Detulonomo 4 - Chiyawo Bible

Mose akwasalila Aisalaeli kuti aŵe ŵandu ŵakupikanila

¹ Mose* ŵasalile Aisalaeli kuti, “Sambano jemanja, Aisalaeli, mpikaneje malamusi ni majiganyo gangumjiganya unejiga ni timŵe ni umi, ni timcijinjila ni kutamilicika mcilambo cakumpa AMBUJE,* Mlungu jwa acinangolo ŵenu.

² Myoyo mgapikanileje malamusi ginampele, ga AMBUJE, Mlungu jwenu. Mkasimjonjecesya kandu kalikose kapena kutyosya kandu kane, pa yindu yinamlamwileyi.

³ Jemanja mwalolite ni meso genu, yiŵatesile AMBUJE ku Baala Piyoli. AMBUJE Mlungu jwenu ŵajonasile jwalijose jwa jemanja juŵakuyaga Baala,

⁴ nambo wosopemwe ŵimwaliji ŵakulupicika kwa AMBUJE Mlungu jwenu, mli ciŵela cijumi lelo jino.

⁵ “Une namjiganyisye jemanja malamusi gosope mpela muŵandamulile AMBUJE, Mlungu jwangu, kuti namjiganye. Mkagapikanileje gele malamusiga, mcilambo cimsigele panandi kwinjila ni kuja kutamilicika.

⁶ Mgasunje gele malamusiga ni kugapikanila, yeleyi tiyikalosye kwa ŵandu ŵa mitundu jine* kuti jemanja mli ŵandu ŵalunda ni ŵakupikanicisya yindu. Mundu jwalijose jutakapikane malamusi genu gosopega, takasale kuti, ‘Lukosyo lwa ŵandu ŵeleŵa luli lwalunda soni lwakupikanicisya yindu!’

⁷ “Pangali lukosyo lwine, atamose lwalukulungwa, lukwete Mlungu jwakutama mwakuŵandikana ni ŵandu ŵakwe ni kwajanga mapopelo gawo mpela mwakutamila Mlungu jwetu ni uweji.

⁸ Pangali soni lukosyo lwine, atamose lwalukulungwa camtuli, lukwete malamusi ga cilungamo mpela ginampele lelo jino.

⁹ Ngumgombelecesya kuti, mkaliŵalila yindu yosope yimwalolite ni meso genu ali mkumtendela, AMBUJE Mlungu jwenu. Yindu yeleyo yikatyoka m'mitima jenu ndaŵi josope ja umi wenu. Timwasalile ŵanace ŵenu ni yisukulu yenu yakwe.

¹⁰ Timwasalile jemanjajo ya lisiku limwajimi pameso pa AMBUJE Mlungu jwenu, Kwitumbi lya Sinayi lila, kumwasalile AMBUJE kuti, ‘Mose, mwasonganye ŵandu ayice pa malo agano, ngwasosa jemanjajo kuti agapikane maloŵe gatimbecete, kuti pitagapikane maloŵe gangugo, alijiganye kumbikanila uneji, ndaŵi josope jitaciŵa ni umi pa cilambo capasi pano. Ni kuti soni taŵe ali mkwajiganya ŵanace ŵawo kumbikanila une.’

¹¹ “Timwasalile ŵanace ŵenuwo, yimwatite pakwawula ni kuja kwima mungulugulu Litumbi lya Sinayi lila. Litumbilyo lili mkolela moto, lilamba lya motowo lili mkwela mpaka ku mawunde. Lyosi lya bii ni cipi caliwunicile litumbilyo.

¹² AMBUJE ŵaŵecete ni jemanja ali m'motomo, mwapikene ali mkuŵeceta, nambo nganimwawona ni meso genu.

¹³ AMBUJEWO ŵamsalile jemanja yakwenela kuyitenda kuti mcisunje cilanga* ciŵapangene ni jemanja. Cilangaco ni malamusi likumi giŵalembile pa maganga gaŵili gesokote.

¹⁴ AMBUJE ŵasalile une ndaŵi jelejo kuti namjiganye jemanja malamusi gosope gakwenela kugasunga mcilambo cimkuja kwinjila ni kuja kutamilicika.

Akwagombelecesya kuti akajilambilaga milungu jine

¹⁵ “Ndaŵi jiŵaŵecetaga AMBUJE kutyocela m'moto mwitumbi lya Sinayi, jemanja nganimwawona AMBUJEWO ni meso genu.

