Ekisodo 14 - Chiyawo Bible

Aisalaeli akomboka Nyasa Jecejewu

¹ AMBUJE* ŵamsalile Mose* kuti,

² “Mwasalile Aisalaeli kuti awujilile, ni kutaŵa masakasa gawo pasogolo pa Pihahiloti, pasikati pa Migidoli ni nyasa, mwakulolegana ni Baala Sefoni. Mtaŵe masakasa genu mungulugulu nyasajo.

³ Pelepo Mwenye jwa ku Iguputo taciganicisya kuti, ‘Aisalaeli asokonecele mcilambo, casiŵilisye cipululu.’

⁴ Tinjimjumusya mtima Mwenye jwa ku Iguputo, tacakuya Aisalaeliwo. Mwenye jwa ku Iguputo ni likuga lyakwe lyosope tinjapunda pa ngondo. Tinjipocela une ucimbicimbi, pelepo Aiguputo wosope tacimanyilila kuti une ndili AMBUJE.” Aisalaeli ŵayitesile yosope mpela muŵasalile.

⁵ Mwenye jwa ku Iguputo, piŵapikene kuti ŵandu atisile, jwalakwejo pampepe ni nduna syakwe syosope, ŵapitikwisye nganisyo syawo pa Aisalaeli. Ŵatite, “Ana uweji pelepa tutesile cici? Twakundile Aisalaeli kuti atyoce ni kuleka kututumicila uweji.”

⁶ Mwenye jwa ku Iguputo ŵaliŵicile cile ligeleta lyakwe lya ngondo, ni ŵasalile asilikali ŵakwe kuti alongane najo.

⁷ Ŵajigele mageleta gamacili 600 pampepe ni mageleta gane gosope ga mu Iguputo, ŵaŵisile ŵakulongolela pa mageleta gosopego.

⁸ AMBUJE ŵamjumwisye mtima Mwenye jwa ku Iguputo, ni jwalakwe ŵakuyisye Aisalaeli, ŵa ŵaliji mkutyoka mcilambo ca Iguputo ali mkupoka.

⁹ Aiguputo ŵakuyisye Aisalaeli, ni mahaci ni mageleta gosope ga Mwenye jwa ku Iguputo, ni asilikali ŵa ngondo ŵakwela pa mahaci ni pa mageleta, ŵajile kwasimana Aisalaeli pa malo piŵataŵile masakasa mungulugulu nyasa, pakuŵandikana ni Pihahiloti, mwakulolegana ni Baala Sefoni.

¹⁰ Sambano Mwenye jwa ku Iguputo piŵaŵandicile, Aisalaeli ŵalolite kuti Aiguputo ŵaliji mkwakuya, wakamwile woga mnope, ŵatandite kulila mwagumila kwa AMBUJE.

¹¹ Ni ŵamwusisye Mose kuti, “Ana ligongo lyakuti kwaliji kwangali malo ga malembe ku Iguputo, ni ligongo lyakwe jemanja mwatujigele uweji kuti tuwile mcipululu muno? Mlole yimtutendele uweji pakutukoposya mcilambo ca Iguputo?

¹² Ana uweji nganitumsalila cile ya yindu yeleyi, mkanitutyoce ku Iguputo kula? Ana uweji nganitumsalila kuti, ‘Mtulece, tutame tuli mkwatumicila Aiguputo, kulekangana ni kuti tuwile mcipululu muno.’ ”

¹³ Ni Mose ŵajanjile ŵanduwo kuti, “Mkasimjogopa! Mlimbangane! Mgambeje kulola yitatende AMBUJE lelo jino pakusosa kumkulupusya. Aiguputo ŵamkwawona lelo jinoŵa, ngasimwawona soni.

¹⁴ AMBUJE ni ŵatamputile ngondo, jemanja ngamtenda kandu kalikose, timgambe kutama.”

¹⁵ Ni AMBUJE ŵamwusisye Mose kuti, “Ligongo cici mkundilila une? Mwasalile Aisalaeli kuti, ajendeje msogolo.

¹⁶ Mnyakule simbo jenu, ni mtambasukule mkono wenu pa nyasa, kuti mjigaŵanye nyasajo kuti Aisalaeli ajomboce papajumu.

