Ekisodo 12 - Chiyawo Bible

Pasaka

¹ AMBUJE* ŵaŵecete ni Mose* ni Aloni* mcilambo ca Iguputo cila kuti,

² “Mwesi awuno uŵeje mwesi wenu wandanda wakutandila caka.

³ Mwagombelesye ŵandu wosope ŵa mtundu ŵa ku Isalaeli kuti, pa lyuŵa lya likumi lya mwesi awuno, mundu jwalijose jwamlume talisagulile liŵasa lyakwe mwanace jwangondolo kapena jwa mbusi jumope.

⁴ Naga liŵasa lyakwe linandipe, kwangaŵa mkujimala kulya nyama jamtundu, maŵasa gaŵili gakuŵandikana gapwatikane pampepe, ni agaŵane nyama mpela mwaŵelele ŵandu, sambano alile pamo wosopewo. Aŵalanjile cile winji wa ŵandu ŵatalye nyamajo, kuti apate kumanyilila winji wa nyama jitalye mundu jwalijose.

⁵ Mwanace jwangondolo jwakwe aŵe jwamlume, jwa caka cimope jwangalemala. Komboleka kusagula atamose mwanace jwa mbusi.

⁶ Ni timumsunje mpaka pa lisiku lya 14, lya mwesi uwowo, pa lisiku lyeleli ŵandu ŵa mtundu wa Isalaeli taciwulaga nyama syawosyo ndaŵi jegulo.

⁷ Ni tajigale miasi ja nyamajo ni kujipaka penani ni mumbali mwa milango ja nyumba jitakalile nyamajo.

⁸ Ni akalye nyamajo cilo cicoco jakoca, ni mkate wangali cakusasaŵilisya. Akalye pampepe ni liponda lyakuŵaŵa.

⁹ Mkaja kulya nyama jeŵisi kapena jakuteleka, nambo mkalye nyama josope ja koca, kupwatikanya mtwe, ngongolo ni yosope ya mkati.

¹⁰ Mkaja kusigasya nyama jine mpaka kundaŵi, nambo naga jine jikuja kusigala, mkajitinisye.

¹¹ Kulya kwakwe, mkalyeje camti myiyi: Mkawale yakuwala ya pa ulendo, sapato syenu sili kusajo, simbo syenu sili myala. Mkalyeje mwakwanguya. Lyeleli ni lisiku lya cindimba ca Pasaka ja kunjimbicisya une AMBUJE.

¹² “Pakuŵa une cele ciloco tinjipita mcilambo ca Iguputo, ni tinjiwulaga ŵanace wosope ŵandanda kupagwa mcilambo cosopeco, kutandila ŵa ŵandu ni ŵa yinyama yakwe. Tinjipeleka cilango kwa milungu josope ja Aiguputo. Une ndili AMBUJE.

¹³ Miasi ja pa mafelemu ga matangago, tijiciŵa cilocesyo cakulosya nyumba simkutama. Pitinjijiwona jele miasijo, tinjimpeleta jemanja, ni yipwetesi yakumjonanga ngasiyimyicila, ndaŵi jingucikunula cilambo ca Iguputo.

¹⁴ Mlisunjeje lyele lyuŵali ni timlikumbucileje lyuŵali ni kutenda cindimba, ni kwapopela AMBUJE. Mipago jenu josope jikakumbucileje lyele lyuŵali, kuti liŵe lilamusi lya yaka yosope, lyakuti mkatendeje cindimba pa lyele lyuŵali.”

Cindimba ca mikate jangali cakusasaŵilisya

¹⁵ Ni AMBUJE ŵatite, “Mkalyeje mikate jangali cakusasaŵilisya kwa masiku msano ni gaŵili. Pa lisiku lyandanda, mkatyosye cakusasaŵilisya m'majumba mwenu mosope, ligongo jwalijose jutacilya mkate wana cakusasaŵilisya pa gele masiku msano ni gaŵiligo, tacimtyosya pasikati pa Aisalaeli.

¹⁶ Pa lisiku lyandanda, ni pa lisiku lya msano ni gaŵililyo, mkatende msongano ŵakumlambila Mlungu. Mkaja kukamula masengo pa gele masikugo, akaŵe kuteleka yakulya yakuti mundu jwalijose alye, pa lyele lyuŵali, timcikomboleka kukolosya.

