena gakuti Masa ni Meliba, ligongo lyakuti Aisalaeli ŵakanganile ni Mose, soni ŵamlinjile AMBUJE piŵawusisye kuti, “Ana AMBUJE ali pampepe ni um'weji, kapena iyayi?”

Aisalaeli akumenyana ni Amaleki

⁸ Ni ŵayice ŵandu ŵa mtundu ŵa Aamaleki ku Lefidimu, kukumenyana ni Aisalaeli.

⁹ Mose ŵamsalile Yoswa kuti, “Msagule acalume ŵane, malaŵi mjawule kumenyana nawo ngondo Amaleki. Une tingajime penani pa litumbi, ndili ngamulile simbo jiŵambele Mlungu jila.”

¹⁰ Yoswa ŵatesile mpela mwele Mose ŵamsalile, ŵajawile kuja kumenyana nawo Aamaleki. Ndaŵi jijojo Mose, Aloni* ni Huli ŵakwesile penani pa litumbi.

¹¹ Mose ŵatiji mkukwesya makono gakwe kwinani, Aisalaeli ŵaliji mkupunda pa ngondo, nambo ŵatiji mkutulusya pasi makono gakwe, Amaleki ŵaliji mkupunda pa ngondojo.

¹² Nambo makono ga Mose gapesile, myoyo Aloni pampepe ni Huli, ŵajigele liganga ni kumtamicila Mose kuti atame, ni ŵatemi pelepo. Ŵandu ŵaŵiliŵa ŵatemi jwine aku jwine aku, ali agakamwile makono ga Mose, ni kuganyakulila mwinani. Ŵagakamwile Myoyo mpaka lyuŵa kukapila.

¹³ Pakutenda myoyo, Yoswa ŵawuleje ŵandu ŵa mtundu ŵa Aamaleki, pa ngondo ni mawupanga.

¹⁴ AMBUJE ŵamsalile Mose kuti, “Myilembe yeleyi m'buku kuti yikaliŵalicika, ni mŵalanje mwakwesya maloŵe kwa Yoswa kuti, ‘Tinawujonanje mtundu wosope ŵa Aamaleki, ngasawukumbucila soni pacilambo capasi.’ ”

¹⁵ Mose ŵataŵile malo gakupelecela mbopesi, ni ŵagapele lina lyakuti, “AMBUJE ni ŵali mbendela jangu.”

¹⁶ Ni ŵatite, “Kwesyani mbendela ja AMBUJE! AMBUJE tapitilisye kuputa ngondo ni Amaleki mpaka kalakala.”