¹⁶ Myoyo mkalamuce, kuti mkatenda ulemwa* pakulipanganicisya mlungu jwakusepa kapena jwagumba jwa mtundu uliwose, atamose kupanganya mlungu jwakuwoneka mpela mundu jwamlume kapena jwamkongwe,

¹⁷ soni mlungu jwakusepa kapena jwagumba jwakuwoneka mpela cinyama ca mtundu uliwose wa pacilambo capasi, kapena jwakuwoneka mpela cijuni ca mtundu uliwose cakuguluka mwinani,

¹⁸ kapena mlungu jwalijose jwakuwoneka mpela cinyama cilicose cakwaŵa pacilambo capasi, kapena jwakuwoneka mpela somba sya m'nyasa.

¹⁹ Mkasimlinga amta panandi kulambila kapena kuyitumicila yindu yimkuyiwona kwinani, mpela lyuŵa, mwesi ni ndondwa. Ligongo AMBUJE Mlungu jwenu ayipelece yindu yeleyi kwa ŵandu ŵa ngosyo sine kuti ayilambileje.

²⁰ Nambo jemanja ŵamkulupwisye ku masengo gamakulungwa ga ukapolo, mcilambo ca Iguputo. Ŵamkopwesye mcilambo ca Iguputo kuti jemanja mŵe ŵandu ŵa AMBUJE, mpela mumŵelele lelo jinomu.

²¹ AMBUJE Mlungu jwetu ŵandumbilile uneji, ligongo lya yitendo yenu, Ŵalumbile kuti uneji nganjomboka Lusulo lwa Yolodani kuja kwinjila mcilambo ca cajila, cakucipeleka kwa jemanja.

²² Une nganjomboka lusulo timbwile mcilambo acino, nambo jemanja msigele panandi komboka lusulolo ni kuja kwinjila ni kutamilicika mcilambo ca cajilaco.

²³ Myoyo ngumgombelesya kuti, mkaliŵalila cilanga ciŵapangene AMBUJE Mlungu jwenu, ni jemanja. Mkampanganya mlungu jwakusepa kapena jwagumba, kulandanicisya ni cindu cine cilicose ciŵamlekasisye AMBUJE Mlungu jwenu.

²⁴ Pakuŵa AMBUJE Mlungu jwenu ali Mlungu jwa wiwu. Ngakukunda kuti alimbaneje ni milungu jine. Ali ŵawukali mpela lilamba lya moto lyakolela mwa ukali.

²⁵ “Atamose mli mtemi mcilambomo kwa ndaŵi jelewu, mpaka kuŵeleka ŵanace ni yisukulu yakwe, mkaja kutenda ulemwa, pakulipanganyicisya mlungu jwakusepa kapena jwagumba kuwanicisya cindu cine cilicose. Ligongo yele yinduyo yili yakusakala pameso pa AMBUJE, ni tacitumbila nayo.

²⁶ Myoyo kwinani ni cilambo kuŵe mboni lelo jino, kuti naga jemanja ngamkupikanila yingumsalila une, ngimja kutamilicika mcilambo. Ngamja kutama ndaŵi jelewu mcilambo cili pesi Lusulo lwa Yolodani, cimsigele panandi kwinjila. Timkajonasice wosope.

²⁷ AMBUJE takam'balalisye pasikati pa ŵandu ŵa ngosyo sine, nambo mwa jemanja tacisigala ŵandu ŵa mnonope pasikati pa ŵandu ŵa ngosyo sine sya cilambo kutacim'balalicisya AMBUJE.

²⁸ Kweleko timkalambileje milungu jakupanganya ni yala, milungu jakusepa ja yitela ni ja maganga, milungu jangali mate kose, jangapakombola kulola, kupikana, kulya kapena kunucisya.

^29-30 Patimcitama mu yele yisawusyoyo, mwine timciganicisya yakusosa kwalambila AMBUJE jika. Naga mkuja kuwujila kwa AMBUJEWO ni kwapikanila maloŵe gawo. Taciŵa soni Mlungu jwenu.

³¹ AMBUJE Mlungu jwenu tacimtendela canasa. Ngisamjasa kapena kumjonanga, soni ngisaciliŵalila cilanga ciŵalumbile AMBUJEWO asyene, kwa acinangolo ŵenu.

³² “Mwungunye yindu yiyatendekwe kala jemanja mkanimpagwe, kutandila pa lisiku lyele Mlungu liŵapanganyisye mundu pa cilambo capasi. Mwungunye pa cilambo cosope capasi. Ana cindu cacikulungwa camti myiyi, catendekwe ni kalakose? Ana apali mundu jwine jwalijose juŵapikene ya yindu ya mtundu welewo?

³³ Ana apali ŵandu ŵane ŵaŵatemi ni umi ali agapikene maloŵe ga Mlungu ali m'moto, mpela mumwapikanile jemanja?

