Detulonomo 9 - Chiyawo Bible

Ungapikanila wa ŵandu

¹ “Aisalaeli, pikanani. Msigele panandi komboka Lusulo lwa Yolodani, ni kuja kwinjila mcilambo kukusitoposya ngosyo sya ŵandu sili mwelemo. Ŵanduwotu ali ŵamacili kumpunda jemanja, soni ndenje sya mapupa syasilewulewu syakwika mpaka kwinani, sisyungulile misinda jawo.

² Ŵandu ŵa m'misindajo ali yisukulu ya ŵandu ŵa mtundu wa Aanakimu, ali ŵandu ŵalewulewu soni ŵamacili. Jemanja mkwamanyilila ŵandu ŵeleŵa, soni mwapikene ngani syawo kuti pangali mundu jwa mpakana alimbane nawo.

³ Nambo lelo m'manyilile kuti, AMBUJE* Mlungu jwenu aŵisile cilanga kuti takamlongolele mpela moto wakupita mcijoca yindu yosope muwukupita. Pandaŵi jimkuja kuputa ngondo ni amagongo ŵenu, timkajonanje ŵele ŵanduwo mwangasawusya, ni kucisumula cilambo cawo mpela muŵaŵecetele Ambuje mu cilanga* cakwe.

⁴ “Pitakamale AMBUJE Mlungu jwenu kumkamucisya kwatoposya ŵandu ŵa ngosyo sine mcilambomo, mkaja ganisya kuti amjinjisye ni kumpa cilamboco, ligongo lya yindu yambone yimtesile, iyayi. AMBUJE takatoposye ŵele ŵanduwo ligongo ali ŵandu ŵakusakala.

⁵ AMBUJE Mlungu jwenu takamkunde kucisumula cilamboco ngaŵa ligongo lyakuti jemanja mli ŵandu ŵambone ni ŵakulungamika, iyayi. Takamkamucisye kwatoposya ŵele ŵanduwo ligongo jemanjajo ali ŵakusakala. Soni ligongo lyakuti akusaka kusunga cilanga cawo ciŵapangene ni acinangolo ŵenu Abulahamu,* Isaki ni Yakobo.*

⁶ M'manyilile kuti AMBUJE Mlungu jwenu ngakucipeleka cilambo camboneci kwa jemanja ligongo lyakuti mli ŵandu ŵakulungama, iyayi, jemanja mli ŵandu ŵamakani.

⁷ “Mkaliŵalila yimwatite pakwatumbilisya AMBUJE Mlungu jwenu mcipululu mula. Mwaliji mkwajimucila kutandila lisiku limwakopwece mcilambo ca Iguputo, mpaka pa lisiku limwayice akuno.

⁸ Kwitumbi lya Sinayi kula mwatumbilisye soni AMBUJE, mpaka ŵasakaga kumjonanga.

⁹ Une nakwesile litumbi kuja kupocela mawubawo gaŵili ga maganga giŵalembilepo Cilanga ciŵapangene ni jemanja, AMBUJE. Natemi kweleko masiku makumi mcece, musi ni cilo, ni nganindya kapena kumwa kandu kalikose.

¹⁰ AMBUJE ŵambele mawubawo gaŵili ga maganga, giŵalembile asyene ni yala yawo maloŵe gosope kwambaga yiŵaŵecete ni jemanja, ali m'moto, pa lisiku lyelila, limwasongene kwitumbi kula.

¹¹ Kweli, AMBUJE ŵiŵambele uneji mawubawo ga maganga gaŵili giŵalembile cilanga gala, pali papite masiku makumi mcece, musi ni cilo.

¹² “AMBUJE ni ŵasalile kuti, ‘Mtuluce mwitumbi muno citemacitema, ligongo ŵandu ŵenu ŵimwalongolele kutyocela ku Iguputo ŵala, akasile malamusi gangu, ni atesile ulemwa* wekulungwa. Atandite kuŵa ŵandu ŵangambikanila une pa yindu yinalamwile kuti atendeje, ni alipanganyicisye acimsyene mlungu jwagumba.’

¹³ “Ŵasalile une soni kuti, ‘Ŵanduŵa ngwamanyilila cenene, kuti ali ŵandu ŵamakani.

¹⁴ Myoyo mkasimlinga kundekasya, ligongo ngusosa kwawulaga wosopewo, ni pangali mundu jwa pacilambo capasi pano jutacakumbucila, kuti ŵapali ŵandu ŵa mtundu welewo. Nambo yisukulu yenu tiyiciŵa mtundu ŵakulungwa ni wamacili kwapunda jemanjaji.’