¹⁷ Tinajumusye mitima Aiguputowo, kuti ŵakuye ŵa ku Isalaeli ni kwinjila m'nyasa, ni tinjipata ucimbicimbi, ligongo lya kumpunda pa ngondo Mwenye jwa ku Iguputo ni asilikali ŵakwe ŵa ngondo, mageleta gakwe ni soni ŵakwendesya ŵakwe.

¹⁸ Ni Aiguputowo tamanyilile kuti une ndili AMBUJE, pitalole yitinjile pa kumpunda pa ngondo Mwenye jwa ku Iguputo ni mageleta gakwe ni ŵakugajendesya ŵakwe.”

¹⁹ Lilayika lya Mlungu, lilyalongolelaga asilikali ŵa ngondo ŵa ci Isalaeli ŵala, lyajesile camunyuma mwawo. Cipilala ca liwunde cicatamaga pasogolo pawo catemi panyuma pawo.

²⁰ Caliji pasikati pa likuga lya ngondo lya Aiguputo ni likuga lya ngondo lya Aisalaeli. Myoyo lyapali liwunde ni cipi, kwakuti makuga gaŵili ga ngondogo nganigaŵandikana cilo cosopeco.

²¹ Mose ŵatambasukwile mkono wakwe pa nyasa, AMBUJE ŵajijimice nyasa, pakujipujisya mbungo jamacili ja kungopoko lyuŵa, jijapujile cilo cosope ŵajijumusye nyasajo. Mesigo gagaŵanice,

²² ni gajimi mpela lipupa kumbali ja mkono wamlyo ni kumbali ja mkono wa mciji, myoyo Aisalaeli ŵajombwece pasikati pa nyasa pali pejumu.

²³ Aiguputo ŵala ŵakuyisye Aisalaeli ŵala mpaka kuja kwinjila nawo m'nyasa mula. Mahaci gosope ga Mwenye jwa ku Iguputo gajinjile m'nyasa, pampepe ni mageleta ni ŵakwendesya ŵakwe.

²⁴ Kumasikusiku, AMBUJE, ali m'cipilala ca moto ni ca liwunde, ŵalolecesye ŵandu ŵa ngondo ŵa ku Iguputo ni ŵatesisye woga.

²⁵ Ŵayipindile yitungulu ya mageleta gawo, mwakuti mageletago gajendaga mwakulajilila, Aiguputo ŵala ŵatite, “Kwende twalece Aisalaeliŵa, ligongo AMBUJE akwaputila ngondo jakulimbana ni uweji.”

²⁶ AMBUJE ŵamsalile Mose kuti, “Mtambasukule mkono wenu pa nyasa kuti mesigo gawujile, kwatiŵisya Aiguputo pampepe ni mageleta gawo ni ŵandu ŵakwendesya ŵakwe.”

²⁷ Mose ŵatambasukwile mkono wakwe pa nyasa, pakwacaga kundaŵi mesigo galiji gali gawujile m'malo mwakwe. Aiguputo ŵalinjile kugatila mesigo, nambo AMBUJE ŵatutile Aiguputowo pasikati pa nyasa.

²⁸ Mesigo gawujile, gatiŵisye mageleta gosope ni ŵandu ŵa kwendesya wakwe, ni likuga lyosope lya asilikali ŵa ngondo ŵa Mwenye jwa ku Iguputo, ŵiŵaliji mkwakuya Aisalaeli ŵala. Paliji pangali mundu juŵakulupwice.

²⁹ Nambo Aisalaeli wosope ŵala ŵajombwece nyasajo pasi pali papajumu, mesi gali gagambile kwima mpela lipupa ku mkono wawo wamlyo ni ku mkono wawo wamciji.

³⁰ Pa lyele lyuŵali, AMBUJE ŵakulupwisye Aisalaeli kwa Aiguputo. Aisalaeli ŵajiweni mitembo ja Aiguputo jili mbambamba mungulugulu nyasa.

³¹ Aisalaeli piŵagaweni macili gamakulungwa giŵalosisye AMBUJE, pakwawulaga amagongo ŵawo ŵala, ŵanduwo ŵatandite kwajogopa AMBUJE, ŵakulupilile AMBUJE ni Mose jwakutumicila jwawo.