¹⁷ Cindimba* celeci ca mikate jangali cakusasaŵilisya, mcisunjeje, ligongo tinjiwukoposya mtundu wenu wosope, kutyoka mcilambo ca Iguputo pa lyele lisikuli. Myoyo mkalisunjeje lyele lisikuli, mpela mwa lilamusi lya yaka yosope, pa mipago jenu josope.

¹⁸ Mkalyeje mikate jangali cakusasaŵilisya, kutandila ligulo lya lisiku lya 14 lya mwesi wandanda, mpaka ligulo lya lisiku lya 21, lya mwesi uwowo.

¹⁹ Pa masiku msano ni gaŵili gosopego, mukasimanikwa cakusasaŵilisya m'majumba mwenu, ligongo jwalijose jutacilya cakulya cewanganye ni cakusasaŵilisya, tacimtyosya mu mtundu wa Aisalaeli, kutandila mlendo ni mlukosyo jwakwe.

²⁰ Mkaja kulya cilicose cana cakusasaŵilisya ku majumba genu gosope, mkagambeje kulya mikate jangaŵanganya ni cakusasaŵilisya.”

Pasaka jandanda

²¹ Ni Mose ŵaŵilasile acakulungwa wosope Aisalaeli, ni ŵasalile kuti, “Mjawule mkasagule mwanace jwangondolo jwakwanila kulya liŵasa lililyose, ni mkawulaje kutenda nyama ja Pasaka.

²² Mkajigale liwupulu lya lunyambi lwa kacitela ka hisope,* ni mkaloŵece m'miasi jitimkataje mu mbale. Ni mkapace miasijo mumbali syosope siŵili sya mlango ni penani pakwe. Mundu jwalijose akaja kukopoka m'nyumba mwakwe mpaka kundaŵi.

²³ Pakuŵa AMBUJE tacipita mcilambo cosope ca Iguputo, ni kwawulaga Aiguputo. Taciti mkujiwona miasi penani pa mlango ni mumbali siŵili sya mlango, AMBUJE taciwupeleta wele mlangowo, ni ngasakunda kuti malayika gawo gakuwulaga, gajinjile m'majumba mwenu kuti amwulaje.

²⁴ Mgapikanile gele malamusiga jemanja, ni ŵanace ŵenu, kwa yaka yosope.

²⁵ Ni patimcijinjila mcilambo cakumpaco AMBUJE, mpela yiŵatite pakutenda cilanga,* mkawusunje msyungu welewu.

²⁶ Ŵanace ŵenu taciŵa ali mkuwusya kuti, ‘Ana msyungu wumkutendawu ukugopolela cici?’

²⁷ Ni cimwajanjeje kuti, ‘Jeleji jili mbopesi ja Pasaka ja AMBUJE, ligongo lyakuti AMBUJEWO ŵasipelete nyumba sya Aisalaeli ku Iguputo, nyumba syetu ŵasilesile, ndaŵi jiŵawulagaga Aiguputowo.’ ” Piŵagapikene gele maloŵega, ŵandu ŵajinamile pasi ni kulambila.

²⁸ Ni Aisalaeli ŵajawile, ni ŵayitesile yosope yene, mpela mwele AMBUJE ŵamlamulile Mose ni Aloni.

Ciwa ca ŵanace ŵandanda kupagwa

²⁹ Pakati cilo, AMBUJE ŵawuleje ŵanace wosope ŵandanda kupagwa, mcilambo ca Iguputo. Kutandila mwanace jwandanda jwa Mwenye jwa ku Iguputo jwele juŵamjembecelaga kwinjila ucimwene wakwe, mpaka mwanace jwandanda jwa mkayidi jwali m'nyumba sya ukayidi sya cipi. Ni ŵanace wosope ŵandanda kupagwa ŵa yinyama ŵawulajidwe soni.

³⁰ Mwenye jwa ku Iguputo ni nduna syakwe syosope, pampepe ni Aiguputo wosope, ŵajimwice pakati cilo, ni mwaliji mwana malilo mcilambo cosope ca Iguputo, ligongo paliji pangali liŵasa limkanilikola mwanace jwam'we.

³¹ Cilo cicoco Mwenye jwa ku Iguputo ŵamŵilasile Mose ni Aloni, ni ŵasalile kuti, “Jemanja pamo ni Aisalaeli wosope, mjanguye, mtyoce. Mwalece ŵandu ŵangu, jawulani mkamtumicile AMBUJE mpela mumwaŵecetele.

³² Mjigale ngondolo syenu, mbusi syenu ni ng'ombe syenu syakwe, mpela mumwaŵecetele mula, ni mtyoce. Mkapopele kuti none jwakwe ampe upile.”

