Ekisodo 10 - Chiyawo Bible

Sombe

¹ AMBUJE* ŵamsalile Mose* kuti, “Mjawule kwa Mwenye jwa ku Iguputo, pakuŵa namjumwisye mtima jwalakwejo ni mtima wa nduna syakwe, kuti nayitende yitagu yakusimonjekayi pasikati pawo,

² ni jemanja cimwasalile ŵanace ŵenu ni yisukulu yenu ya yindu yosope yinayitesile pa Aiguputo, ni yitagu yakusimonjeka yinayitesile une pasikati pawo, kuti wosopemwe m'manyilile kuti une ndili AMBUJE.”

³ Mose ni Aloni* ŵajawile kwa Mwenye jwa ku Iguputo kuja kumsalila kuti, “AMBUJE, Mlungu jwa Ahebeli, akuwusya kuti, ‘Ana timkanepe kulitulusya pameso pangu mpaka cakaci? Mwakunde ŵandu ŵangu kuti ajawule, kuti akandumicile une.

⁴ Pakuŵa naga mkukanape kwakunda ŵandu ŵangu kuti akajawula, tindumisye sombe mcilambo cenu malaŵi,

⁵ ni sombesyo tisiciwunicila cilambo, litaka ngasiliwoneka, tisicilya yindu yosope yimkaniyijonasika ni matalila gala, soni tisicilya yitela yosope yayisipwice m'migunda mwenu,

⁶ soni sombesyo tisicigumbala m'majumba mwenu, ni m'majumba ga nduna syenu, ni m'majumba ga ŵandu ŵenu wosope ŵa mu Iguputo, cindu cele acatati ŵenu ni acambuje ŵenu nganaciwoneje cipagwile cawo.’ ” Ni Mose ŵagalawice ni ŵatyosile kwa Mwenye jwa ku Iguputo kula.

⁷ Nduna sya Mwenye jwa ku Iguputo syamwusisye Mwenye jwa ku Iguputojo kuti, “Ana mundu jweleju tatulece cakaci kutusawusya camti myiyi? Mwakunde ŵanduŵa kuti ajawule akamtumicile AMBUJE, Mlungu jwawo. Ana ngamkulola kuti cilambo ca Iguputo cimasile konasika sambano?”

⁸ Myoyo Mwenye jwa ku Iguputo ŵamŵilasile soni Mose ni Aloni ni ŵasalile kuti, “Mjawule mkatumicile AMBUJE Mlungu jwenu. Nambo sambano ŵakwawulawo ŵani?”

⁹ Ni Mose ŵajanjile kuti, “Uwe tujawule wosope pampepe ni ŵanace ŵetu, ni ngalamba syetu syakwe, tujawule ni ŵanace ŵetu ŵacalume ni ŵanace ŵetu ŵacakongwe, ngondolo syetu ni mbusi syetu syakwe. Tujigale soni ng'ombe, ligongo lyakuti tukatende cindimba cakwacimbicisya AMBUJE.”

¹⁰ Ni Mwenye jwa ku Iguputo ŵatite kwa jemanjajo, “AMBUJE atame ni wanganyamwe, naga une ngukunda kuti mwajigale aciŵamkwenu ni ŵanace ŵenu, kuti mjawuleje. Mlole, yili yaciwonecele kuti jemanja mkusosa kunjimucila.

¹¹ Iyayi, jemanja, acalumepe ni ŵatimjawule kuja kumtumicila AMBUJE, pakuŵa ni yimkusaka.” Ali amasile kuŵeceta gele maloŵega, Mose ni Aloni ŵatopoledwe kutyoka pameso pa Mwenye jwa ku Iguputo.

¹² AMBUJE ŵamsalile Mose kuti, “Mtambasukule mkono ŵenu pa cilambo ca Iguputo kuti sombe siyice, kuti silye yakumela yosope yasigele ndaŵi ja ula ja matalila jila.”

¹³ Myoyo Mose ŵanyakwile simbo jakwe ni kujilosya pa cilambo ca Iguputo, ni AMBUJE ŵajipujisye mbungo ja kungopoko lyuŵa, kuti jipuje pa cilamboco, cilo ni musi wakwe. Pakwacaga, cilambo cosope caliji cili cigumbele ni sombe syejinji.

