Ekisodo 16 - Chiyawo Bible

Mana ni Yuti

¹ Likuga lyosope lya Aisalaeli, ŵatyosile ku Elimu, ni pa lisiku lya 15 lya mwesi waŵili cityocele ku Iguputo, ŵayice ku cipululu ca Sini, gali pasikati pa Elimu ni Sinayi.

² Likuga lyosope lya Aisalaeli lya mdandawulile Mose* ni Aloni* mcipululu mula kuti,

³ “Yikaliji cenene AMBUJE* akatuwulaje uweji ku Iguputo kulakula, kutwaliji mkutama tuli mkulya nyama ni mikate, twaliji mkwikuta. Nambo jemanja mtujigele uweji mpaka ku cipululu kuno kuti mtuwulaje wosopewe ni sala.”

⁴ AMBUJE ŵamsalile Mose kuti, “Tinampe yakulya yitiyigwe mpela ula kutyocela kwinani. Ŵandu takopoceje lisiku ni lisiku kuja kulokotanya yakulya yakwanila lisiku limo, kuti nalinje, soni kuti nalole naga akwenda mwakuya malamusi gangu, kapena iyayi.

⁵ Pa lisiku lya msano ni limo, pakukolosya yakulya yiŵalokotenye ya lyele lyuŵalyo, tacisimana kuti yili yakwanila masiku gaŵili.”

⁶ Myoyo Mose ni Aloni ŵasalile Aisalaeli wosope kuti, “Lelo, ligulo lino tim'manyilile kuti AMBUJE ni ŵaŵamkopwesye jemanja ku cilambo ca Iguputo,

⁷ kundaŵi, timkuwone kumelemenda kwa lilanguka lya AMBUJE. Pakuŵa agapikene madandawulo genu gamkwadandawulila AMBUJE gala. Pakuŵa uwe ŵani, kuti mkutudandawulila uweji?”

⁸ Mose ŵatite kuti, “AMBUJE, ni ŵitampe ligulo nyama jakuti mlye, ni kundaŵi tampe yakulya ya mpaka kwikuta, ligongo AMBUJE agapikene madandawulo genu gamkwadandawulila gala. Pakuŵa uwe ŵani? Kudandawula kwenu ngamkutudandawulila uweji, nambo AMBUJE.”

⁹ Mose ŵamsalile Aloni kuti, “Mlisalile likuga lyosope lya Aisalaeli kuti, ‘Myice, kuti mjime pameso pa AMBUJE, pakuŵa kudandawula kwenu kosope akupikene.’ ”

¹⁰ Ndaŵi jele Aloni ŵaŵecetaga ni likuga lyosope Aisalaeli, ŵanduwo ŵagalawice kulola ku cipululu, mwacisisimucila kumelemenda kwa lilanguka lya AMBUJE, kwawonecele m'mawunde.

¹¹ AMBUJE ŵamsalile Mose kuti,

¹² “Nakupikene kudandawula kwa Aisalaeli. Mŵecetane nawo ni mwasalile kuti, ligulo timlye nyama, kundaŵi ticijikuta ni yakulya, tacimanyilila kuti une AMBUJE ndili Mlungu jwawo.”

¹³ Ligulo yuti yayice, yagumbele pa malo posope piŵataŵile masakasagago. Ni kundaŵi kwakwe kwaliji kwana mangame pa luŵala losope lwa kusyungulila masakasago.

¹⁴ Pagatyosile mangamego, pasigalile yindu yine yeswela, yakunyata, yakuwoneka mpela matimba, petaka lya mcipululu mula.

¹⁵ Aisalaeli piŵayiweni yele yinduyo nganayimanyilila, ni ŵatandite kuwusyana kuti, “Ana celeci cici?” Mose ŵasalile kuti, “Yeleyi ni yakulya yapelece AMBUJE kuti mlyeje.

¹⁶ Nambo AMBUJE alamwile kuti, ‘Mundu jwalijose alokote malita gaŵili pa mundu jwalijose, ajigale mpela mwaŵelele winji wa ŵandu mwiŵasa mwakwe.’ ”

¹⁷ Aisalaeli ŵatesile myoyo, ŵane ŵalokwete yejinji, ŵane panandi.

¹⁸ Nambo piŵajile kulinga mu cakulinjila ca malita gaŵili, ŵayiweni kuti ŵiŵalokwete yejinji ŵala, paliji pangali yakusigala, nombe ŵiŵalokwete ya panandi ŵala, nganiyipelembela, Jwalijose ŵalokotenye yakwanila kulya.

