Ekisodo 15 - Chiyawo Bible

Nyimbo ja Mose

¹ Mose* pampepe ni Aisalaeli ŵajimbile nyimbo aji, kwajimbila AMBUJE,* ŵatite kuti: “Tinajimbile AMBUJE ligongo lyakuti apundile, agaponyisye m'nyasa mahaci ni ŵandu ŵakwela ŵa ku Iguputo.

² AMBUJE ali macili gangu, ni ŵele ŵangulupwisye une. Ŵelewo ni ŵali Mlungu jwangu, tinjalumba. Ali Mlungu jwa atati ŵangu, tinjatogolela,

³ AMBUJE ali ŵa ngondo, Lina lyawo lili AMBUJE.

⁴ “AMBUJE ŵagaponyisye m'nyasa, mageleta ga Mwenye jwa ku Iguputo ni ŵa ngondo ŵakwe, ŵakulongolela ŵakwe ŵa ngondo ŵamacili, ŵatiŵisye m'Nyasa Jecejewu.

⁵ Nyasa jakusokoka jawunicile wosope, ŵatitimile mpaka pasi pa nyasa mpela maganga.

⁶ “Mkono ŵawo wamlyo, ŵalakwe AMBUJE, ŵana lumbili, ligongo lya macili gawo, mkono wawo wamlyo ukwatusula amagongo.

⁷ Akwapunda amagongo ŵawo ni lumbili lwawo lwekulungwa. Ukali wawo ukolela mpela moto, ukwatinisya mpela manyasi.

⁸ Pimwapepesile lipuje lya mumbula mwenu, mesi gawunjikene pa malo gamo. Mesi gakujilima gajimi mwakongoka mpela lipupa, mesi ga nyasa jakusokokajo gajumwile mpaka pasi pakwe.

⁹ M'magongo jula ŵatite, ‘Tinakuye ni kwakamula, tinacigaŵanye cipanje cawo, mtima wangu tucijikutila naco. Tinjiswekula upanga wangu, ni kwajonanga ni mkono wangu.’

¹⁰ Nambo ŵalakwe ŵagambile kupepela ni mbungo jawo ni nyasa jatiŵisye, ŵatitimile mpela cisyano ca usito, mpaka pasi pa mesi.

¹¹ “Ŵalakwe AMBUJE, ana jipali milungu jine jakulandana ni ŵalakwe? Ŵani ŵakulandana ni ŵalakwe, ŵali ŵakucimbicika ligongo lya kugoloka kwawo? Ŵani ŵakulandana ni ŵalakwe, wawo ali ŵakogoya ligongo lya masengo gawo gamacili ni gakusimonjeka?

¹² Mwatambasukwile AMBUJE ŵenu wamlyo, cilambo camisile amagongo ŵetu.

¹³ “Mwakulupicika ku cilanga cenu, mwalongolele ŵandu ŵimwawombwele, Mwamacili genu mwalongolele, kumalo ga cilambo cenu ceswela.

¹⁴ Ŵandu ŵa ngosyo sine ajipikene nganiji, akutetemela ni woga. Woga wawukulungwa wakamwile ŵandu ŵakutama mcilambo ca Filisitiya.

¹⁵ Sambano acayimwene ŵa cilambo ca Edomu, ngakumanyilila yakutenda, Ŵakulongolela ŵa cilambo ca Mowabu, akutetemela. Wosope ŵakutama mcilambo ca Kenani, atengwice m'malungo.

¹⁶ Ŵandu wosopewo wakamwile woga wakogoya. Ligongo lya kogopa macili ga mkono wenu atemi jii ngawulukuta mpela liganga, mpaka ŵandu ŵenu, AMBUJE, ali ŵapelete, ŵandu ŵimwawombwele mu ukapolo.

¹⁷ Timcajinjisya ni kwatamika petumbi lyenu, malo gele ŵalakwe AMBUJE ŵagapanganyisye, kuti gaŵe malo gawo, m'nyumba jakupopelela, jiŵajitaŵile ŵalakwe.

¹⁸ AMBUJE taŵe mwenye mpaka kalakala.”

Nyimbo ja Miliyamu

¹⁹ Ndaŵi jele mahaci ga Mwenye jwa ku Iguputo, pampepe ni mageleta gakwe, ni ŵandu ŵakwela, ŵajinjile m'nyasa, AMBUJE ŵagawucisye mesigo, ni kwatiŵisya wosopewo. Nambo Aisalaeli ŵajesile cilikati ca nyasajo, pasi pali papajumu.

²⁰ Miliyamu, jwakulocesya* jwamkongwe, mlumbugwawo Aloni,* ŵajigele kagoma m'myala mwakwe, ni acakongwe wosope ŵamkuyisye panyuma ali mkugomba tugoma twawo m'myala, ali mkuŵina.

²¹ Miliyamu pamo ni acakongwe ŵajimbile nyimbo jakwalumba AMBUJE, jakuti, “Mumjimbile AMBUJE ligongo lyakuti apundile, agaponyisye mahaci m'nyasa pampepe ni ŵandu ŵakukwela ŵakwe.”

Mesi gakuŵaŵa

²² Myoyo Mose ŵalongolele Aisalaeli kutyocela ku Nyasa Jecejewu* jila, ni ŵajinjile mcipululu ca Shuli. Ŵajesile mcipululumo kwa masiku gatatu, ni nganagasimana mesi.

²³ Ni ŵajile kwika ku Mala, nambo nganapakombola kumwa mesi ga ku Malako ligongo galiji gakuŵaŵa. Ni ligongo lyakwe ŵagakolasile malogo, lina lyakuti Mala.

²⁴ Ŵandu ŵala ŵamdandawulile Mose, ni ŵamwusisye kuti, “Ana uweji citumwe cici?”

²⁵ Mose ŵapopesile kwa AMBUJE, ni AMBUJE ŵamlosisye katela. Mose ŵakaponyisye katelako m'mesi, ni mesigo galesile kuŵaŵako. Kweleko AMBUJE ŵapele ŵanduwo lilamusi lyakutamilicika, ni ŵalinjile soni ŵanduwo kweleko.

²⁶ AMBUJE ŵatite, “Naga mkumbikanila une, AMBUJE Mlungu jwenu, ni kutenda yindu yakulungamika, ni kugasunga malamusi gangu, ni kuyipikanila yosope yingumgombelesya kuti myitende, ngasinimpa cilango ca yilwele yili yose yinayipelece kwa Aiguputo. Ligongo une ndili AMBUJE ŵingusamposya jemanja.”

²⁷ Panyuma pakwe ŵayice ku Elimu, kuyapali yisima ya nduluko ja mesi 12, ni yitela ya migwalangwa 70, ni ŵataŵile masakasa gawo kweleko mungulugulu mesigo.