³³ Aiguputo ŵajanguyisye Aisalaeli kuti atyoce mcilambomo mwacitema citema, ni ŵasalaga kuti, “Tumale kuwa wosopewe naga ngamkutyoka.”

³⁴ Myoyo Aisalaeli ŵatasile utandi wa mikate wewunyile cile, nambo wangataga cakusasaŵilisya, mu mbale syakuwunyila mikate, ŵasiŵijilile mbalesyo mu nguwo, ni ŵatwicile pa makoyo gawo.

³⁵ Soni Aisalaeli ŵaliji ali atesile yosope, mpela muŵasalile Mose. Ŵaŵendile ŵandu ŵa ku Iguputowo yindu yakulisalalisya ya golidi* ni silifa,* ni yakuwala yakwe.

³⁶ AMBUJE ŵagalawisye ŵandu ŵa ku Iguputo kuti aŵe ŵambone mtima, ni ŵanduwo ŵapele Aisalaeli yosope yiŵaŵendaga. Pakutenda myoyo, Aisalaeli ŵacisumwile cipanje ca Aiguputo.

Aisalaeli akutyoka ku Iguputo

³⁷ Ni Aisalaeli ŵawutandite ulendo wa pasi kutyocela ku msinda wa Lamusesi kuja ku msinda wa Sukoti. Ŵapali acalume 600,000, ngaŵalanjila acakongwe ni ŵanace.

³⁸ Lyapali soni likuga lyalikulungwa lya ŵandu ŵa mitundu jine* ŵaŵalongene nawo, soni syapali ngondolo, mbusi pampepe ni ng'ombe syejinji.

³⁹ Ŵatelece mitanda ja mikate jangali cakusasaŵilisya, ja utandi wewunyile cile ula, uŵawumile nawo ku Iguputo kula. Nganataga cakusasaŵilisya ligongo ŵatyosile mwakutopolwa soni mwacisisimucila ku Iguputo kula. Nganakola lipesa lyakutelecela yakulya ya pa ulendo.

⁴⁰ Aisalaeli ŵatemi yaka 430 ku Iguputo kula.

⁴¹ Pa lyamasile lisiku lyakwanisya yaka 430, mitundu josope ja ŵandu ŵa AMBUJE, ŵamasile kutyoka mcilambo ca Iguputo.

⁴² AMBUJE ŵacesisye cilo cosope, kwakoposya Aisalaeli mcilambo ca Iguputo. Ni ligongo lyakwe cele ciloci cili ca AMBUJE cakuŵicidwa pajika, kwa ŵanace wosope ŵa ku Isalaeli ni kwa mipago yawo yosope. Kuti ciŵe cilo cele Aisalaeli wosope akwenela kucesya.

Malamusi ga Pasaka

⁴³ Ni AMBUJE ŵamsalile Mose ni Aloni kuti, “Malamusi gakwe ga Pasaka* ni aga: Mlendo jwalijose akalya nawo,

⁴⁴ nambo kapolo jwalijose jwamumsumile ni mbiya akukomboleka kulya nawo, nambo ali alongwele kuwumbala* kaje.

⁴⁵ Mlendo kapena jwamasengo jwenu jwalijose akalya nawo.

⁴⁶ Mlyeje mli m'nyumba jimpepe, mkasimkopoka najo pasa nyamajo, soni ngakasa mawupa gakwe.

⁴⁷ Mtundu wosope wa Isalaeli utendeje wele msyunguwu.

⁴⁸ Nambo naga apali mlendo pasikati penu, ni akusosa kutenda nawo msyungu wa Pasaka ja AMBUJE, mlongole kaje kwawumbasya acalume wosope ŵa mwiŵasa mwakwemo. Panyuma pakwe akukomboleka kwinjila ni kutenda nawo msyunguwo. Jwelejo muŵalanjile nditu kuti ali mlukosyo msyesyene jwa Isalaeli. Nambo jwamlume jwangawumbala akalya nawo cele cindimbaci.

⁴⁹ Lilamusi lyeleli lili lya mlukosyo msyesyene jwa Isalaeli, soni mlendo jwawumbele jwali pasikati penu.”

⁵⁰ Aisalaeli wosope ŵapikanile yeleyi, ni ŵayitesile yele AMBUJE ŵamlamwile Mose ni Aloni.

⁵¹ AMBUJE, ŵakopwesye ŵanace ŵa Isalaeli lisiku lilyolyo, kutyoka ku cilambo ca Iguputo, m'makugamakuga ga mitundu jawo.