¹⁹ Mose ŵasalile jemanjajo kuti, “Mundu jwalijose akasalasya mpaka kundaŵi.”

²⁰ Nambo ŵandu ŵane ŵa jemanjajo nganapikanila yiŵasalile Mose, ŵasalesye yakusigala mpaka kundaŵi. Nambo pakwacele ŵayiweni kuti yosopeyo yaliji mkununga, soni yaliji yana mbisu, ni Mose ŵatumbilile jemanjajo.

²¹ Kundaŵi kulikose, jwalijose ŵalokotanyaga muŵasoselaga kulya, nambo lili likwesile lisiku yakulya yiyasigalile pa luŵala pala, yanyelenyendwice.

²² Pa lisiku lya msano ni limo ŵalokotaga yakulya ya masiku gaŵili, yakwanila malita mcece ni litika kwa mundu jumo, ni acakulungwa ŵakwalongolela Aisalaeli ŵayice kwa Mose kukumsalila ya yeleyo.

²³ Mose ŵasalile kuti, “AMBUJE alamwile kuti, ‘Malaŵi lili lisiku lyakupumula,* lisiku lya Sabato lyakupelecedwa kwa AMBUJE. Mjoce yimkusaka koca, mtelece yimkusaka kuteleka. Yakusigalayo msalasye pambali mpaka ku ndaŵi.’ ”

²⁴ Ŵanduwo ŵasalesye yakusigalayo mpaka kundaŵi, mpela muŵagombelecesye Mose, yakulyayo nganiyiwola, soni nganiyikopoka mbisu.

²⁵ Mose ŵasalile Aisalaeli kuti, “Mlyeje yeleyi lelo jino, ligongo lelo lili lisiku lya Sabato lyakupelecedwa kwa AMBUJE, lelo ngamja kuyisimana kusa.

²⁶ Mlokoteje yakulya masiku msano ni limo, nambo pa lisiku lya msano ni kaŵili, lisiku lya Sabato, yakulyayo ngasimyisimana.”

²⁷ Pa lisiku lya msano ni kaŵililyo ŵandu ŵane ŵakopwece kusa kuti akalokote yakulya, nambo nganayisimana.

²⁸ Ni AMBUJE ŵamwusisye Mose kuti, “Ana timŵe mli mkukana kupikanila malamusi gangu ni majiganyo gangu, mpaka cakaci?

²⁹ Mkumbucile kuti une AMBUJE ni junampele lisiku lya Sabato. Ni ligongo lyakwe ngumpa yakulya yakwanila masiku gaŵili, pa lisiku lya msano ni limo. Jwalijose agambe kutama. Akatyoka mundu jwalijose pa mlango pakwe pa lyuŵa lya msano ni kaŵili.”

³⁰ Myoyo ŵandu nganakamulaga masengo pa lisiku lya msano ni kaŵili.

³¹ Aisalaeli ŵacikolasile cakulyaco lina lyakwe mana. Yawonekaga mpela songolo sya mapemba, soni yaliji yeswela. Pakulya yalyolyopelaga mpela mabisikete gewanganye ni uci.

³² Mose ni ŵatite, “AMBUJE alamwile kuti, ‘Msalasye malita gaŵili ga mana, kuti yisukulu yenu tiyipakombole kuyiwona yakulya yele yinampele mcipululu, ndili namkopwesye mcilambo cila ca Iguputo.’ ”

³³ Mose ŵamsalile Aloni kuti, “Mjigale lulo, mŵice mwelemo mana jakwanila malita gaŵili. Patim'male kuŵika mjigale ni kuŵika pameso pa AMBUJE kuti manago gasunjice ligongo lya yisukulu yenu.”

³⁴ Aloni ŵaluŵisile lulo mwaliji mana mula, pasogolo pa Libokosi lya Cilanga* ca AMBUJE, mpela AMBUJE ŵamlamulile Mose, kuti manago gasunjice.

³⁵ Aisalaeli ŵalile mana kwa yaka 40, mpaka piŵayice ku cilambo cakutama ŵandu. Ŵalile mana mpaka pa ŵayice m'malile mwa cilambo ca Kenani.

³⁶ Malita gaŵili gakulandana ni kacipinyasi kalikumi ka efa.