Detulonomo 5 - Chiyawo Bible

Malamusi likumi

¹ Mose* ŵaŵilasile Aisalaeli wosope ni ŵasalile kuti, “Aisalaeli pikanani malamusi gingumpa jemanja lelo jino. Mlijiganye gele malamusiga soni mlolecesye kuti mkugapikanila.

² AMBUJE* Mlungu jwetu ŵaŵisile cilanga* ni ŵandu ŵa mtundu wetu, Petumbi lya Sinayi.

³ Cilanga celeci ngaŵa kuti ŵatesile ni acinangolo ŵetupe, nambo soni ni uwe wosope ŵatuli cijumi mpaka lelo jino.

⁴ Mlungu ŵaŵecete ni jemanja pameso ni pameso kutyocela m'moto petumbi pala.

⁵ Pa lyele lisiku lila, uneji najimi cilikati ca jemanja ni AMBUJE, ni naliji mkusalila maloŵe giŵaŵecetaga AMBUJE, ligongo jemanja mwaliji mkuwujogopa moto, soni mwaliji mkogopa kwela litumbi. “AMBUJE ŵatite,

⁶ ‘Une ndili AMBUJE Mlungu jwenu, junamkulupwisye jemanja mcilambo ca Iguputo, kumwaliji acikapolo.

⁷ “ ‘Mkalambila milungu jine akaŵe une jika.

⁸ “ ‘Mkasimlipanganyicisya cindu cilicose cakusepa cakulandanicisya ni cindu cilicose ca kwinani, kapena ca pacilambo ca pasi, kapena cindu cilicose ca mkati mwa mesi ga pa cilambo ca pasi.

⁹ Mkasimyitindiŵalila kapena kuyilambila yindu yeleyi, pakuŵa une AMBUJE Mlungu jwenu, ndili Mlungu jwa wiwu, nganimkunda kuti jemanja mkole milungu jine, ngupeleka cilango kwa ŵandu wosope ŵakuŵengana ni une. Ngupeleka soni cilango kwa yisukulu yawo, kuyicila mpaka yisukulu ya mpago ŵatatu mpakana wa mcece.

¹⁰ Nambo ngwatendela canasa ŵandu ŵajinji ŵakunonyela ni kugasunga malamusi gangu.

¹¹ “ ‘Mkalikamulisya masengo gangalumbana lina lyangu, ligongo une AMBUJE Mlungu jwenu tinjipeleka cilango kwa mundu jwalijose jwakulikamulisya masengo gangalumbana lina lyangulyo.

¹² “ ‘Mlisunjeje lisiku lya sabato kuti liŵeje lyakupumula. Mpela mwele une AMBUJE Mlungu jwenu, namlamulile.

¹³ Mkamuleje masengo genu gosope ni kugamalisya pa masiku msano ni limo.

¹⁴ Nambo pa lisiku lya msano ni kaŵili lili lisiku lyakupumula,* ligongo lya une AMBUJE Mlungu jwenu. Pa lyele lisikuli mkasimkamula masengo m'mwejo, ŵanace ŵenu, ŵamasengo ŵenu, atamose yilangwa yenu kapena acalendo ŵali pasikati penu. Ŵamasengo ŵenu akwenela kupumula pa lisiku lyeleli mpela mumkupumulila mwasyene.

¹⁵ Namlamwile jemanja kuti mlisunjeje lisiku lya Sabato, kuti liŵeje lisiku lyakupumula. Kuti mkumbucileje kuti jemanja mwaliji acikapolo ku Iguputo, ni soni kuti une AMBUJE Mlungu jwenu na mkulupwisye ni macili gangu gamakulungwa.

¹⁶ “ ‘Mwacimbicisye baba ŵenu, ni mama ŵenu, munamlamulile une AMBUJE Mlungu jwenu, kuti pakutenda myoyo yindu yimkajendeleje cenene, ni soni kuti masiku ga umi ŵenu gaŵe gamajinji mcilambo citinampe jemanja.