¹⁴ Sombesyo syaciwunicile cilambo ca Iguputo, ni syatamilicice mcilambomo. Winji wa sombe syelesi, waliji wele umkaniwuwonece mcilambomo, soni ngasiwuwoneka.

¹⁵ Ligongo lyakuti sombesyo syaciwunicile cilambo cosope, cilamboco catesile cipi. Syalile yakumela yosope ya mcilambo, ni yisogosi yosope ya myitela, yiyasigele ndaŵi ja ula ja matalila jila. Pangali cindu caciŵisi cilicose cicasigele pa yitela, kapena pa cakumela cilicose ca mu mgunda, mcilambo cosope ca Iguputo.

¹⁶ Ni Mwenye jwa ku Iguputo ŵamŵilasile Mose ni Aloni mwacitema citema ni ŵasalile kuti, “Une nalemwecesye AMBUJE Mlungu jwenu, soni namlemwecesye jemanja.

¹⁷ Sambano conde ngumŵenda kuti, mungululucile akanopekano, mpopele kwa AMBUJE Mlungu jwenu, kuti andyocesye yipwetesi yakogoyayi.”

¹⁸ Mose ŵatyosile kwa Mwenye jwa ku Iguputo kula, ni ŵajile kupopela kwa AMBUJE.

¹⁹ Ni AMBUJE ŵapujisye mbungo ja kuwuma kungapilo lyuŵa jamacili, ni jatyosisye sombesyo, ni kusiponya m'Nyasa Jecejewu. Pangali sombe jilijose jijasigele mcilambo ca Iguputo.

²⁰ Nambo AMBUJE ŵamjumwisye mtima Mwenye jwa ku Iguputo, ni nganiŵakunda Aisalaeli kuti ajawuleje.

Cipi

²¹ Panyuma pakwe AMBUJE ŵamsalile Mose kuti, “Mkwesye mkono wenu kwinani kuti ciyice cipi cacikulungwa pa cilambo cosope ca Iguputo.”

²² Mose ŵakwesisye mkono wakwe kwinani, ni cayice cipi cacikulungwa mcilambo cosope ca Iguputo, kwa masiku gatatu.

²³ Aiguputo nganakombola kuwonegana, soni paliji pangali mundu juŵatyosile pa mlango wakwe kwa masiku gatatu gosopego. Nambo kumalo kuŵatamaga ŵanace ŵa Aisalaeli kula, kwaliji kwana lilanguka.

²⁴ Mwenye jwa ku Iguputo ŵamŵilasile Mose ni ŵamsalile kuti, “Jawulani mkamtumicile AMBUJE. Mjawule nawo soni aciŵamkwenu ni ŵanace ŵenu ŵakwe. Nambo ngondolo syenu, mbusi ni ng'ombe syenu sisigale kunokuno.”

²⁵ Nambo Mose ŵatite, “Naga yili myoyo mkwenela kutupa uweji nyama syakuti tukamtajile AMBUJE, Mlungu jwetu mbopesi syakoca ni mbopesi syakutinisya.

²⁶ Apo iyayi, uwe tujigale yinyama yetu, ngajisigala amta jimo, ligongo kutyocela mu yinyama yetuyo, tukwenela kuja kusagula yinyama yakwenela kuja kumtumicila nayo AMBUJE, Mlungu jwetu, ngatukumanyilila mtundu wa yinyama yatitukamtumicile nayo AMBUJE, mpaka tukayice kumaloko kaje.”

²⁷ Nambo AMBUJE ŵajumwisye mtima wa Mwenye jwa ku Iguputo, ni nganiŵakunda Aisalaeli kuti atyoce.

²⁸ Mwenye jwa ku Iguputo ŵamsalile Mose kuti, “Mtyoce apa. Soni mkalamuce, mkuyika soni pameso pangu, ligongo lisiku litimciwonegana ni une, tinjimwulaga.”

²⁹ Mose ŵajanjile kuti, “Yiŵe mpela mumŵecetele pemo, une ngasimbonegana soni ni m'mwejo.”