³⁴ Ana apali mlungu jwine jwalijose juŵajawile kuja kwajigala ŵandu, kwatyosya pasikati pa lukosyo lwine, ni kwasandusya ŵandu ŵakwe, mpela muŵamtyocesye jemanja, AMBUJE Mlungu jwenu ku Iguputo kula? Jwalakwe ŵayitesile yindu yakusimonjesya yakogoya ni macili gakwe gamakulungwa, soni ŵaputile ngondo, jemanja mli kulola ni meso genu.

³⁵ AMBUJE ŵamlosisye yindu yosopeyo kuti jemanja m'manyilile kuti AMBUJE jika ni ŵali Mlungu, ni kuti pangali soni jwine.

³⁶ AMBUJE ŵakundile kuti mgapikane maloŵe gawo kutyocela kwiwunde, kuti amjiganye, ni pa cilambo capasi pano AMBUJEWO ŵamkundile jemanja kuti mwuwone moto wawo wekulungwa, ni mwapikene ali mkuŵeceta ni jemanja kutyocela m'motomo.

³⁷ Ligongo lyakuti AMBUJE ŵanonyele acinangolo ŵenu, ŵamsagwile jemanja ŵamli yisukulu yawo, ni mwamacili gawo gamakulungwa ŵamkopwesye ku Iguputo.

³⁸ Ndaŵi jimwaliji pa ulendo wakuja kwinjila mcilambo, AMBUJE ŵatopwesye ŵandu ŵa ngosyo sine mcilambomo ŵaŵaliji ŵamacili mnope kumpunda jemanja, kuti amjinjisye ni kumpa jemanja cilambo cawoco, cele cacili cenu mpaka lelo jino.

³⁹ Myoyo mkumbucileje kuti AMBUJE ni ŵali Mlungu jika jwakuwona, jwakwinani ni cilambo capasi. Pangali soni Mlungu jwine.

⁴⁰ Mgapikanileje malamusi gawo gosope ginampele lelo jinoga. Naga mkutenda myoyo, yindu tiyikamjendele cenene jemanja ni yisukulu yenu. Soni timkatamilicice mcilambo citampe AMBUJE Mlungu jwenu, kuti ciŵe cenu kwa yaka yosope.”

Misinda jakulupucilamo kungopoko lyuŵa kwa Yolodani

⁴¹ Kaneko Mose ŵalesile misinda jitatu kungopoko lyuŵa kwa Lusulo lwa Yolodani

⁴² kwakutilila mundu jwalijose jwakuwulaga mjakwe mwangosi, ngaŵa ligongo lya magongo, nambo pakusosa kuwukulupusya umi wakwe. Naga mundu atilile ku msinda umo wa misinda jitatuji, ŵaliji mkuleka ngamwulaga.

⁴³ Ŵandu ŵa lukosyo lwa Lubeni, msinda wawo wakutilila waliji Besala, wele waliji mcipululu mcilambo ca matumbi. Ŵandu ŵa lukosyo lwa Gadi, msinda wawo wakutilila waliji Lamoti uwaliji mcilambo ca Giliyadi ni ŵandu ŵa lukosyo lwa Manase, msinda wawo wakutilila waliji Golani uwaliji mcilambo ca Bashani.

Maloŵe gandanda pa ndaŵi jakupeleka Malamusi ga Mlungu

⁴⁴ Aga ni malamusi gaŵapelece Mose kwa Aisalaeli.

⁴⁵ Mose ŵasalile Aisalaeli malamusi gelega ali akopwece ku Iguputo.

⁴⁶ Aisalaeliwo ŵaliji m'ciŵata ca Lusulo lwa Yolodani, kulolegana ni musi wa Beti Piyoli. Celeci caliji cilambo ca Aamoli ciŵalamulilaga Mwenye Sihoni, juŵalamulilaga msinda wa Heshiboni. Mose ni Aisalaeli ŵampundile pa ngondo Mwenye Sihoni, ndaŵi jiŵakopwece mcilambo ca Iguputo.

⁴⁷ Aisalaeli ŵatamilicice mcilambo cakweco, ni soni mcilambo ca Mwenye Ogi jwa ku Bashani. Jemanjaji ŵaliji acayimwene ŵaŵili ŵa Aamoli ŵaŵatamaga ku ngokopoka lyuŵa kwa Yolodani.

⁴⁸ Cilambo cele ciŵasumwileco catandilile ku msinda wa Aloeli wele waliji mungulugulu mwa Lusulo lwa Alinoni, mpaka kuja kwika kumpoto Kwitumbi lya Siliyoni, (lyeleli ni Litumbi lya Helimoni),

⁴⁹ ni cilambo cosope ca kungopoko lyuŵa kwa Yolodani mpaka ku m'mwela kwa Nyasa ja Njete, ni kungopoko lyuŵa kwa mungulugulu mwitumbi lya Pisiga.