¹⁷ “ ‘Mkawulaga.

¹⁸ “ ‘Mkatenda cikululu.

¹⁹ “ ‘Mkajiŵa.

²⁰ “ ‘Mkapeleka umboni wakumlambucisya mjenu.

²¹ “ ‘Mkakumbila jwamkongwe jwa mjenu. Mkakumbila nyumba jakwe, mgunda wakwe, ŵamasengo ŵakwe, ng'ombe jakwe, bulu jwakwe, kapena kandu kalikose ka mjenujo.’

²² “Aga ni malamusi gaŵapelece AMBUJE kwa jemanja wosope ndaŵi jimwasongene kwitumbi kula. AMBUJEWO ŵaŵecete ni maloŵe gawo gamacili m'moto ni mlyosi lya bii lila, ŵapelece gele malamusiga mwangajonjecesya gane. Ni ŵagalembile malamusi likumigo pa mawubawo gaŵili ga maganga, ni ŵambele une.

Ŵandu akutenda woga

²³ “Ndaŵi jimwapikene maloŵe gakutyocela mcipi, litumbi lyosope lili mkolela moto, acakulungwa ŵenu ŵakulongolela pamo ni acayimwene ŵa maŵasa genu ŵayice kwa une,

²⁴ ni ŵatite kuti, ‘AMBUJE Mlungu jwetu, ŵatulosisye ukulu ni lumbili lwawo, ndaŵi jitwapikene AMBUJEWO ali mkuŵeceta kutyocela m'moto mula. Lelo tuyiweni kuti mundu akukomboleka kutama ni umi atamose kuti Mlungu ali aŵecete najo.

²⁵ Ana citutuwile uweji akuno ni cici? Moto wakogoyawo ciwutujonanje. Cituwe naga tukwapikana soni AMBUJE Mlungu jwetu ali mkuŵeceta ni uweji.

²⁶ Ana apali mundu jwalijose juŵatemi ni umi ali ŵapikene Mlungu jwa cijumi ali mkuŵeceta m'moto mpela mutwatendele uweji mula?

²⁷ Ŵalakwe Mose, awujilile akatupikanile yosope yitakaŵecete AMBUJE Mlungu jwetu. Kaneko ayice, kukutusalila wosopewe yele yitakasalile ŵalakwe. Uwe wosope tucipikanila ni kuyitenda yitakasalileyo.’

²⁸ “Piŵapikene AMBUJE maloŵe gimwasalile unejiga, AMBUJEWO ŵasalile une kuti, ‘Nayipikene yosope yaŵecete ŵanduŵa, ni yaŵeceteyo yili yakuwona.

²⁹ Une ngusosa kuti ŵandu ŵeleŵa aganisyeje camti myoyo masiku gosope. Soni ngusosa kuti ŵandu ŵeleŵa anjimbicisyeje ni kugapikanila malamusi gangu, kuti yindu yajendeleje cenene jemanjajo pamo ni yisukulu yawo kwa yaka yosope.

³⁰ Mjawule mkasalile ŵanduwo kuti awujile ku masakasa gawo.

³¹ Nambo m'mwe Mose, mtame akuno pamo ni une, ni une tinampe malamusi ni majiganyo gosope. M'mwejo timkajiganye ŵandu yosopeyi, kuti akagasunjeje gele malamusigo mcilambo cinguja kwapaco.’

³² “Myoyo jemanja, ŵandu ŵa ku Isalaeli, conde mŵe ŵandu ŵakulupicika kutenda yosope yamlamwile AMBUJE Mlungu jwenu. Ni soni mkakasa lilamusi lyawo line lililyose.

³³ Mgapikanileje malamusi gosope, kuti yindu yikamjendeleje cenene, mcilambo citakampe AMBUJE Mlungu jwenu, kuti mkatamilicice. Ni kuti soni mkapitilisye kutama ni umi.