¹⁵ “Mwitumbimo, mwaliji mkopoka lilamba lya moto, pa ndaŵi jinaliji mkutuluka mwelemo, ndili nyakwile m'magasa mwangu mawubawo gaŵili ga maganga giŵalembile AMBUJE cilanga gala.

¹⁶ Pinalolite, naweni kuti mwalemwecesye AMBUJE Mlungu jwenu. Ligongo mwalesile mwacitemacitema kugasunga malamusi giŵampele AMBUJEWO, pakulipanganyicisya mwacimsyene mlungu jwa mwanace jwa ng'ombe jwa cisyano.

¹⁷ Ndaŵi jijojo, une nagaponyisye pasi mawubawo ga maganga gala, nagakasile, jemanja mli mkulola.

¹⁸ Natindiŵele ni kupopela pameso pawo AMBUJE kwa masiku makumi mcece, musi ni cilo. Nganindya kapena kumwa kandu, ligongo lya jemanja ŵimwatesile ulemwa ni kwatumbilisya AMBUJE, pakupanganya mlungu jwa mwanace jwa ng'ombe jwa cisyano jula.

¹⁹ Uneji nawujogwepe ukali wakogoya wa AMBUJE, ligongo kutumbila kwawo kwaliji kwakuti mpaka amjonanje jemanja pamo ni Aloni.*

²⁰ Nipo AMBUJE ŵamtumbilile Aloni mwakuti ŵasakaga kumjonanga jwalakwejo pa ndaŵi jijojo, myoyo nampopelele Aloni, ni AMBUJEWO ŵakupikene kupopela kwangu.

²¹ Nacijigele cindu cimwacipanganyisye cila, mlungu jwa mwanace jwa ng'ombe jwa cisyano jula, ni namponyisye pamoto. Namkasile ni kumsyagasyaga, ni nalijasile liwu lyakwe mu lusulo lwakukopoka mwitumbi lula.

²² “Mwamtumbilisye soni AMBUJE Mlungu jwenu pimwaliji ku Tabela, ku Masa ni ku Kibuloti Hatafa.

²³ AMBUJE piŵamtumile jemanja kutyocela ku Kadeshi Baneya kuti mkajinjile mcilambo ciŵaliji mkucipeleka kwa jemanja. Mwagakanile Malamusi ga AMBUJE Mlungu jwenu, soni nginimwakulupilila ni kwapikanila.

²⁴ Kutandila pa ndaŵi jinatandite kum'manya jemanja, mŵele ŵandu ŵakwajimucila AMBUJE.

²⁵ “Myoyo une natindiŵele pameso pa AMBUJE ni napopesile masiku makumi mcece, musi ni cilo, ligongo namanyilile kuti ŵasimicisye yakumjonanga jemanja.

²⁶ Une napopesile camti myiyi, ‘Ŵalakwe AMBUJE Mlungu jwetu, conde akajonanga ŵandu ŵawoŵa, ŵiŵasagwile ŵalakwe asyene kuti aŵe ŵandu ŵa ŵalakwe. Ŵandu ŵiŵakulupwisye ni macili gawo gekulungwa, soni ŵalakwe ŵakopwesye mcilambo ca Iguputo.

²⁷ Abulahamu, Isaki ni Yakobo, acinangolo ŵa ŵandu ŵeleŵa, ŵaliji ŵandu ŵakulupicika kwa ŵalakwe. Conde ŵaganicisye acinangolo ŵeleŵa, soni akusagaŵalanjila makani gakwatendela ŵalakwe ŵandu ŵeleŵa, ni kusakala kwawo ni ulemwa wawo.

²⁸ Ligongo naga ŵalakwe akwajonanga ŵandu ŵawoŵa, ŵandu ŵa ku Iguputo tacisala kuti ŵalakwe alepele kwajinjisya Aisalaeli ku cilambo cimwaŵikene nawo cilanga. Tacijila soni kuti: Ŵakopwesye ŵandu ŵawo kuti akawulajile ku cipululu, pakuŵa ŵaliji mkuŵengana nawo.

²⁹ Nambo ŵalakwe AMBUJE mwasagwile Aisalaeli kuti aŵe ŵandu ŵenu, soni mwakopwesye ku Iguputo mwamacili genu gamakulungwa.’