Ekisodo 11 - Chiyawo Bible

Mose akwenesya ya ciwa ca ŵanace ŵandanda kupagwa

¹ AMBUJE* ŵamsalile Mose* kuti, “Sambano tinampe cilango cimo Mwenye jwa ku Iguputo, pamo ni ŵandu ŵakwe wosope. Panyuma pa cilango celeci, tacimkunda kuti mtyoce. Soni tacitenda kumtoposya kutyoka akuno, wangawujila soni.

² Sambano mwasalile ŵandu kuti, ‘Jwamlume jwalijose ni jwamkongwe jwalijose akaŵende ya kulisalalisya ya silifa* ni golidi* kwa mu Iguputo jwalijose jwaŵandikene najo.’ ”

³ Ni AMBUJE ŵapele mtima wakuŵeŵa Aiguputo kuti ŵasalalile mtima Aisalaeli. Cindu cine soni, Mose ŵaliji mundu jwakumanyika mnope mcilambo cosope ca Iguputo, kutandila pameso pa nduna sya Mwenye jwa ku Iguputo ni pameso pa ŵandu wosope.

⁴ Ni Mose ŵamsalile Mwenye jwa ku Iguputo kuti, “AMBUJE akusala kuti, ‘Pakati cilo timbite pasikati pa Aiguputo,

⁵ ni mwanace jwalijose jwandanda kupagwa mcilambo ca Iguputo cosope cino taciwulajidwa, kutandila mwanace jwandanda kupagwa jwa Mwenye jwa ku Iguputo, jwali jwakwenela kwinjila ucimwene wakwe, taciwulajidwa, mpakana mwanace jwandanda kupagwa jwa kapolo jwamkongwe jwa kusyaga pa lisyago. Mwanace jwandanda kupagwa jwa yinyama taciwa.

⁶ Ni timuciŵa mwana malilo mcilambo cosope ca Iguputo, gamkanigawonece citandilile kalakose, ni ngasigawoneka soni.

⁷ Nambo pasikati pa Aisalaeli, atamose m'mbwa gasijimguma mundu, atamose cilango cilicose, kuti m'manyilile kuti AMBUJE akusalekanganya pasikati pa Aiguputo ni Aisalaeli.’ ”

⁸ Ni Mose ŵamalisisye kuŵeceta ni aga maloŵega, “Ni nduna syenu syosope tisiciyika kwa une ni kunjinamila, ali mkusala kuti, ‘Tyokani ni ŵandu ŵenu wosope.’ Ni panyuma pakwe tinjityoka mu Iguputo.” Mose ŵatyosile pameso pa Mwenye jwa ku Iguputo ali atumbile mnope.

⁹ Ni AMBUJE ŵamsalile Mose kuti, “Mwenye jwa ku Iguputo tapitilisye kukana kumpikanila m'mwejo, kuti pakutenda myoyo, une nayitende yitagu yangu yakusimonjeka yejinji mcilambo ca Iguputo.”

¹⁰ Myoyo Mose ni Aloni* ŵayitesile yitagu yakusimonjeka yosopeyi pameso pa Mwenye jwa ku Iguputo. Nambo AMBUJE ŵamjumwisye mtima Mwenye jwa ku Iguputojo, ni nganiŵakunda Aisalaeli kutyoka mcilambo mwakwe.