Detulonomo 6 - Chiyawo Bible

Lilamusi lyekulungwa

¹ “Aga ni malamusi ni majiganyo giŵandamwile AMBUJE* Mlungu jwenu kuti nimjiganye jemanja. Mkagapikanileje gelega ku cilambo cimsigele panandi kuja kwinjila ni kuja kutamilicika.

² Ndaŵi syosope pamli ciŵela cijumi, jemanja ni yisukulu yenu, mwacimbicisyeje AMBUJE Mlungu jwenu, ni kugapikanila malamusi gawo gosope gingumsalila, kuti pakutenda myoyo mkatame ni umi ndaŵi jelewu.

³ Jemanja Aisalaeli, conde pikanani soni mkalamuce, mgapikanileje gele malamusigo. Naga mkutenda myoyo yindu tikamjendele cenene, soni timciŵa ŵandu ŵa lukosyo lwekulungwa, ni timcitama mcilambo ca cajila, mpela mwele AMBUJE, Mlungu jwa acinangolo ŵenu muŵatendele cilanga.*

⁴ “Jemanja Aisalaeli, pikanani, AMBUJE Mlungu jwetu ali Mlungu jumope basi.

⁵ Mwanonyele AMBUJE Mlungu jwenu ni mtima wenu wosope, ni umi wenu wosope, ni macili genu gosope.

⁶ Conde, mkagaliŵalila malamusi gosope gangumpa lelo jinoga.

⁷ Mkajiganye ŵanace ŵenu gele malamusigo mwakuwilisyawilisya, pa malo gali gose gatimkatame. Mkasalileje ya malamusigo ndaŵi syosope, kanga mli m'nyumba mwenu, kanga mli mkwenda mwitala, kanga mli mkupumula kapena mkukamula masengo.

⁸ Mgalembe malamusigo ni kugataŵa pa makono ni pa wusyo penu kuti mgakumbucileje.

⁹ Mgalembe pa mafelemu ga matanga ga nyumba syenu ni pa yipata yenu.”

Akwakalamusya ŵandu ŵangapikanila malamusi

¹⁰ Mose* ŵasalile Aisalaeli kuti, “AMBUJE Mlungu jwetu ŵatesile cilanga ni acinangolo ŵenu Abulahamu,* Isaki ni Yakobo* kuti tacimpa jemanja cilambo cicikwete misinda jajikulungwakulungwa soni jakusicila, jele jimkinimtaŵa jemanja ni yala yenu.

¹¹ Nyumba syakwe sikaŵe syegumbale ni yindu yambone yimkanimŵika jemanja. Timkayisimane yisima yesolesole. Timkajisimane soni migunda ja mipeleya ni ja olifi* jelimelime, jele jimkanimpanda kalikose. Nambo AMBUJE pitakamjinjisye mcilambo celeci, soni pitimkakole yakulya yejinji, mkasamalile,

¹² mkaja kuliŵalila kuti AMBUJE ni ŵaŵamkulupwisye ku Iguputo, kumwaliji acikapolo.

¹³ Mwacimbicisyeje AMBUJE Mlungu jwenu, mumlambileje jwalakwe jika, mtendeje yilanga yenu mu lina lyakwe pelyo.

¹⁴ Mkalambilaga milungu jine, milungu jele jakujilambila ŵandu ŵakutama mwakuŵandikana ni jemanja.

¹⁵ Pakuŵa naga mkujilambila milungu jine, kutumbila kwa AMBUJE tikucimyicilila jemanja mpela moto, ni tucimjonanga, ligongo AMBUJE Mlungu jwenu, ŵali pasikati penu, ali Mlungu jwa wiwu, jwangakunda kuti jemanja mkole mlungu jwine.

¹⁶ “Mkasimwatanda AMBUJE Mlungu jwenu, mpela mumwatendele ku Masa kula.

¹⁷ Mlolecesye kuti mkugasunga cenene malamusi gosope gampele AMBUJE.

¹⁸ Mtendeje yele peyo yakumsalila AMBUJE kuti ayi ni yindu yambone ni yakulungamika, ni yindu yosope tiyicimjendela cenene. Timcipocela cilambo cambone ca cajila, cele ciŵatesile cilanga AMBUJE kuti tacicipeleka kwa acinangolo ŵenu,

¹⁹ nipo jemanja timcatoposya amagongo ŵenu, mpela muŵaŵecetele AMBUJE.

²⁰ “Yaka yikwisa msogolomo, ŵanace ŵenu taciŵa ali mkumwusya jemanja kuti, ‘Ligongo cici AMBUJE Mlungu jwetu, ŵatulamwile kuti tugapikanileje malamusi ni majiganyo gosopega?’

²¹ Jemanja timcajanga jemanjajo kuti, ‘Uweji twaliji acikapolo ŵa Mwenye jwa ku Iguputo, nambo AMBUJE ŵatukulupwisye mwamacili gawo gamakulungwa.

²² Uweji ni meso getu twaweni AMBUJE ali mkwatendela ŵandu ŵa ku Iguputo yindu yakusimonjesya ni yakogoya, kuti ŵape cilango jemanjajo, pamo ni mwenye jwawo ni maŵasa gawo gosope.

²³ AMBUJE Mlungu jwetujo, ŵatukopwesye uweji ku Iguputo, ni kutuyicisya mpaka akuno, ŵatupele cilambo acino mpela muŵatendele cilanga ni acinangolo ŵetu.

²⁴ Ni ligongo lyakwe AMBUJE Mlungu jwetujo ŵatulamwile uweji kuti, tugapikanileje malamusi gosopega ni kumcimbicisya jwalakwejo. Naga tukutenda yeleyi, jwalakwejo taciwusunga mtundu wetu, ni kutukamucisya kuti tuŵe ŵandu ŵakusicila.

²⁵ Myoyo yindu yakusosekwa sambano uweji kuyitenda, ni kuyisunga yosope yatulamwile AMBUJE Mlungu jwetu mwakulupicika, ni jwalakwejo taciŵa jwakusangalala ni uwejo.’