Detulonomo 8 - Chiyawo Bible

Akwinjila cilambo cambone

¹ “Mgapikanile mwakulupicika malamusi gosope ginampele jemanja lelo jinoga, kuti mtame ni umi, mŵelekane, soni kuti mkatamilicice mcilambo ciŵatesile cilanga* AMBUJE* Mlungu ni acinangolo ŵenu, kuti tacicipeleka kwa jemanja.

² Mkumbucile yiŵatite pamkulongolela AMBUJE Mlungu jwenu mcipululu, pa ulendo waulewu wa yaka 40. Ŵamlinjile ni yisawusyo yekulungwa mwelemo, ligongo ŵasakaga kuti alolecesye naga jemanja mwaliji tayale kwapikanila ni kugakuya malamusi gawo.

³ Ŵamtamice jemanja ni sala, nambo soni ŵampele mana kuti mlye, cakulya cimkanimlyeje jemanja, pamo ni acinangolo ŵenu citandilile. AMBUJE Mlungu ŵatesile yeleyi kuti amjiganye kuti mundu ngakukola umi ligongo lya cakulyape, nambo akulama ni maloŵe gosope gakuŵeceta jwalakwe.

⁴ Yakuwala yenu nganiyimala, soni sajo syenu nganisiyimba. Pandaŵi jimwaliji pa ulendo wenu waulewu wa yaka 40.

⁵ Mŵeje mli mkumanyilila kuti AMBUJE Mlungu akusapeleka cilango kwa jemanja, mpela mwakusapelecela baba cilango kwa mwanagwe, pakusaka kumjiganya.

⁶ Myoyo jemanja, mtendeje yindu mpela mwamlamulile AMBUJE. Mgakuye ni kugapikanila malamusi gawo.

⁷ AMBUJE Mlungu jwenu takamjinjisye jemanja mcilambo cambone, cilambo cana sulo, cana yisima, cana nduluko sya mesi gakuwulika m'yiŵata ni m'matumbi.

^8-9 Timkasole cisyano ca kopa* ni soni yisyano yakulimba yakusimanikwa m'maganga m'matumbi ga kweleko. Ngamja kuwa ni sala ligongo kwana tiligu, balele,* mipeleya, nguju, olifi* ni uci wejinji.

¹⁰ Patimkalye ni kwikuta yakulya ya mcilambo celeco, mkatogolele ni kwalumba AMBUJE Mlungu jwenu, ligongo lya kumpa cilambo cambone.

Akwagombelesya kuti akaliŵalila AMBUJE

¹¹ “Mlolecesye kuti ngimkwaliŵalila AMBUJE Mlungu jwenu. Soni mkalepela kugapikanila malamusi gosope gangumpa lelo jinoga.

¹² Naga mkuja kugapikanila malamusi gelega masiku gosope, timkakole yakulya yejinji, soni timkataŵe nyumba syakutama syambone.

¹³ Timkakole soni ng'ombe, ngondolo, silifa,* golidi,* ni yipanje yine yejinji.

¹⁴ Pitimkayiwone yele yinduyi yili mkutendekwa, conde mkaja kuŵa ŵandu ŵakupoka, nikwaliŵalila AMBUJE Mlungu jwenu juŵamkulupwisye jemanja ku Iguputo kumwaliji acikapolo.

¹⁵ Mkumbucile kuti jwalakwe ni juŵamlongolele jemanja, mpaka mwacipelete cipululu cakogoya cila, mwele mugaliji majoka ga ukali ni makoloto. Mwaliji mwangali mesi, nambo AMBUJE ŵampele mesi kutyocela mlwala kuti m'mwe.

¹⁶ Ŵampele soni mana kuti mlye mcipululu mula, cakulya cimkinalyeje acinangolo ŵenu. Ŵamlijinjile pakumpa yisawusyo kuti cikulupi cenu ciŵe pa jwalakwe, kuti pambesi pakwe amtendele yindu yambone.

¹⁷ Patimkaŵe ŵandu ŵakusicila mcilambomo, mkaja ganicisya kuti msicile ligongo lya macili genu.

¹⁸ Mkakumbucileje ndaŵi syosope kuti AMBUJE Mlungu jwenu, ni ŵakusampa macili gakuti mŵe ŵandu ŵakusicila. Akutenda yindu yeleyi ndaŵi ajino kusosa kwanilisya cilanga ciŵalangene ni acinangolo ŵenu.

¹⁹ Myoyo ngumsalila kuti, naga mkuja kwaliŵalila AMBUJE Mlungu jwenu, ni kutanda kujilambila milungu jine, nditu AMBUJEWO takamjonanje.

²⁰ Naga ngamkuja kwapikanila AMBUJE, takamjonanje mpela mutakasijonanjile ngosyo sya ŵandu ŵa mcilambo citimkatame, ndaŵi jitimkajinjileje.